Burma Ram Mipi Bawm Tul

Burma Ram Mipi Bawm Tul
Nikum 2008 ih Cyclone Nargis in a nuai ciamco ruangih minung 140,000 lenglo an thihnak Burma ram Irrawaddy kiangkap ih minung thawng tampi cu kumkhat a kimzik hnu tiangkhal ah harsat nak nasa zet an tuarlai ih bawm an tulzet asi tiah UN cun a sim.
UN leh Burma ram cun tui kan dung February thla ah khan hi thlipi hraang ruangih harsat nak tuartu pawl bawmnak dingah  dollar Million 700 hrawng a tul ding thu an rak simzo ih, tu ah hin dollar Million 100 hrawngfang an ngah ruangah UN cu a buaizet a si.
Nikum ih thlipi in a nuai ruangah minung Million 2 lenglo cu um nak Inn leh tirawl ei ding neilo in an um lai ih himi- mi harsa bawmtu ding cu zokhal Burma Cozah in a ramsung ih luhter a siang asi tiah  UN cun a sim.  Save the Children (STC) ih hnatuan tu  Andrew Kirkwood in a sim nakah, ram dangdang pawlin bawmnak an pek tummi hi Ralkap Cozah in a tullo mi leh thildang an mai hamthat nakdingah an hmangding ti hi ramdang pawlin an phang ih, Ram dang pawlcu thil thalo zawng ding hlir ih thil zohlo dingin leh ramdang bawmnak cu dikzetih hman thei a beisei thu a sim.
Cuba Leh America
Cuba Communist ram kum 50 uktu Filed Castro cun  May Day ih mipi hmaiih thu a sim nakah, US in Cuba thawi rualrem awknak a duhthu a sim micu Cuba ram ukbet tumnak leh a thu hnuai ih retih Sal vekin sawr a tumnak men a si a ti. Filed Castro cun America Cozah cu Cuba Cozah ih thilti sual mipawl  ngaidam thei ding vekih um aw ter hrim ah a puh ih Cuba ram cu America in a kut hnuaiih retih sal vekih sawr a tum thu theih a si ruangah Cuba ramcu US kut hnuai ih um ter theih a silo a ti.
Relzo vekin President Obama cun  Cuba Cozah cu a ram mipi zalen nak pe dingin leh Politics ruangih mi tampi thawng a thlak mipawl suahsal nakding lamzin hawl dingin a rak ngen zo ih, himi vekih thil tha a tuah asi ah cun US leh Cuba rualpi that awk nak an neih thei a zumthu a rak simzo. US Cozah cun Cuba ram mipi cun an zalen nakding nisuak cu beisei nak sangzet thawn an thlir ringring a si a ti. Filed Castro hi kum 82 mi asizo nan  Cuban Communist Party hruaitu a si ringring lai.
LTTE Leh Sri Lanka
Mizan ah LTTE pawlih um nak Sri Lanka ralkap pawlin an kulh mi ram fiakte sungih sin LTTE Tapung minung 23 cu  Mullativu tipi ihsin  Lawng hmangih tlansuak an tum lai ah Sri Lanka ralkap pawlin tipi kap ihsin  Meithal Machine Gun leh Rocket Louncher thawn an kap ciamco ih lawng sungih LTTE minung 23 kahthat thluh an si hnu ah an lawng khal tipi sungah kahpil sak an si.
Sri Lanka ralkap thupunagtu Brig, Adaya Nanayakkara in a sim nakah LTTE pawlhi Sri Lanka ralkap pawlin ram fiakte sungih  an kulh thluh zo ruangah an hotupa V Prabhakaran ih ho ih tlansuah theinak hmun remcang hawlin an um rero laiih  leipar khawmual khalah Sri Lanka ralkap pawlin an kulh thluh zo ih tipi khal ah ralkap pawlin Raldo nak lawngthawn an kil thluh a si ati. Himi lai ah Kilinochchi ih LTTE nauhak ralkap minung 58 leh naunau lamih an hruaitu ziangmaw zat cu mizan sun ah Cozah kut ah an pe lut aw tiah a simbet.
(Visited 32 times, 1 visits today)

Comments

comments

Comments

%d bloggers like this: