Biazai Hmuan

Biazai Hmuan

Zing vang-arcang a khuang

Hro veithum a suang,

Thimhulhmukpi a do;

Ni zung tleu a ko.

Eheu!.. Laipa na phur tuah hen,

Na tha neih tawk suah hmen,

Kawl mimang cu zingah a tho

Vaipa khal hnar a liam hlo zo

Na sathaufar kengih na con a cu;

Hauhnar tluanin na lorian taw le lu,

A khat thluh hling le so hramrul

Zamrang zetih na thawh a ttul

Thlaici na tuh cia mi tla an kho zo

Tuhmui kengin a tu vun thlo

Hreitlung le namper kha vun tat,

Hling le so hramrul hmuah in vun vat,

Na kutke an durh zo tla si men thei,

Thangsuah lo puan na sin dah kei,

Khah!… Rinumnak tacik,

Ngam zet in keng hnik!

Hlingkung le lohar in a khuh tthehmi

Na lolu in na lotaw khi

Biazai phunkim le lungmankhung

Parnak hmuanih na tuah hlan sung

Na rak daithlang men pang dah kei

Na tha na thlah hrim riai lo pei

Khah!.. Rinumnak tacik,

Ngam zetin kheng hnik!

S. Kei Uk


Zalemrawn Kai Ka Thai

Piallei daiih ruun rem, ka thai nunnem

Zattial kaiih len tlang ka khop lo cing

Khuiah an um, ka ttah cangah i lem

Lo len ? Ttapin pawk ning ka pawn sawlthing.

Vun dawn thul ing, hlan kan nunte ka ngai

Tlingraw zauih zan khua thin hnangam tei’

Mitthli le kan sunmang  tla kan siar lai

Hrinthar awiin sunvu hu ngai lo lei.

Taan kan cu hrih lo e, na duat hrinhniang

A ttah cangah lem kho lo hin, na dung

Zulih run pawk ka nuam sahnar zin tiang

Na hnu-ah kan ruunsung thimzing a tlung.

Ttuan zai a rel lo maw si ke, Khuanu’n

Anih ber ngelcel tel lo ngai hin teh?

A kei hrangih damsan, hoithlat neihsun

Hringhniang pomtlei loih pialrang a feh.

Ralpi bang ka thin tthawng hlei dar awn ring

Ai maw! Duhte si kan ttianni a tlung

Zing ttausangih ninu mual a liam ning

Mitthli dur riat thlor peng zan khawthim sung.

Si thiam seh’maw, ka ih zanmang men tal

Tthanghoi, ka sir herin ka lo pom ding

Thlah zai rel thiam nawn lo’n, duhthu thlum-al

Ninu, thlapa liam tiang phai leh hrih ning.

I seherh cing’ zattial vun dom lo lei’

A farah cuang, ka duat, pialrang hnarah

Lungsia, thinnau le thlattem te’n a tlei

Ttahnak ram hi a mitthli thawn a thlah.

Kehlam a biang parih lungmi mitthli’n

Midang theihpit lo thu ‘sim ka thinlung

A siangthlairem dai loi’ i hngah dan hin

A kaan lo, ka thei, rinumnak rinsung.

Ka seherhmi biathu, thlahnak aanka

Kam hnih-khat tal hlan man loih ttian ngai;

Zalenh daihnak vancung ramah, manhla

Le diriam pi’n biathu hmuah kan phai lai.

I ruah len nan, a thlattemnak zanmang

Ruahpi le thli fialin i ra ko nan,

A san theithiam loin ka rak muang pang

Lungsir thinkuaiin e pomlai ka caan.

Hlanin lungmawng na manglian kha, na huat

Loih lungthli sung tei’ na ruah cang le

Hnar pawn na ruun daiih ka pangpar duat

Sazaw fialin rak khiakter aw, Duhte.

Biathu cah ning huiva le zuang zilthli

‘Zanmang talah i ra tlawng aw seh’ ti’n

Thangsuah lo, kei, a lung zuntu men hi

I rak ngaithiam hram seh vandum ralin.

Van sang karih len thiam zuangzang vaca,

Khua letselih ka thai na hmu lo maw,

A sia ka herh lo maw si, i tanta?

Zalemrawnin i hngak seh ti’n hal law.

Zuun tthing ul nai’ nithla siar ai tla len

Hlingrul le meisa hman tawt peng, a mei

Pawk aw’n ka pu sazaw, ka lungsi te’n

Mithi khua tiang thlah lo’n ka thlun hnik pei.

A hi ti lei za vung tian miarmo cu

Sim aw lan lang Khuanui’ rel kan thuanthu;

Ka lungthin kha’n rel thiam hlah e ttuanzai

Zalemrawn kai duhlai ka thai a ngai.

J C Kipling

Comments

comments

Comments

%d bloggers like this: