Bualpi Khua Ihsin Acozah Tlunah Daan Celek Ve Ding Kan Si.. Editorial

14196040_1748025175456938_1766245714572899926_o
Editorial…

Tulai Chin mi pawl ih thinlung thamzettu Bualpi khua thu hla ah Chin ramkulh acozah, Chin Ramkulh Chief Minister pawl soiselnak tam zet hmuh ding a um. Bualpi zuk zohnak le kiangkap titi relnak men ruangih thuhla theilo vaivuan khal tam zet a um aw ti a theih thei.

Rampi hrilawknak ah NLD party ih zatek tamsawn dinhmun thawi nehnak a cohnu; ‘THLENGAWK CAAN’ timi catlang thawi mipi hnen ih sawm ngiarnak a tuah mi pawl a tak ram in luhpi vivo tikah, kan mah mipi lala in kan hril mi kan Kawn hi a rit kan ti deuh lala in a lang. ‘In ruun aw tiih autu pawl in kheng bet aw an tisal’ ti vek dinhmun kan thleng.

Bualpi khua thu ah acozah an mawh, mipi an mawh, kiangkap pawl an santlailo, media pawl in an au pilo; thusuhnak dangdang le sannak dik le diklo pawl cu athlirtu pawl ih thlirdan in a danglam cio dingih sim cawk le zohfiangnak ding hrang caan in a rel vivo lai ding mi a si.

14232046_1748026585456797_8108826874288822022_oAcozah lam ih thlir ahcun acozah lam ih thupek cu rampi pakhat ih hmasawnnak tuahtu le sulsutu an si ruangah an tuah a tul mile an mai liang parih thum aw mi a si. Mipi lam ih thlir ahcun daan zawh kim lo siar cawk lo lakih hi hmun kherkher an hril tiin tan san thazet khal a um thei ko. Himi lo daan le mawhphurhnak lam zawng khalin simfiangnak tla tampi a um ko ding.

Acozah le mipi karlak thuhla pawl buaipitu ih mawhphurhnak khal tampi a um ko. Hivek lai caan ah dokalhtu Party tuum pawl ih an caan tha le mipi an rak hip theinak caan a si. Asinan kan Chin ramkulh ih Party pawl ih auaw theih ding a mal zet. Ziang ruangah an au duhlo timi ah, san tha zet cu a um ko ding. Asinan dinglai Party pawl ih lamzin a dik, diklo, a sual, suallo mi pawl a dunglam ihsin rak hottu ding le a ralai ding mi rampi hrilawknak hrang tu ihsin tiimlaam cia ding mi cu an si.

NLD party pawl in, Chin mi in rak nekrawt tla a si thei, lole kan dinhmun covo ding in palbet tla a si thei, himi caan ah rorel inn piih nehnak kan co lo ruangah zianghman kan titheilo ti men ding a silo. Chin mi aiawh ih dingngamtu party an sinak tilang in rorel innpi thleng ding koih in ausak theitu an si thei ding khal hi duhthusam zet a si.

Bualpi khua ihsin acozah in daan thawi mipi a vuaknak hgilhloin an mah lala parah daan hmangih cangvai thei dingin ramsung media, zatlang pawlkom, kawhhran le mipi pawl kan tankhawm khal a tul a si.

Chin ramkulh ih Chief Minister pa pariih kan thinhengnak le tongkam sia kan burhnak men in rorel inn pi ihsi thusuak a thleng danglam lo ding. Chin mipi parih an thlakmi daan dik vekin kan ni mipi khalin an parah daan dik thawn cangvaihnak tilang ngam dingin timtuahnak nei ding kan si timi hi zir bet ding kan si.

Hitivek caan, thudik pholangnak harsa a um caan ah ramleng suak Chin upa pawl ih ruahnak le thazaang, mipi hnenih thlabar hnemnak aanka pawl le hmalak danding pawl fah ding khal hi a thu pi zet.

Bualpi khua ruangah Chin (Falam) pawl hi mi vanduai sinak kan co mi a si cuanglo. Mi hualvantha si dingin daan hmangih cangvaihnak kan zir theinak ding hrang le, kan cozah hmangih kan duh mi pawl daan hamngih kan ngah theinak ding caantha Pathian ih lairelnak a si.

Curuangah thuhla fiang le dik thu mumallo in a zuk zohnak le kiangkap ih zangfahnak awkam, lamkhattang ih auaw men ihsin acozah, mipi pawl hi soisel mai hlah uh si. Zir ding mi pawl kan zir theinak ding hrangih khuanu ih rem ruah mi pakhat asi ruangah kan thazaang cahnak ding hrang ih karbak pakhat kan kai rero lai a si.#

(Visited 416 times, 1 visits today)

Comments

comments

Comments

%d bloggers like this: