Bicycle Cuang Vek Nunnak

December 30

Tlawngkai Nili

Bicycle Cuang Vek Nunnak

Siar:

Hebru 11:32-40

Zumnak an neih ruangah hi mi pawl hmuahhmuah hi ziangtluk in ciin ringring tlak an si!    – Hebru 11:39

Kumkhat Sung Baibal:

–   Zekhariah 13-14

–   Thuphuan 21

Albert Einstein in a fapa hnenah ruahnak peknak cakuat a nganmi sungah: “Nunnak cu bicycle cuan vek a si. Tlu lo ding cun na feh vingvo a ttul,” a ti. Thilri pawl ih cahnak le an sizia lam a theitu ih ruahnak pekmi hi a fimkhur ih tuah ngaingai dingmi thil a si.

Hih a fimkhurmi ruahnak peknak hi Khristian nun ah tla hman theih a si. Zumtu tampi cu tuarnak le harsatnak sungin hmailam an feh vingvo. Asinan pumpak nuncan hlawhsamnak an ton tikah an tluk an bah. An sir awknak le Pathian ih ngaidamnak co tlak lo ih an ruah awknak in an thlarau nun cu hmailam ah feh thei nawn loin a dawnkham hngai.

Bible in tluknak a tongtu Pathian minung pawl ih nunnak ihsin tahtthimnak tampi in pek. Abraham in a nupi Sarah thu ah Pharoh siangpahrang a bum (Seem. 12:11-17). Esau ih co dingmi thluasuah ngah dingin Jacob in a pa a bum (Seem. 27:18-29). Moses in lungto kha a kaa in sim loin kianghrol in a vuak ih vuaknak in Pathian ih thu a ngai lo (Mipum. 20:7-12). Sihmansehla, “Zumnak an neih ruangah hi mi pawl hi ziangtluk in ciin ringring tlak an si,” (Hebru 11:39).

Bible sungih minung pawl hi an tluk hnu ah Pathian hnenah an hoikir saal ih Amah an thlun saal ruangah tahtthimnak ah hman an si. Sualnak lam na hril ruangah thlarau lam ah na tlu maw? Sir-aw awla a veihnihnak caan ttha petu Pathian thlun saal aw.     – Dennis Fisher

Lam ka hlo Bawipa, zin ka pial ih,

Na thu ka ngai lo;

Asinan atu cu sir awknak thinlung thawn na lam ka hoi,

Na duhnak cu ka hrilmi a si.    – D. De Haan

Kan Pathian cu a veihnihnak caan ttha mi petu Pathian a si.

(Visited 32 times, 1 visits today)

Comments

comments

Comments

%d bloggers like this: