Bulpak Hmin Ngandan

CC CoverBulpak Hmin

Bulpak hmin timi cu thil pakhat, bulpak hrangih sakmi hmin pawl an si.

1. Minung hmin

tt. Zawl Tling, Tenglam,,,

2. Miphun, biaknak, tong hmin

tt. Chin, Christian, Mirang,,,

3. Khua, ram, hmun pawl hmin

tt. Falam,  Myanmar, Kabaw,,,

4. Khur le ram hmin (Tlang, tiva, tvp)

tt.  Runva, Zinghmuh,,,,

5. Inn, cetzung le ca pawl hmin                   –

tt. Bible, Panasonic, Zilthli,,,,

6. Pawlkom, Zuamawknak, Ni/thlar hmin –

tt. Lailun Foundation, World Cup, January, Sunday,,,,

A. Hih Bulpak Hmin pawl kan ngan tikah

(a) Minung hmin sullam nei tongfang kom lo ding; Kom ih sullam nei a si ahcun kom ding (theih); Kom lawngih sullam nei a si ahcun kom ding. tt.  Hlawn Dawh Thang, Simthli Hran Thang, Malsawm Kim. tvp…

Simfiangnak: ‘Hlawn Dawh Thang’ timi tongfang pawl ah hin  ‘Hlawndawh’ tiin maw, ‘Dawhthang’ tiin maw kan ngan ahcun sullam nei lo cafangkom a si ruangah adangte’n ‘Hlawn Dawh Thang’ tiin ngan tengteng a tul.

‘Simthli Hran Thang’ timi ah hin ‘Sim le thli’ hi adangte’n kan ngan asile sullam an nei veve thei nain kom tikah ‘Simthli’ timi (thli hmin) sullam nei tongfang thar a suak. A saktu in ‘Simthli’ suankhanin a sak ahcun ‘Simthli Hran Thang’ tiin ngan ding a si.

‘Malsawm Kim’ timi ah cun ‘Mal le Sawm’ hi then a theih lo.’Malsawm’ ti lawngah ‘thlawsuah’ ti sullam a nei. Curuangah sullam neitein ‘Malsawm Kim’ tiin ngan ding asi.

(b) Sanman Hmin Ngandan

1.       Hmin ih awsau a um tikah awphei (vowel) pahnih thuah hnakin a dungih awtung (consonant) pakhat beet ding.

tt. Sung Tin Veel siloin Sung Tin Vell, Mang Lian Zuul siloin Mang Lian Zull, Khuang Laan siloin Khuang Lann. (Cangantu ih uardan a si)

2.       Hmin hi hitin teh ngan sehla- RamDuhThang, MangLianZull, SuiLianMang, TengLam, — kan lungkim le a cang thei.

(c) Adang Bulpak Hmin pawl cu a tlangpi thu in, kom ih ngan an si deuh. Then ih sullam nei a si ahcun then theih a si.

tt. Zinghmuh, Falam, Sim Dihai, London, New York,,,,

Simfiangnak:

‘Sim Dihai’ timi hi a khua hmin ngaingai cu “Dihai” a si ih pahnih a um ruangah a hmaiah ‘Sim’ an beet tikah sullam nei tongfang a si ih adangtein kan ngan cu a dikmi a si. Adang ‘Dihai’ thawn a bangawklonak dingah a si.

B. Bulpak Hmin ngan tikah theih tul thupi pawl

1.   Bulpak Hmin pawl kan ngan tikah tongfang pakhat ciar hrangah cafangpi (Capital letter)  ih ngan thok tengteng ding. (Kan hmang rero zo. Bulpak Hmin theihfiang ahcun a har lo. Bulpak Hmin pawl kha zohsal sehla, Cafangpi ngandan khal ah)

2.   Bulpak Hmin pawl cu siar sual lo dingin le a sullam hlo lo dingin adangte’n ngan ding asi. Hmaibet (prefix), dungbet (suffix) pawl le tongfang dang thawn kom lo ding asi.

Simfiangnak:

Hih hmaibet le dungbet kan timi pawl cu anmahtein ding thei lo, tongfang dang thawn kombet asile cui tongfang sullam hlo cuang lo ih sullam nei tongfang thar suahtertu thufang pawl an si.

(tt.  nak, tu, .tvp) tt  zum – zumnak, zumtu,.tvp

C. Bulpak Hmin ih kan kom sual theu mi pawl (ih, in, ah)i

Hih tongfang pawl hi Bulpak hmin ah kan kom sual theu ih tongfang thar a suah tikah sullam an nei nawn lo.

(a). ‘in, ah’ Hmun le tikcu khihhmuhtu (Preposition or Post-position) ih kan hman tikah a hmaiih tongfang thawn kan kom sual theu ih, ahleicein, Bulpak Hmin thawn kan kom tikah tongfang thar a suakmi in sullam a nei nawn lo.

Simfiangnak:

‘Tahan in ka ra’ tiih ngan ding khi ‘Tahanin ka ra’ tiin an ngankom ka hmu theu. ‘Tahanin’ tiin kan kom tikah tongfang khat (one word) ah a cang ih sullam a nei nawn lo. Hih ‘in’ hi ‘Tahan’ thawn kom ding a si hrimhrim lo. ‘Tahan’ cu hmun a si ih ‘in’ cu hmun khihhmuhtu a si. Kom ih ngan ding a si lo. Khihhmuhtu a si ruangah adangte’n a kiangah ngan ve ding a si. ‘Tahanah ka feh’ tivek khal hi a dik lo. ‘Tahan ah ka feh’ tiin ngan ding a si. ‘ah’ cu hmun khihhmuhtu a si ih tonghran dangdaang an si veve. Kom le an sullam a hlo veve ih tongfang thar in sullam a neih lo ruangah kom loin adangte’n ‘Tahan in, Tahan ah” tiin ngan ding an si.

(b) ‘ih’ tongfang hi neitu sinak khihhmuhtu le tuahtu (doer) sinak khihhmuhtu ah kan hmang theu. Hmin ah komcih loin, adangte’n ngan ding asi. Kan kom sual theu.

tt.  1. Hih cauk hi Rev. Ram Duh Thang ih nganmi a si. (ih hi tuahtu khihhmuhtu a si) Mirang tong ih by (agent) vek.

2. Rev. Ram Duh Thang ih inn ah ka leeng.

(ih  hi neitu sinak khihhmuhtu a si) Mirang ih (‘s, of) vek.

Simfiangnak:

‘Rev. Ram Duh Thangih’ tiin kan ngan sile ‘Thangih’ hin sullam a nei lo. ‘Thang’ timi Bulpak Hmin a hlohter. Curuangah adangte’n ‘Thang ih’ tiin ngan hi theih sual a har ih a thabikmi a si.

(c) ‘in’  khal hi tuahtu khihhmuhtu (subject indicator) ih hman a si ahcun adangte’n ngan ding a si thotho.

tt. Saya Thawng Lian Sum in hitin a ti,…

Simfiangnak:

‘Sumin’ tiin kan ngan le sullam a nei lo. ‘Sum’ timi Bulpak Hmin a hlohter. Curuangah adangte’n ‘Sum  in’ tiin ngan ding asi.

(d) ‘cu’ khal hi ‘in’ thawn hmandan a bangrep, “cu” hi cu adangte’n kan ngan cio zo a bang.

Sawmnak:

Hih ‘ih, in, ah’i pawl hi hmaibet le dungbet  an si lo. Cakalhmang ih mahte sullam nei tongfang an si. Khihhmuhtu (preposition) an si caan ah cun Bulpak Hmin thawn kan kom sual theu le kom nawn loin khihhmuhtu an si ruangah an khihmuhmi hmin (noun) le hminsawng (pronoun) kiangte ah adangte’n ngan ding an si.

Footnote:i’ retmi hi cahmai dang ih “Chin Cangandan le Consistency” timi thulu ah hih ‘Ih, In, Ah’ thu hi ngan telh a si.

Hminsin: H. Sui Lian Mang ih nganmi Chin Cakalhmang (Chin Grammar) cabu sungta a si.

 

 

Comments

comments

Comments

%d bloggers like this: