Bible Facts

 

Bible Facts

Francis Lal Uk

1. Bible sungah, Bible sungih um lala mi thu phuancianak (or) a cangzo mi thu  phuancianak (prophecy) caang 3200 a um ih a cang hrihlo mi thu phuancianak caang 3100 a um.

2. Kum zabi 19 lawngih an theihmi ‘hmuh theilo mi thil (invisible element) a um’ timi cu Hebru 11:3 ah a rak um zo.

3. Lawng an tuah tinten a kauhlam ih let 6 ih sau in an tuah t’heu. Ziangah tile ti parah hninlo/canglo dingih feh thei dingih pianhmang (dimension) t’habik a si. Cuih zoht’himding pianhmang (ideal dimensions) cu a hlan kum 4500 lai ah Pathian in Noah hnenah a rak sim zo (Gen 6:15).

4. Mifim pawlin tifinriat cu vanruahti le tiva pawl luang lut mi lawnglawng a si tiah an rak zum. Kum 1970s lawng ihsin tifinriat tawdeng ah tiputnak a um ti an hmu lai. Cumi cu kum 2000 lenglo reizo ah Bible in a rak sim cia (Job 38:16).

5. Jonah 2:5-6 sungih tipithuamthum tangih hrampi le tlang pawl an um thu khal mifim pawlin kum zabi 20 lawngah an run hmu thei.

6. Kum 1900 hlan ahcun thii (blood) hi kan taksa sungih hnat’uantu cell pakhat men fangah an rak ruat. 1900 hnu lawngin nunnak ih hram cu Thii a si ti an run thei. Bible cun a hlan kum 3000 rei lai ihsin a rak sim zo (Lev 17:11-14)

7. Kum zabi 19 hnu lam ihsin mifim pawlin, kan ruangpi hi element 28 kom khawm mi a si thu le, cumi an zaten leilung ihsin ngah theimi hlir a si thu an run hmufiang. Bible cun leivut ih tuahmi kan si thu(Gen 2:7, 3:19) ah a rak sim ziar zo.

8. Tuisan mifim pawlin vandumkulh (universe) cu ci 4 in a tuam ti an hmu fiang. Cu pawl cu : caan (time), tlolak (space), thil (matter) le tha (energy) pawl an si. Cuih thil pawl cu Bible hmaisabik caang 3 sungah a kim zo. Gen 1:1-3 tiang kan zoh a sile hitin kan hmu:

“A hmaisabik ah (caan), Pathian in Lei (thil) le Van (tlolak) a sersiam. Tleunak (tha) umseh a ti”

* Hih thil ci 4 lobak thildang hmuh bet mi a um nawn lo.

9. Kum zabi 15 hrawngih an run nemhnget thei mi ‘Leilungpi a hlum’ timi thu cu BC 700 kiangkap hrawngah Bible in a rak tarlang zo (Isaiah 40: 22) (Hminsin: Kan Falam Bible Thianghlim ahcun ‘a hlum’ timi a tel lo.)

10. Bible sungih thlacam lang hmaisabik cu Gen 4:26 ah a si.

11. Semtirnak 1:20-22 sung vek a si ahcun Arti hnakin Ar a um hmaisa.

12. Bible sungah ‘Uico’ timi vei 14 a tel ih, ‘Kiosa’ timi vei 55 a tel. Zawhte cu veikhat hman a tel ve lo.

13. Jesuh dungthluntu lakah Jesuh thih lai hmutu cu John lawng a si.

14. Saam 118:8 cu Bible ih a lai cekci a si ih, “Milai rinsan hnakin Bawipa rinsan a t’ha sawn” ti a si.

15. Bible sungah mah le mah that aw vei 7 a um.

16. Bible sungah Bung (chapters) 1189 a um ih Caang (verses) 31173 a um. (KJV)

17. Saam 117 hlan ah Bung (chapters) 594 a um ih Saam 117 hnu khalah Bung 594 a um ve.

18. King James Bible ih OT ah t’ongfang 592,439 a um ih cafang 2,728,100 a um. NT ah t’ongfang 181,253 le cafang 838,380 a um. A zate kom in cafang 3,566,480 a um.

19. Bible ih t’ongkam netabik cu ‘AMEN’ ti a si.

20. Bible catluan saubik cu, Esther 8:9 a si ih, t’ongfang 89 le cafang 425 a um.

21. Bible sungih t’ongfang saubik cu ‘Mahershalalhashbaz’ timi a si. (Isaiah 8:1)

22. Manuscript hlunbik, kimcang deuhbik le tuisun tiang him lai umsun cu ‘Codex Vaticanus’ a si ih kumzabi 4 le hrek hrawngih an hmusuak mi a si ih tu ah Vatican Library ah a um.

23. Bible ih Vate lang hmaisabik cu Tlang-ak a si ih Seemtirnak 8:7 ah a lang.

24. Bible sungah ‘Christian’ timi t’ongfang vei 3 lawng a lang. (Dung 11:26, 26:28 le I Peter 4:16).

25. Bible sungah ‘Eternity’ timi vei 1 lawng a lang ih Isaiah 57:15 ah a si.

26. Bible ah pi (grandmother) timi vei 1 lawng a lang ve ih II Timote 1:5 ah a si.

27. Bible sungah ‘Lord’ timi vei 1855 a um.

28. Bible sungah thumkom (trinity) timi veikhat hman a um lo.

29. Christian sungah kawhhran (denominations) 34,000 hrawng a um.

30. Bible sungah Jesuh in minaa vei 23 a damter ih, khawruahhar (miracles nature) vei 9 a tuah. Taht’himnak vei 40 a hmang.

31. Bible cu a awsuak ih siar dingin nazi (70) hrawng a rei.

32. Bible sungih riahsiat thlakbik caang cu Mark 15:34 (Ka Pa ziangah so i tlan san?).

33. Bible ah Hebrew t’ongfang bangaw lo 8,674, Greek t’ongfang bangaw lo 5,624 le Mirang t’ongfang bangaw lo12,143 an tel.

34. Bible sungah ei in/rawl dangdang 49 a lang.

35. Bible ah ‘God’ timi vei 4370 a lang.

36. Bible cang lakih theitu nei tambik cu Genesis 1:1 a si.

37. Saam cabu sungah t’ongfang 43,743 a um ih, III John ah t’ongfang 299 a um. Tambik le malbik an si.

38. Bible Bung khat sungih bang-aw tambik cu Saam 107 a si. (Saam 107:8, 15, 21 le 31 pawl an bangaw t’heh)

39. Bible ih Bung le Cang bun hmaisabik cu kum 1560 ih Geneva Bible a si.

40. Bible sungih ngan hmaisabik ih ruahmi cu Job cabu a si ih BC 1500 hrawngih nganmi a si tin an zu.

41. Bible sungih ‘thusuhnak’ (Question) hmaisabik cu “Adam khoiah na um?” timi a si.

42. Bible sungih Vancungmi hmin lang pathum pawl cu: Gabriel, Micheal le Lucifer an si.

43. Bible sungah thusuhnak 3294 a um.

44. Cite timi hi Bible sungah vei 30 lenglo kan hmu thei.

45. Bible sungih t’ongkam hmaisabik cu “Tleunak umseh” timi Pathian t’ongkam a si (Gen 1:3).

46. Bible sungah milai ih t’ongmi hmaisabik cu, Gen 2:23 a si ih Adam in a nupi a sunlawihnak le hmin a saknak a si.

47. Dungthluntu lakah tar thihih thi cu Johan lawng a si.

48. Kum 1957 lawngih an run theihfiang mi Kua dumpi (black hole) thu cu Isaiah 50:3, Jude 1:13 le Matt 25:30 sungah a rak rel cia thluh zo.

49. “Antichrist” timi t’ongfang cu Bible sungah ‘John’ lawngin a hmang. John cakuat ah vei 3 a hmangih Thuphuan ah vei 1 a hmang, a zaten vei 4 a hmang.

50.  Falam Bible Thianghlim lettu Dr. Hre Kio in, Puithiamhnat’uan (leviticus) hi leh harbik, Saam (Psalm) hi leh olbik a si a ti.

(Visited 99 times, 1 visits today)

Comments

comments

Comments

%d bloggers like this: