Binladen Fapa In Iran Ram Suahsan

by-Pasum
January 17, 2009.
 
Osama Bin Laden Ih Fapa, Saad Bin Laden In, Iran SuahSan
 
Osama Bin Laden, ih fapa Saad Bin Laden, cu Al-Qaeda pawl hnen ah a tel ve tiah theih fiang asi. US National Intelligence Director, Michael McConnel cun Saad Bin Laden hi  nikum September thla ah khan Iran a suahsan ih. A pai umnak hmun ih zummi Pakistan ih a um an zumthu a sim. Saad Bin Laden hin kum 2001 ih US in Afghanistan a do ihsin Iran a panih cumi hnu kum 2 sungcu Iran cozah in hmundang suaklo dingin a rak humhim asi.
 
US Vanzam tla La Suak Tum
 
Tih nisun ih US Airways, Airbus A320 Minung 150 phurtu New York khawpi kiang Hudson tivapi ih tla cu tipi sungih sin laksuah tum rero lai asi.  Hi vanzam thilri pawimawh khawl 2 cu a thlawngih tipi sungah a tla ah zum asi ruangah. Ti sung lut thiam pawlin thilri tha zetzet hmangin an hawl rero lai.  New York, Mayor, Michael Bloomberg cun, hi vanzam mawngtu, Captain, Chesleg Sullenberger kum 57 mileh a hna ttuanpi dangpawl cu rinsan umzet leh miropi zet an si tiah cawimawi nak leh upat nak a pe, Vurti vekih a daimi tipi sungih sin minung 150 la suaktu pawlkhal cawimawi nak leh Upat nak a pe.
 
Hi vanzam mawngtu, Captain Chesley Sullenberger kum 57 mi hin tuihlan ah cun  US ralkap raldo nak vanzam a rak mawng ttheu ih  US Airways a mawn nakhi kum 29 asi zo..
 
Kabul Khawpi ah Bomb Puak.
 
Mizan khawthim zawngah Afghanistan khawpi Kabul ih German Embassy kiangah thihcilh Bomb a puakih civil 7 an thiih US ralkap 5 in hriamhma nazet an tuar. US ralkap thu puangtu, Lieutenant Colonel, Chris Kubik cun Embassy hna ttuantu khal ziang mawzat in hriamhma an tuar tiah a sim. Greman Foreign Ministry khalin hi Bomb puakin Embassy kiangkap ih thilri tampi a tisiat tiah asimbet. German Embassy hi ralkap hmunpi kiangte ih um asi ih. Bomb puah hlan deuhte khalah Afghanistan ralkap pawlin Motor lut leh suak pawlhi an tiding in an zoh felthluh konan hi Bomb paitu hi khuitawk fangin a ra tihi theih asilo. Bomb puak ruangah Oil phur Motor pakhat a kangtel..
 
Israel Cozah Minister Pawl Vote La Ding.
 
Israel leh Hamas pawl do awknak cu zarh 3 a kimzo ih. rualrem nak Ceasefire tuah ding leh tuahlo dingah  Israel Cozah Minister pawlcun Vote an la ding.  Israel cozah thupuangtu, Mark Reger cun Israel in a lungkim nak vek thil a ti ngah ih a ruat aw asi ahcun ceasefire tuahhi an duh menthei tiah a sim. Hi do awknak rehthei nakdingih Egypt in theihtawp suahih a buaipi rero laiah Israel vanzam cun. Mizan khawthim zikzawng tiangah  Gaza hi bomb a thlak reri lai. UN hnuai ih sawmdawl nak hna ttuantu UNRWA cun minung 2 an thibet tiah asim. Asinan Israel ralkap pawl leh US ralkap pawlcun zianghman an simlo.
 
Israel Foreign Minister Tzipi Livni cun Hamas pawlin Rocket hmangih Israel an kap ringring asi ah cun  rualrem nak ceasefire tuahhi a theilo ding tiah a simbet.  Hamas hotu, Khaled Meshaal khalin rualrem awknak ceasefire tuahding thu ah Israel duhdan vek an thlun theilo dingthu  a simve.
 
Pathian Hi A Um Taktak Lo MenThei
 
England ram, Hampshire, Southampton ih um Bus Driver pakhat, Ron Heather cun a Bus mawnmi parih ( Pathian hi a um taktak lo menthei) timi ca nganmi an tarsak ruangah Bus hi a mawng duhlo. Hi Bus Driver hi zingpit a tho Bus mawng dingih a fehcu a Bus parah hivek ca an raktar sakcu mak a ti zetih a thin tla a hengzet thukhal a sim.  Bus neitu First Bus thuneitu pawlcun hiti vekih sakhua biaknak kalhki zawngih ca tarmi Bus cu mawngding ih an nawrlo dingthu an sim.
 
Tulai hi England ramah  pathim a um taktak dingih zumlo tu minung tampi in hmuntin ah hiti vek an tlang aupi in an thehdarh nasa ih. Pawl pakhat Christian Voice cun hiti vekih pathian a umlo tiih tlangau leh thuhla thehdarh tupawl hi an huazeti. Cumi laiah Methodist pawlcun  hiti vek thu thehdarh tupawl hnen ihsin Biaknak sakhua lam ngaihven lemlo tu mitam piin Pathin hi a um taktak asi ti theihsuak nakih an hmanphah an zumthu an simve.
 
Hivek ih thu nganmi cahi . England, Scotland, leh Wales ah Bus 200 leh Motor 600 lenglo parah an tar. Pathian hi a um taktak leh um lo theih fiangnak a umlo ruangah na nuncu na duhdan in hmang aw tivek tla an tar
(Visited 61 times, 1 visits today)

Comments

comments

One Comment

  1. Nan surbung tlang news hi a tha na sa ,ka hlawk pit na sa rawn suah ring ring hram uh zangfah ten.

Comments

%d bloggers like this: