Biazai Lawrkhawm

A hnuai ih CT biazai pawl thinlung  tak  thawn siar a manhla zet ding.

Hoithlat Lairam

Ka pi le pui’ semnak le lu phumnak,
A te le fa pawl hrang Lairam, suantlak;
Van ih si-ar ttilin vawlei cem tiang
Leng law leng diahdo law, pualva lungthiang.

Kaiva tinkim, ramsa phuntling ngam hai,
Zo sokhlei, far le bingbipar mawi ai;
Van ih si-ar ttilin vawlei cem tiang
Hrang law hrang diahdo law, zo thlizil thiang.

Buannel, Zinghmuh, Khawnutum, Lailun pi,
Runva, Ttiova le lung pian keng Rihli;
Van ih si-ar ttilin vawlei cem tiang
Luang law luang diahdo law, zo tidai thiang.

Thluatlang zeltu cumci, thlawh lopil niim,
Lianram riantui’ thlanhri hnultu zilfim;
Van ih si-ar ttilin vawlei cem tiang
Zaam law zaam diahdo law, zo mero thiang.

Sai lungvar suak lo hmanseh, a hrinhniang,
Sum ih lei thei lomi rothil mansung;
Van ih si-ar ttilin vawlei cem tiang
Ngam law ngam ngiahgno law, tlangsang laileng.

6. 10. 2009 – 12. 10. 2009

#FBP in Lai cazirbu hrang dingih in ngan fialmi

Laimi Mawinak

Diknak le rinumnak kengtu Laifa,
Lungput tlaitluang tlangsang pualva;
Thinthir loih sahrang le ral tawng ngam,
Ukawk daan khimkhuah keng phunhnam,
Rampi’ hrangih damnak nunfu,
Vairaang mit lo nunphung phun-u.

Rong ci phunkim ttelhmi hrinhnam le ttong
Parmawi hmuan iang, Siamtui’ lungtong;
Leennak khurkhua a ngil lo nan
Mithmai pante’n thuanthu a ngan;
Thlanhri le thisen ih thaapmi
Rawlfang ei cu manhla a ti.

Ka pi’ suanmi kawhhol rimthaw
Rim dang nam hlahseh law,
Ka pui’ lu ih sumku ronghlaw
Rong dang keng hlahseh law.

15. 10. 2009

#FBP in Lai cazirbu hrang dingih in ngan fialmi

Hlingbur lakih lilipar bang

Na lenrual lakah mawi hleiin na lang;
Mawi serso e Ka duh lengnu,
Duhnunnak thinlung a kengtu;
Piang hlei ngai e ka lungduh cem,
Na aanka thlum val tintian in an fem.

Iangnei na mithmai zoh ka duh,
Na aanka thlum te tla theih ka duh;
Duhthu phai e zanttim tiang,
Semnak ruuninn ka thlen tiang
Na thu ruatin ka caan hmuah an liam:
Nang lo ton hnuah duh hna ka thiam,
Siimlam caan ih umpawng par bang
A itthatmi lungthin nang i tthang,
Mittthep kar ah val dang ttang na zuan,
Tthal thinghnah ngau ttil ka hluan.

Salai Thlunte

Hringtu Ka Nui’ hnenah

Sumsaw zaalih vaimi leennak tlangsang
Zariat ka lan zawnah theih lai ka caang;
Hramthiam huiva hluan sunghno na aanka,
Kam khat, kam hnih siarin kam thawngzahra.
“Na thlazar ah na nu ka hna a ngam,

Na hmuifu tamsin in va hlawhtling hram,”
Tiih na thu zaicah aanka thlumte;
Nunnak thahram bang thazaang cak i pe.

Na biang parih luangmi duhnak luaithli,
Ka hrang kumkhaw luangmi cirhti,
Zanqim na thlacamnak awkhawk ka hrang
Qhal niling’h thlizil thiang banglen a hraang.

Ka pitlinnak nunkhua i ruahsaktu,
Na thla rak phang hlah law ka NU.

S. Kei UK

Na Hummi Bezai

Na kut sungih na hummi bezai cu
Mangbangza le a makzetmi bezai a si
Thiamzet ih nganmi bezai a si ruangah a si lo
Cafang mawi le mak pawl hmanmi a si ruangah tla a si lo

Na kut sungih na hummi bezai cu
A mankhung zetmi bezai a si
Thiam duahdo ih nganmi bezai a si ruangah a si lo
Ka hnen ihsin a ra suakmi bezai a si ruangah tla a si lo

Na kut sungih na hummi bezai cu
Thinlungtak le sunsak zet ih in siarsak ding ka beisei
Nangmah thawn kan tawnawk hnu lawngin mi duh ka thiam
Mithik le thinnat tla ka thiam vethlang timi lungsungsuak cafang pawl an tel ruangah a si sawn

Mai Zilthli Lal Nei Thluai

Ka Hrang Mitthli

Ka duhbik mi lengnu
Ziangdang hman ruat man lo’n
Harnak thlipi sung tiang
Na dawtnak iang in kei tawi

Thih ngam tiang in salai
Tuar ngam ko ning na hrang
Duhdawtnak thawn lengnu
Zuam ko ing ee kei valpa

Ka sim; kumkhua dawtnak
In san sak hram lengnu
Hmanseh tling lo na hrang
Liam ko aw law nang lengnu

Ninu hong suak na zuun
Thlapa hong suak na hmui
Tuar thiam hlah ing valpa’n
Sankhuk! ka hrang mitthli

May Myo Moon

(Visited 55 times, 1 visits today)

Comments

comments

Comments

%d bloggers like this: