Burma Ram Hrilawk Ding Thu

Burma Ram Hrilawk Ding Thu
 
Kum 1990  hrilawk hnuih Burma rampi hrilawk salnak a voi khat nak dingcu tuikum kumhrek hrawngah an tuah zum a si, hi thuhi tihni sun January ni 4 Burma Independent ni ah Ralkap hotu bik General Than Shwe in a simih, General Than Shwe cun mipi pawlcu hrilawk nakah  thinlung  fimkhur zet pu ih , hrilsual lo dingin a cah.
 
Himi laiah United States cun  Burma ram hrilawk nakcu zumtlak hrilawk nak a silo ding ti a phanthu a simih, Opposition pawl leh tlangpar mi miphun malsawn pawl ngai pawimawh dingin US cun ralkap thu neitu pawl a ngen.
 
US State Department  Thupuangtu, Ian Kelly cun Burma ram hrilawk nak dingah Opposition pawlleh tlangpar mi miphun mal deuh pawlhi an tel peimaw tihi US cun a zoh ringring tiah a sim.
 
Ian Kelly cun tutiangah ah cun Burma ralkap hotu pawlih thilti danah lungawi ding thu zianghman theih nak a um hrihlo ih,Opposition hotu pawl minung ziangmaw zat thawng Inn ih an um lai ruangah leh Politics thuhla zalen zetih zianghman rel theih a silo ruangah leh thudik tlangzarh nak lamzin phihsak a si ruangah mipi hrangih lungawi nakding hmuhding leh theih ding zianghman a um hrihlo a si a ti.
 
Kum 1990 hrilawk ah khan National League for Democracy (NLD) an cakzetih a sinan ralkap pawlih thu neihnak an pek duhlo ih tlunah  an hotu ziangmaw zat an kaiih thawng an thla ih Aung San Suu Kyi khal kum 20 sungih a caan tamsawn cu thang In sungah a hmang.
 
CIA Pawl Thattu  Thei Suak
 
Tui December ni 30 zanih Afghanistan ram Forward Oparating Base Chapman ih thihcilh bomb hmangih  CIA agent minung 7 thattu cu Al-Qaida Agent Human Khali Abu- Mulal Al- Balawi kum 36 mi Jardan ram  Zarqa khawsuak mi a si tiih an theihsuak thu US Media pawlcun an sim.
 
Hi pahi Jordan ram Intelligent pawlkhalin an rakkai zoih, cumi hnu ah Jordan ram Intelligent leh CIA pawlcun hna ttuanpi dingah an sawmih, Al-Qaida hotu pawlih umnak hmun leh an thuhla pawl zingzoi dingin an fialih Afghanistan ramih caan ziangmawzat a um hnu ah December mi 30 zanah  CIA Agency hmunpi ah lutin thihcilh bomb thawn minung 7 a that sawn ta a si.
 
Hi Bomb puakhi kum 1983 ih Lebanon ram khawpi Beirut ih US Embassy an bomb hnu ih US Intelligence pawlin an tuarnak rapthlak bik leh an sun bik ih ruah a si.
 
Washington Post Thuthangca in a tarlang nakah hi bomb puahtu pa hin Al-Qaida hotu pawlih thuhla pawimawh zetzet simding vekin CIA Officer pawl a bumih, Cumi hnu ah mi pawimawh zet pawlin tokhawm nak Inn sungah lut theiin a paimi bomb cu a tipuak a si tiah a tarlang.
 
Jordan ram Intelligence leh CIA pawlin a hna dingih a fial micu Al-Qaida hotu bik sangtu Ayman Al- Zawahiri ih umnakhmun theihsuak dingih an fial mi a siih, a sinan  Al-Qaida lamih mi rinsan umzet a rak si thup thotho ih, an mah CIA lamtu sawn bomb hmangin a that a si. 
 
Yemen Ram Ah Al-Qaia
 
Mizansunih US Secretary of State, Hillary Clinton leh Qatar Prime Minister, Hamad Bin Hassem Al- Thani Washington ih an komawk nakah Hillary Clinton cun  Yemen ramcu leitlun ramdang hrangih  ttihnung misual tamnak bik a si ruangah kilhim naklam tthazetih tuah bet vivo a ttulih, Yemen ramin a ramsungih miusal leh Tapung pawl a donak ruangih harsat nak a ton micu US ram Cozah in bawmding in a pe aw ringring a si  ati.
 
Yemen ramhi Al-Qaida Tapung pawlin ramdang siatsuah an tumnak ih ttanhmun khuarnak hmunpi ah an hmang tum nasa tiah theih a siih, Cu ruangah Yemen Cozah khalin an ram sungih  Shia Houti Tapung leh Al-Qaida pawlcu na sazet in a do rero laiih, an ram saklam ih Tapung pawlkhat khal nasa zetin an do rero lai.
 
Yemen ram  Cozah leh Tapung pawl an do awk rero ruangih  Sanaa khawpi ih US Embassy khal caan ziangmawzat sung khar a siih, a sinan mizan sunih sin onsal a si.

(Visited 61 times, 1 visits today)

Comments

comments

Comments

%d bloggers like this: