Britain Ram Hril Aw Cing Ding…SBT

Russia in A Thu Tiam Sut Sal Tum

Mizan sunah Russia Foreign Minister, Sergei Lavrov cun Thuthangca latu pawlih hnenah US in a kil him  awknak dingih Missile Defence System a tuahbet vivo a si ah cun  US leh Russia in Nuclear ralthuam an neihcia mi timal tlang dingih rualrem awknak thutiam an rak tuahtlang zomi ihsin  Russia cu hnuk dawkaw salin a thutiam a sutsal ding a si tiah a sim.

Russia Foreign Minister, cun  Nuclear ralthuam neihcia mi timal dingih thutiam kantuah pimi US in  a kil him awknak ding  ralthuam a tuah bet thotho a si ah cun  Russia khalin   Nuclear ralthuam a neihcia mi timal dingih thutiam a tuah zomi sutsal dingin zalen nak a nei ih,  Russia cun US thawi an thutiam tuahmi parah zumnak hnget a nei ngamlo ding a si  a ti.

Relzo vekin leitlunih Nuclear ralthuam nei tambik veve US leh Russia cun an Nuclear ralthuam neihcia mi pawl timal tlangdingin rualrem nak thutiam  kandung thla ah khan an rak tuah zoih, kha mi ah khan  Nuclear ralthuam an neihcia misung ihsin 1.550 veve hlon dingin leh Nuclear ralthuam phurnak Motor khal 8oo hnakih tamlo veve nei dingin an rak tiamkamaw zo.

Britain Ram Hril Aw Cing Ding

Mizan sunah Britain ram Prime Minister, Gordon Brown cun  Britain ram Parliament cu  hmaithla May ni 6 ah hrilawk nak neih a si ding tiah, London khawpi ih  a umnak 10 Downing Street kawtka ah a puang. Himi thu an puan nak hmunah a Cabinet Minister, pawlkhal an telkim thluh. Himi hlanah Prime Minister, Gordon Brown cun an ram Siangpahrang nu cu  Bukingham Palece ah Minute 20 sung a kawm hmaisa ih  Parliament dinglai tthiat bal dingin a ngen.

Tui ttum  Britain ram hrilawk nak dingah hin an ram sumpai dinhmun, Tex lakdan leh bulpak hnattuan nak sumpai dinhmun pawlhi an thu cuh awk dingmi bikih ruah a siih, Prime Minister, Gordon Brown cun Britain ram,cun  nasa zetin tthanso nak lamzin a pan rero laiih, himi tibuai zawng leh kalhki zawngih thilti lo dingin  an ram mipi pawlcu a cah.

Hrilawk nak ding tikcu a puan ihsin Prime Minister, Gordon Brown cun Campaign khal a thok cih tlukih ruah a siih, a kaih hruaimi Labour Party cun  lamzin tinkim ah diknak leh  thanso nak lamzin a zawh vivo ding a si a ti.

Himi laiah Conservative Party  hruaitu David Cameron cun  Britain ram tlasia duahdo tundin tthatsal nak dingah cun a tirte ihsi ban khurlaih sal a tul a si tiah a sim ve thungih, tuittum kan hrilawk nak dinghi Briatain ram hrilawk nakih pawimawh bik a si ruangah an Party mipi pawlcu Britain ram mipi hnenah  thildik leh zumtlak thu thlensuak tengteng dingin a cah.

i an hrilawk nak dingah hin  an ramih Party tumbik 3 pawlcu  Live in  Debate tuahter an si dingih, hiti vekih Live Debate hi an voikhat tuah nakding a si, Labour Party hi Britain ramah hin kum 13 sung rorel nak a cozo ih tuah hin  House of Commons ah Seat 48 a nei.  Leitlun  Politician  leh ramdang mithiam pawlin an thlir nakah tui dinhmun ah  Britain ram  Politics dinhmun  an hmuhdan ah cun Party pakhat lawngin Cozah nak tuahthei ding khawpih cak an umlo men thei tiah zumnak an nei.

Iraq Bamb Puak

Mizan sunah Iraq ram khawpi Bagdad ah Bomb a puakih minung 10 an thiih, midang ziangmaw zatin hriamhma an tuar. Hi Bomb puah nak hmunhi Shia Muslim  pawlih umtam nak hmun leh Shia Mulsim bawlpu, Maqtada Sadra ih pawl dinmi Mehdi Army pawlih um hmun khuarnak hmun ah a siih, hi Bomb cakzet puak hin Restautant leh minung umnak Inn tamzet a tisiat.

Kandung colh nisun khalah Bagdad khawpi ih Bomb puakah minung 41 an rak thizo. an ram hrilawk hnu ah boruak a ttha deuh vivo dingih ruah a si laiah  tui naite hrawng ah Iraq ramah hin buainak leh bomb puak leh thah nawknak tamzet a thleng.

Iran in UN Member Thu Thlun Tum Lo

Mizan sunah Iran Foreign Ministry, Thupuangtu, Ramin Mehmanparast in Thuthangca latu pawl a kawm nakah an ramin Nuclear thilri a tuah ruangih ramdang pawlin hremnak pekbet vivo an tum a si khalle Iran Cozah cun a hna tuanmi a colhsan cuanglo dingih ramdang ih hremnak pekbet nakruang menah a thil tumtah mi a ttulsal cuanglo ding tiah a sim

Iran Foreign Ministry, cun UN Member ram pawlin  Iran hremnak ding a tharih  an ngaihtuah rero micu a taktak ih an hmang a si khalle Iran cun a mai ramsung ah zalen nak a neiih, ramdang  duhdan thun dingin  Iran in leiba a neilo tiah a sim.

Relzo vekin Iran in Nuclear thilri a tuahmi bansan a tumlo ruangah UN Member ram pawlcun  nasa sinsin ih hremnak pekbet an tumih  UN Member ram lakih  Iran hrem nak pekbet duhlo bik tu China khalin tu ah cun UN Member ram pawlih duhdan thlun dingin remti nak a neizo.

Pakistan Ih US Embassy Ah Bomb A Puak

Mizan sunah Pakistan ramih  Lower Dir District ih Timetgara khua leh  Peshawar ih US Consulata cu  zoti theih lo misual pawlin bomb leh meithal thawn an kap ciamco ih, Minung 3 an thi. Himi ih hlei ah himi kiang khua pakhat ih Politics ruangih minung tongkhawm awknak hmunah misual pawlin minung 38 an that.

US Consulate  kiangah Bomb voi 3 puah a siih, Palik pawlin an sim nakah Bomb puah tupawl hin  an ram Cozah tuah tlang nakih  rorel tubik Pash Awami National Party pawlih lamzin zawhlai tibuai ih an hotu pabik thah an tumih, Asinan misual pawlhin an tumtah vekin an hotu pa bikcu an that ngahlo tiah an sim.

US Embassy thupuangtu, Ariel Howard US Embassy cu bomb leh meithal thawi kah a si tiah fiangten an simih, Asinan himi thawi pehparaw  in thil pawimawh dang an siatsuah micu fiangten simtheih a si hrihlo tiah a sim. Himi US Embassy an kahnak ah hin  a kiltu palik pawl thawn nasa zetin an kapaw ih,   minung 3 an thiih, mithi pawl lakah US micu an tello tiah an sim.

Misual in South Korea Lawng An Kai.

Tihni sunah khan  South Korea lawng Samho Dream an timi Zineen Oil thlet fim lomi Tonne 3,00.000 phurtu cu  Iraq ram ihsi United State panih a feh laiah Indian Ocean ah Somalia lawng rukhmang misual rual pawlin an rak kaiih, himi lawng leh a minung pawl runsuak dingin South Korea cun raldo nak lawng leh lawng ralkap ziang mawzat a kuat lai.

Himi lawng sungah hin South Korea ram minung 5 leh Phillipine ram minung 19 an to ih, an zaten a lawng thawn misual pawlin an hrenglai ih, tuisun tiangah South Korea ralkap pawlhin an hmusuak thei hrihlo. Asinan   South Korea Foreign Ministry  in thu a suah nakah himi lawng leh a minung pawlcu  Somalia ram tipi kap an thlen hlanih runsuah tengteng an tum thu an sim.

BBC in a sim nakah himi lawng leh a minung pawl runsuak dingih raldo nak lawng leh ralkap kuat hi a thabik lo dingih buainak leh  harsat nak a thlenbet sinsin a zum thu   BBC cun a sim. Himi lawng leh a thilri phurh mi man hi Dollar Million 170 man hrawngih ruah a si.

Hamas Pawlin Isreal Zoh Men Tum Lo

Theihcia zo vekin  kandung zarh hmaisa ih Isreal ralkap leh Palestinian  pawl buainak ruangih Isreal ralkap pahnih an thihnak  Khan Younis khua cu  Isreal ralkap pawlin Raldo nal Vanzam in rocket in voi 4 an kapih, Palestinian  Tapung  Hamas pawlin an thu hnuaiih an retmi Gaza Strip khal Isreal ralkap pawlin  raldo nak Vanzam in  voi 13 an kap.

Himi ruangah Hamas pawlcun tuisun ah thusuah nak tuah in Isreal thilti dan cu Palestinian  cun a zoh menlo dingih, Palestinian Cozah in Isreal hnenih kut a thlak a si khal len  Palestinain pawlih duhdan silo in Isreal ih duh hril nak ruangah a si ding tiah an tarlang.

Isreal cun Gaza a kah naksan cu  Palestinian mipi harsat nak ding silo in Hamas Tapung pawlih ralthuam tuahnak  factory kahsiat an tum ruangah a si tiah an sim. Asinan Hamas official pawlcun Isreal  ralkap pawlin  Metal Workshop, Farm, Milk, Factory leh  Hamas Military Wing ram pawl an kapsiat tiah an sim.

Isreal cun Gaza a kah naksan cu Hamas pawlin rocket hmangih Gaza ihsi Isreal ram thlanglam Hof Askol an kah ruangah  kan kah venak a si tiah an simve. Himi laiah Isreal Cozah cun  Palestinian pawlkom dang Hamas pawlih huat zetmi Fatah Senior Official, Abbas Zaki leh Palestinian  midang minung 11  an kaih micu  Bail (Aa Mah Khan) in a suahsalih, Hi pawlhi kandung zarh colhni ah khan   Jerusalem leh  Bethlehem khaw karlak ih Isreal ralkap pawlih Chekpoint paltlang tumih an feh laiih an kaih mi pawl an si.

(Visited 37 times, 1 visits today)

Comments

comments

One Comment

  1. Salai Vanruah says:

    An buai ruri, …
    Kan buai ve tawk nasa ko ti-uh law,
    Leitlun nun ngai hi!

Comments

%d bloggers like this: