Biazai: Na Feh Ni Ah

“Na Feh Ni Ah”

Biangcung luaithli lungthin kekkuai,
Lungsung a khawk na aw thlamte,
Dimten i simdahmi na aanka neem,
Ka hruum ka ai, hnemtu nei lawn!
Tuarthiam ahar, na feh ni ah.

Ka zum theilo velhleithiampa na si ding cu!
Ka ruhthlik tiang i ciah nehtu na aan kaa,
Tthenlo dingih i hlan mi tiamthu,
Ka ruat kirsal na feh ni ah!

“Khuaitizuu a kha a can tik le,
Meihol rong a raang cang in,
Tidai sauluan ih a luan caan cu,
Na valpa kei ih ka lo hngilh ni”
Na ti mi aanbia,
Ka ngai ngamlo, na feh ni ah.

A thlum kelten a thlum, midang hrangah,
Ka hrang dolh theihlo mi khuaitizuu!
Mawhthluk ngam hlah ing ee, a cui khuaitizuu cu!
Ka kaa sawn ah “Tursia” a rak manaw.

Mitmu lang theiloin mitthli a khat ka mit ah,
Hmu thiam nawn hlang meihol rong dum.
Rau duadi’n ka hmuh ngah mi thilte,
Meihol rong a raang ee, na feh ni ah!

Kan len ttheunak kan tualrawn in,
Thlir in ka cuan, hmuhmi neilo.
Thinlung molhmaang pi’n ka zoh ngahmi,
Kan titleer in tidai a liam,
Ka din nak in zohhliah ing khaw,
Sauluan in maw a liam kan tidai cu!

Velhleithiampa na silo ee,
A zoh daan sawn ka rak thiamlo maw ti’n…..
Ka theifiang ngah, Na Feh Ni Ah!!

By-  Dai Dim

(Visited 61 times, 1 visits today)

Comments

comments

5 Comments

  1. Zodai Zilthli says:

    “Khuaitizuu a kha a can tik le,
    Meihol rong a raang cang in,
    Tidai sauluan ih a luan caan cu,
    Na valpa kei ih ka lo hngilh ni”
    Na thiam tuk…

  2. Mai Zilthli Lal Nei Thluai says:

    Dear Mai Dai Dim,

    Na bezai siar a nuam tuk. Na ngan thiam tuk. Na ngan peh vivo ding khal tha ka lo pe duh nasa. Na cahram siar ding ka rak cuan/thlir ringring.

    with love
    Mai Zilthli LNT

  3. Na tlangval si ningna,
    Ka van nei ce ke..
    Ziangah ti aw?
    Valdang hnakin duhhleice cuang ka hlawh ding a bang.

  4. Na thiam tuk ee
    mi na yinkhung ter tuk

  5. oioioioi…..ka tuar a va har ve a cui bezai cu awwww,na va thiam ve.tampin rak ngan aw maw,mi lun thn a ti parh theh zik,ka tuar ahar fualfo ve..thiam riai, miss Daidim

Comments

%d bloggers like this: