Biazai Lawrkhawm

Li-Rih le Rih-li

Pumkhat sinak le siatralnak hringtu,
Thinlung pianhmang qhatnak in mi a neh
Lai thliahhniar in damnak cahnak a hmu,
Li-Rih ah khan Vairang thiamnak a reh.

Nikhaw sa ih beunak hrangih sahmi,
Rialruah lakih himnak petu hulhliap,
Run-inn sungah a fawr; riahsiat mitthli;
Pualva a pil, Rih-Li sungah a ciap.

Rih-Li tlunih palaap thlazap qih in,
Li-Rih hrawngih sunmangpawl ar bang aak.
Pulhhri lakih khamtu khanlung a min;
Zalen duhnak, suahcaak ruahnak a daak.

Ruahsan zetmi Li-Rih’h nganmi khanca,
Rih-Li nunrawng sungah a pil lanta.

Joe

Kawhnak

Na ra pheinak zalam tluan khi
Cuan in a leng ka lungthin hi
Duhnung na hmel mitthlam a cuang
Zuunrim ngai ah luaithli a luang
Na tel lo cun um khua a har
Luaithli hnul in zankhua ka var
Rawl hman sungtling ko ih ei ni
Nei lem hlah ing zuuntuar val hi
Hnentu nei lawi tlangkip a hrawng
Thlapai’ nun kei khal in ka cawng
Lungsir in ra kir zai rel in
Nun dang daw lo’n lailungrawn hin
Zaqial kai in lengtlang sal ning
Duhthusam hi a kim ve ding.

B. Ngur
Velthiam Huiva

Ninu tlang hnu phentu romei rapqing,
Sunhnu’n thimzing ramngaw than-tlang khanqhing,
Zanmang thim sung ramhuai kut hmul qihnung,
Zanqimh hriamnam hmangih rawlhrawng hnamkhung.

A mom thimkhawzingpi’n vanpuak situr;
Huai tilian in hrutsiat hlansuak cikhur.
Leennak zamualrawn ih khomi leenhling,
Tuarhar fangza-aihnak romual thinthling.

Remtei’ thawthawt tum ih vahsam thinlung,
Vawlei siammi zathawng lakih hrinsung,
Nunfu velthiam lengdawh vahui hmuisung.
Zuam duh poh hlauh! buibul, qingburh tlangak,
Vancung lungtong zaihla a um si maw!

Papu Luai

(Visited 63 times, 1 visits today)

Comments

comments

Comments

%d bloggers like this: