Burma Ram Feh Dan Ding VI – Dr. Run Bik

Burma Ram Feh Dan Ding VI

Dr. Run Bik

Kan Ngaidam Awk Thluh A Tul

Pi Suu Kyi ih lawmman donmipawl kan zoh hlan ah kan ram hi democracy ngaingai a rung thlen  tikah kan zaten kan ngaidam awk thluh a tul ti hi ka ngan hmasa duh. Mi hrekkhat in hitin an ti theu. Ralkappawl ih sinak mipi hnen ih an pek duh mai lo hi an mah hremtuar leh an ngam lo ruangah a si an ti. 1989 hrawngah khan Pu Ne in tla khan Democracy kan pek cun kan mah in that thluh ding hokhaw tiin a ralbawipawl ralrin nak a rak pe theu.

Hi tla hi cu Pu Ne Win khal in cuvek a um ding ti a tih ngaingainak hman in democracy pek lo dingah a ralbwi pawl rak tang haiseh a ti nak a si sawn thei. Cule Pi Suu Kyi ih lam tang Col. (rtd.) Kyi Maung kha a si lo maw Gen. Khin Ngyunt pawl tla hi Germany ram ih Nurenburg trail vekin an thu kan rel leh ding a rak ti ruangah Kyi Mung kha thawng a tlak phah a si kha.

1994 lai ahkhanTime Magazine cover story” ah Burma ram thuhla an run ngan ih cunah cun Burma General pawl  hivek leitlun ah an um lo. An mah lawng hi ram duhdaw an ti aw ih an mahlawng in ram an kai hruai thei ding anti aw. Anmah dodaltupawl cu siatsuah thluh an tum tiin ngan a si.

Milai hi cu kan rak makzet. A tamsawn hi cu kan hotupawl ih umdan in kan um ringring a si mai. Saya Van Hnuai Sum  Burma a um lai ih a lar zet ttum ah khan Saya Sum ih thusimdan ah Kawhhran saya pawl cun an cawng thluh an ti. Mizoram ah khan Pu Lal Deng i lal lai ah a mai lam ttangpawl cu Pu Deng vek, an mah lawng in ram duhdaw, midang cu ram huatu vek ah an cangtir thluh. Cuipawl lala cu Pu Denga an suahsan cun mi pangngai an si leh ko.

Burma ah Pu Ne Win um lai ah Pu Ne Win vek, Pu Than Shew um lai ah Pu Than Shwe vek an si thluh ih hotu an sual vek in an rak sual theu a si kha.Tu ah cun Pu Thein Sein a si thlang ih Pu Thein Sein vek in tha thluh sehla, a lungawi um tuk ding.

Army Ih Mipi An Rak  Thahnak Pawl

Cule ram rung tha sehla, zopawl ha hrem a tuar tu ding? Ngaihdamawk thluh a thupi bik ko. Burma ah ralkap acozah an um hnu a hmaisa bik ih thahak tum pi cu July 7th 1962 kha a si. Rangoon University tlawngta pawl sandah an piah ih cunah tlawngta 100 lai  ralkap in an that. Cule 1966 maw si, a kum ka thei sual men ding. Sittwe (Akyab) khua ah Arkan ah mipi ih fang ei ding neih lo lai ah acozah in ramdang ah fang zuar a tum duh lotu mipi 100 lai masi ralkap pawl in zangfahnak nei ria lovin an kah that lala.

Cui hnuah UN Secy. Gen. hlun U That ih ruak vuinak ah ralkappawl in tlawngta 100 tlun an kap that lala. Cui kum thotho hrawngah cetzung ih hnatuanpawl ih sandapiah (lamzawh) cu kah that hluah an si. A rapthlakbik cu kan theih  cio vek in 1988 ih ralkppawl mipi 3000 lai an kah that kha a si ding.

Himi tlun ah ralkappawl ih ral an donak ih thilsual ti lo mipi an thah pawl, cule nunau an kaih ih an siatsuahpawl, hivek thubuai hi a thawng tel in a um. 1962 ih tlawngta kaptupawl kha an hotu captain pa hmantu ih an damlai a si ahcun kum 85 mi hrawng an si ding.1988 ih mipi thattu pawl kha kha lai i thuneitupawl cu tu ah an damlai hman ah pension maw, culole acozah lala ih an thlakmipawl maw an si thluh. Hipawl hrem an si ahcun rampum ah ralkap hlun  hotu thawngtel ih hrem awk a tul.

Pi Suu Kyi lala hin a mah hremtupawl tlun ah tongkam sia a tong dah lo. Thin naa khalin thu a sim dah lo. Phuhleisam ding khal a ti dah lo. Curuang ah ngaidamawk thluh a tul ih ngaidamawk thluh ding in thutiamawk khal a tul.

South Africa ram ah khan 1994 hrawng ihsin an mah kum 100 lai rak uk tu Mirangpawl kha midumpawl in an ngaidam thluh ih cumi hnu ah ramtha zet an run ding a si.

Argentina lawngah ram thangso an si tho ih1982 ih Flaklang raldo hnu ih an ralbawii President tuanpawl tong ah an run thlak. Annih cu Burma thawn tthim ding a si lo ding. Kan ram democracy ngaingai kan si thei le, Rule of law ziang siar lovin ram rak kaihruaitu pawl kan ngaihdam a tul thluh ding ah ruat seh la.

(Visited 48 times, 1 visits today)

Comments

comments

One Comment

  1. Pu Run,

    Nang cingcing.
    Na ngantha nasa.

    A cem tiang ka rak siar.
    Theihnak tampi a bet.

Comments

%d bloggers like this: