BLACK LIBERATION THEOLOGY LE CHINMI

hngaka

BLACK LIBERATION THEOLOGY LEH LAIMI

By-Nelson Hngak-M.Th.

“Liberation tih cafang hi a mawi in a duhnung ih a hleice in kan ni Laimi hrangah a duhnung hleice in ka zum. Liberation tih cu zalennak (freedom) tih a si ih Black liberation theology asilen midum zalennak a si ve mai. Hi zalennak Pathian thu cun thlarau zalennak (lawng) siloin taksa zalennak thu a sim.

Bible tlawng hrek khat ah uar takih zir a si lai ah tlawng hrek khat ah a hleice in Pentecostal tlawng le kan ram Bible tlawng tamsawn ahcun zir a si lo. Kan dinhmun zoh in laimi cun hi liberation theology hi kan zirfiang le kan tulmi bik a si in a lang.

Hnam dang pawl cun Pathian thu hi thlarau zalenak le malsawm dawnnak lawng siloin, taksa zalenak le malsawm dawnnak ah an hmang. Cucu, thukamhlun Pathian thu in a tummi tak le thukam thar Pathian thu in a ti famkim mi cu a si.

Liberation theology cu black liberation theology tih le Latin American theology ti ih cihnih ih then a si. Tuitum ah, kan cahmai a tamtuk lo nak dingah black liberation theology lawng kan zoh ding.

BLACK LIBERATION THEOLOGY HI ZING A SI?

Khawvel thuanthu kan zoh a si le, midum pawl cu minung vek ih zoh le siar an silo ih rannung vekih zoh le zuar an si. USA president Abraham Lincoln feh tlang in sal (slave) sinak ihsin zalennak pek an si. Asinan, ram thuhla, khawtlang le kawhhran ah covo le zalennak zianghman an nei cuang lo. Mirang pawl ih palbeh in an um. Thuthangtha eng in America khawmualpi a vah en hnu kum zabi (19) tiang khalah zalennak an hmu thei hrihlo.

1968 kum ah US ih mi dum zumtu black leaders, midum kawhhran hruai (black church leaders) pawl cun black theology cu kawhhran mipi hnen ah uar takin an tlangau pi. Hi caan lai ah midum pawl cu zumtu sihmansehla, mirang kut hnuai ah an um ih hmuhsuam an si thotho. Black theology ih thuken cu “Midum Pathian thu cu midum pawl zalennak a si.

Midum pawl dinhmun niam tak cu Bawipa in a fapa Khrish phuan awknak eng ah in hmuh sak ih cumi hlei ah midum pawlpi (Black Community) in thuthangtha cotlak le dawng tlak ih an ruahawk theinak ding a si.

Midum Pathianthu cu dumnak Patkhian thu a si. (Black theology is theology of blackness). Hi Pathian thu hi minung kan si (ve) theinak in nemhngehsak tu a si hlei ah mirang pawl phun hnam (White racism) mi hmuhsuam le palbehnak ihsi in hruaisuak tu a si” an ti. Jesuh zuk khal a dum in an tuah.

America ih Negro zumtu pawl cun kan Bible Suahhlannak (exodus) an siar tinten Israel miphun vekin an hmu aw ih mirang pawl cu Egypt Faro siangpahrang le a ralkap vekin an hmu theu. Pathina in Israel miphun Faro siangpahrang kut hnuai ihsin a rundam ngai a si ahcun kan ni khal in rundam ve a cu an ti.

Pathian cu midik a siih mi zawnzai zangfahtu le tungdingtu a si. Pathian cu zalennak Pathian a si an ti. Cumi ih rahsuah cu midum pawlpi tanrualnak, an miphun dinsuah theinak ding hrang thihngam ih hmainawr nak le zumnak ih hngettak ih din a si.

Pastor le kawhhran upa pawl cun an member pawl cu an miphun zalennak ding hrang ah thutha (mirang dodal daan ding thu) an sim. An khawtlang hruaitu (community leaders) pawl in kawhhran thusuak an thlun ih a tul daan vekih cang le do ding in an tim an tuah.

Pathian in zalenak in phuansak zo an tiih, pastor pawl in an pastor tuanpi mirang pawl cu an docih ih cuvek thotho in kawhhran upa pawl khalin an tuanpi mirang elders le deacon pawl cu an dokalh cih bet. Mino, zumtu le zumlotu ral a tho cih, a hleice in Martin Luther King Jr, Dexter Avenue Baptist Church pastor ding ih an nemhngehmi cun an miphun zalenak hrangah pastor hna tuan loin, 1955 ihsin 1968, a thih tiang in mipi zalennak hruaitu hna a tuan.

Jr King an kahthat hnu 1968 ihsi tla cun New York khawpi ah kangmei le buainak phunphun a suak. 1968 ah beihpi thlak in zalenak an cuh. Cutin a rampi US a cozah cun midum pawl hrang zalennak famkim a pe. Khawtlang ah, tlawngin ah, Biak inn ah le hmun tin ah midum le mivar thleidaannak a um nawnlo. Cabuai khat ah rawl an kil tlang ih tthilhthiam tlangin Bawipai zanriah sacrament an kil tlang.

Tleidaannak um loin midum le mivar nauhak pawl cu zalennak puanzar hnuai ah nute an cang, an lek an hni…Fala le tlangval pawl cu New York tualrawn ahcun an neih rawi aw ih hmuhsuamnak um loin innsang an din. Bawipai tuah le pekmi an ram ah khawvel hi ziang a si tiin nuam an cen a si bik ke. Tu ahcun an mah hmuhsuamtu mirang pawl ih lutlun ah an to tariai. Midum Barack Obama America president a si ta. Martin Luther King Jr ih sunmang cu a tak in a thleng ta a si.

Tuihlan kum 400 liam ceu ih minung hman ih an siar lo, rannung zuar ih an zuarmi Negro midum pawl ih kawhvel lal tohkham (King sat of the world) an cuhawknak lamzin hi, hi kan cennak leilung a cem hlan tiang ih thuanthu duhnungbik le mawibik a si ringring ding. An dinhmun hawn dawt ve mai cu kutdawhpa ih milian pai dinhmun a tuan bang zia ruat lo ih a dawt kan hluan ding.

Kan relzo bangin midum pawl in Suahhlannak an siar tinten an mah an hmuh aw ih mirang pawl cu Faro le a ralkap vekin an hmu. Cui lungput cun midum pawl thinlung ah hmun thuk tak a khuar ih zumnak (faith) fektak a hring suak. Cui zumnak cun mirang pawl palbehnak hnuai ihsin a hruaisuak ih zalennak sangka a onsak. Midum pawl in Bawipa rinsan ih zumnak thawi zalennak an sual hi Liberation Theology in a tumbik cu a si.

2. LAIMI IN LIBERATION THEOLOGY KAN TUL

A tlun ih kan sim liberation theology in a sim duh bik cu Pathian thu cu zalennak (Freedom or liberty) ti a si. Asinan, kan ram le miphun kan zoh le zalennak thawi pehpar aw in Pathian thu cun HMUAR zianghman a neilo ti a fiang. Kanram cozahpi Politics a tluksiat ruangah kan miphun le ram Politics cu tuini tiang thothei loin a tlu sia. Cui politics tlusia cun kan ei hawlnak a tisia, cui eihawlnak tlusia cun kan nun daan (Ethics) a siatsuah, cui ethics tlusia cun sakhua mak ih thlaklonak a thlen, cui sakhua mak ih thlaklonak cun ram le hnam siatralnak khur ah a hruai.

A um zia cu ram kaihhruainak diklo ruangah retheihnak a thleng. Cucun rukruk, thuphan rel le hlawhhlang tiang a thlen, cucun Pathian zahlo le ttihlonak a hring, cucun kekdarh, vahdarh le hloralnak ah a hruai. A tlun ih kan simmi khi tu (present) ih Laimi dinhmun cekci a si.

A rampi cozah ukawk daan le Laimi dinhmun kan zoh a si le Laimi cu tomen ding kan sinawnlo ti a fiang. Liberation theology cun zumtu cu palbehnak hnuai ih a um ahcun a palbettu do(war) le thleng (change) theinak covo (right) lole zalennak (freedom) a nei a ti. Cui palbehnak pawl cu:-

1. Miphun palbehnak (Racial oppression )

2. Sakhua palbehnak (Religion oppression)

3. Politics palbehnak (Politics oppression)

4. Eihawl palbehnak ( Economic oppression)

5. Vantlang nun palbehnak ( Social oppression)

6. Kiang le kap palbehnak (Environmental oppression) tih an si. Hi palbehnak pawl hi kan ram le miphun tlun ah an thleng theh.

Laimi in tui dinhmun ah ziang Pathianthu kan tul tih hi fiangte ih kan zoh a cu Latin liberation theology phei cun retheinak in thlentu cu ziangthil a si khalah zovek minung, cozah an va si hman ah kan namcim a tul an ti. Laimi in kan sinak (Identity) leh kan dinhmun (position) kan theihfiang a cu. Tu ah mirethei mizo to hmuah ttih miphun maw kan si, siahhlawh bang ih thuneihnak neilo miphun maw kan si, sal (slave) bang ih zalenak covo (right) nei lo miphun kan si tih kan theihawk a cu.

Pathian in a mi le sa zumtu hnen ih zalennak a pekmi hi thlarau lam zalennak lawng a silo ih taksa zalennak khal a si ti hi thukam hlun le liberation theology an rel uar bik cu a si. Cucu, Israel thuanthu (Pathian in Moses hmang in Israel mipi, miphun dang palbehnak hnuai, Egypt Faro siangpahrang, ihsi a hruaisuahnak) in fiangten in sim. Pathian in Israel miphun Aikupta ihsi a hruai suahnak hi thlarau lam hruai suahnak lo le rundamnak (spiritual salvation or redemption) a khihhmuh lo. Taksa zalennak a khihhmuhnak a si. Bawipa in thlarau zalennak le taksa zalennak in phunsuah sak zo a si ahcun tu ah zo in, ziangin kan zalennak in kham ti hi kan haisuah ngam a cu.

Zumtu cu a sia a tha ih tuahtu ding, thim eng ih tuahtu, mitlu kai dingtu, thudik, thutak dinpitu ding kan si ti Bible in fiangten in sim. Cuihlei ah zumnak cu thilti tello cun um zia nei lo, thi a si zia James cakuat ah kan hmu.

Tu ah Pathian in ziangtuahtu lo le ziang tuantu ah in duh ti thusuhnak hi zumtu nun ih a pawimawhnak laifang a si a zum um. Laimi in liberation theology thlalang ih kan zoh awk hlan ahcun kan sinak a se lam a tha lam in siseh, kan tuan ding le tu (present) ah ziang kan tul tih kan hmu ngaingai thei lo ding. Ram le miphun hrang thla kan cam lawng a tawk lo. Kan mah kan pawhsuah a cu. Cun Laimi a hleice in fala le tlangval lakah Bawi Khrih rinsan ih ram le miphun hrang ih dinsuak ngam ziangzat kan um?.

Midum (Negro) pawl cun ziangtik hman ah mirang pawl cu kan neihlo ding tih thei hmansehla Bawi Khrih thawng cun tih theilo zianghman a um lo ti zumnak fektak nei in an zumnak cu thil ti in a thlun (an do kalh) ih zalennak ropi an ngah. Tu ah khawvel lal tokham ah an to ta. Liberation theology cun lo palbettu cu zo le ziang an va si khal le na do le na nam cim a siang. Bawipa Khrih rinsan ih kan ram le miphun hrang thih le thih nun le nun tiih Bawi Khrih zalennak in phuansak zo mi cu kan sualsuah a tul hrimhrim. Hnam dang cun Pathian thu hi an ram runsuahnak le lennak ih an hman lai ah Laimi in ziang nak ah kan hmang ve ding? Laimi na thawh a cu thlag lo maw? Bawi Khrih ih zumnak thawn in na ram le na miphun hrang zalennak sual thlang law ti hi liberation theology ih in sawmnak aw neitabiknak cu a si. “Tho uh si la dinsal uh si.”(Nehemiah 2:18).

Note: Hi Black Liberation Theology le Laimi timi ca hi Jemy Mawite in Chindwin Magazine suahnak ding hrang ih paisa Rs. 500/- in rak kuatmi ih suah a si.

Martin Luther King Jr Birmingham thawginn ih a miphun hrang a tuannak ruangih khai thah ding a si lai ih a miphunpi pawl hnen ih a cakuat mi:-

Kum zabi (8) lai san ih Profet pawl an khua le an ram suahsan ih Pathian in a simmi thuthangtha an miphun pawl hnen ih an phuan bang in kei khal kan ram ih zalennak famkim a hmuh theinak dingah zalenak sual in ka suahnak ihsi a hlatnak hmun Birmingham thawnginnpi sungah thircitcin thawn ka um. Cun Paul in thuthangtha ruangih a suahnak khua Tarsus suah san ih Macedonia ram ih a fehsawn bang in kei khal kan miphun zalennak ding thuthantha phuangtu ding le phurtu dingah ka tuar ve a si.

Jr King cun a ram le a miphun hrang a tuarnak cu Pathian kawhmi thukam hlun prophets pawl bang in Pathian kawhmi bang in a ruat aw. Miphun zalennak sualsuah cu rawngbawlnak karbak hmaisabik ah ruat in a nun liam tiang an miphun zalennak hrang a tuan.

Kan Pastor le kan Doctor pawl lakah Dr. Jr King bang ih Mah le nun liam tiang ih mah le miphun hrang HRUAITU hna tuan ngam ziangzat kan um ding?

Tui kan dinhmun ih Laimi kan tulmibik cu hruaitu tha si in a lang. Phun hnam dang kan zoh a si le hruaitu pahnih khat ruangah ram mipi le an te fa sin tiang zalennak an ngah ti khawvel thuanthu in, in sim. Laimi cu pa neilo nauhak bangin runtu kiltu hruaitu neilo anhai in a um. Runtu a tul. Kan ram runsuaktu dingah Bawipa in hruaitu tha in pe ding tiih thlaza cam in Laimino tho thlang uh si.

Relkhawm ding:

1. Ziang ruangah pastor, evangelist le zirhtu saya pawl in liberation theology (zalennak Pathian thu) in sim, in zirhlo?

2. Zumtu raldo a that le thatlonak relkhawm sehla.

Sources:

1. 20th Century Theology

2. A Theology of Liberation

3. A History of Christianity In The United State and Canada

“Bible hi NUN pi tlak ih ka ruah bang in THIHPI tlak ah ka ruat”.

(Visited 56 times, 1 visits today)

Comments

comments

2 Comments

  1. Theihsual silo in ngan sual a si ding ka zum. Jr. King kha “Khaithah” a si lo, kapthat sawn a si.

    A canganmi a ‘tha ka ti tuk.

    Lungawi.

  2. Dear Kunglal,

    kan palhnak in rak sim ih kan lungawi.
    Kan rak tthin/thleng sal zo. Ngan sual mi a si.

    CT

Comments

%d bloggers like this: