BURMA maw MYANMAR Tiah Obama Buai Ve Thlang!

US President Barack Obama cun Asia ram thupi pawl thinlung neh dingah a tlawng kual vivo hai ding. Thailand, Cambodia pawl ah a feh hnu ah kan ramsungah a feh ding. US president Kawlram tlawng hmaisabiktu ti khalin kan rel celcel cih ding. Ramsung lam tla cu Obama rak mikhual dingah a phunphun in timlamawknak a nei thok rero thlang.

Asinan, Obama ramsung ih thu a sim tikah “Burma” timi maw “Myanmar” timi hmin a hmang sawn ding timi hi mipi tamzet ih thusuhawknak a si thlang. Ziangah tile- US, Britain, Canada le New Zealand pawl cun Kawlram ih hmin a thleng mi, hmin Myanmar ti’n an ko ve lo.

Kan ram cun Burma timi cu Myanmar tiin an thlengnak kum 23 a kim zo nan Burma tiin mitamsawn cun an ko thotho. Kam rampi cun mipi rawn niakno loin acozah ralkap thunei pawl cun anmah te thu in Burma ihsin Myanmar tiah 1989 lai ahkhan an rak thleng. Cutin, a dungthlun ah kan ram mipi sualnak tuahlo a thawngtel lamzawhnak ah an that cih bet. Mipi cun Burma ti ih kawh cu nuam deuh in an thei ih Myanmar ti ding cu a hamkhaa deuh an ti hrih lai.

“Kan rampi hmin ih buai hi lolam tuk thilah nan ruat ding asinan Myanmar tiih kan kawh tikah kan rampi lungrualnak le kan dikzia a langter” tiah Foreign Minister Wanna Maung cun US envoy Joseph Yun hnen ah May 2011 ahkhan a rak sim ruah dah. Kumzabi 19 hrawng ahkhan ramsung ih minung pawl cu komaw lo in a dangdang ah kau zet in kan rak umkhawm, khawsa ih 1948 ah British pawl hnen ihsin zalennak kan rak ngah tikah Myanmar tiah kan ram in kan rak thleng. Ramsung ah tlangpar mi 135 kan” um.

Kawlram kan timi kan ram hin a hmin pahnih “Burma” le “Myanmar” hi a rem ti dandan in a ram mipi khalin an hmang ih leitlun pawlkom le cozah dangdang khalin an kawhdaan a dang aw cio. Australia le European Union ahcun Myanmar tin an hmang.

Cuvek thotho in, Amnesty International cun Myanmar tin an hmang asinan Human Rights Watch ve thung cun Burma a tin a hmang. Cutin, phun dangdang in an ko cio. The New York Times cun 1989 ihsin Myanmar tiah a rak ko ve thok. Cule, The Associated Press pawl khalin 1998 ihsin Myanmar tiah an ko ve. Cucing in BBC cun Burma tiah a ko lai thotho.

US ih sumdawnnak lam hotu pawl tla cun a cancan ah Myanmar tiah an ko. Tui zarh tiang cu The White House pawl khalin Burma timi hmin hmang dingah an lungkim hrih cu a si.

Comments

comments

Comments

%d bloggers like this: