Biaknak le Politics

image009By- Rev. Dr. Khaw Lian Uk

New Delhi

Biaknak le politics timi thulu hmangin thu rel khawm theinak cantha in pe tu Pathian hmin ka thangthat. Falam Union,Delhi ih tuanvo neitu pawl hnen khalah lungawithu ka sim a si.

Tuihtum cu Tibet pawl ih thuanthu, Mahatma Gandhi ih thufim le Rev.Martin Luther King Jr pawl ih pekawknak pawl tla zohthim in biaknak le politics timi thu hi relkhawm sehla a thading tin ka ruat.

Khuahlan ah Mongolia pawl hi Tibet phungki pawl ruangah an mipa pawl cu phungki ah an lut thluh. Cutik ah an nunau pawl cu pasal neilo in lakfa lawng an pai.

Nehhnu ah an fa le pawl cu an thinheng tuk ih communist ah an cang thluh. Tibet pawl hi an thuanthu kan zingzoi tik ah biaknak lawng an cilh tu pawl an si.

Tibet ramthu ah Rev. Richard Wumbrand in  hitin a rel: “Biaknak lamlawng  buaipi ih politics lam ngaihsakhna thiamlo Tibet ram cu China in a cimral thlang.” a ti

Himi thu ka ruah tikah kan miphun lak ih sin Pathian hnatuan tu pawl khal in  thu napi in kan ruah a cu thlang in ka hmu.

Pathian hnatuan tu pawl in kan mipi nekrawknak a phunphun an tuarmi pawl hi umsan men in kan nih ih buaipi ding a silo ti in le politics cu a khawvel tuk ti in  umsan men in van lam thu lawng buaipi ih kan um hi a dik pei maw tin ka ruat a si.   

       Martin Luther King thuanthu khal hi kan zoh ta hnik pei!

( Pu Hre Mang ih rihli groupsmail ih ta laktawimi) Kumtin a voithumnak thawhttanni hi USA ahcun Martin Luther King Jr. Day tiah official holiday asi. Cozah zung hmuahhmuah an khar theh. USA ramah mimal hmin in  official holiday hman mi pali lakah Rev. Martin Luther King Jr. a tel ve.

       Martin Luther King Jr. cu Jan 15, 1929 ah a suak. A nauhak lai ahcun miphun thleidan awknak ruangah USA ramah midum le mirang tlawng pakhatah kai khawm a theihlo, Bus pakhat sungah totlang a theih lo, rawldawr pakhat sungah totlang a theih lo. A nauhak laiah Atlanta khua ih a ummi midum tlawngah ca a rak zir.

 Phunhra a awng hnu ah 1948 ah Morehouse College , midum tlawng thotho ihsin B.A. degree a rak ngah. Cuisin Corzer Theological Seminary, Pennsylvania  ah Bible tlawng a rak kai. Bible tlawng ahcun mirang pawl thawn an kai tlangih an class ah student president ah an rak hril.

 1951 ah B.D. degree a rak ngah. Cuisin scholarship a rak ngah ih Boston University ah PhD a rak zir zawm ih 1955 ah PhD a rak ngah. Cutawkah midum fala mawite, Coretta Scott a rak tawngih nupi a thit hnu ah fapa pahnih le fanu pahnih te an nei. Martin Luther King Jr. cun a pa’I pastor tuannak kawhhran Ebenezer Baptist Church ah assistant pastor in a pa a thihtiang a rak tuan.

        Kum 1954 ihsin Dexter Avenue Baptist Church , Montgomery , Alabama ah pastor a tuan thawk. Pastor a tuan phah in “Advancement of Colored People” timi pawlkom member a rak lut. 1955 ihsi thawk in US ramih midum pawl nautatnak pawl do in midum pawl milai canpual hrang sualin hotu a rak tuan thawk. Mipi tampi hnenah hmun dangdangah feh in thu a rak sim. 1955 ihsin US cozah hnenah duhlonak an langternak (sandahpiahnak) ah ni 382 a rei.

      December 21, 1956 ah US Supreme Court in “midum le mirang thlei dan awknak (segregation) dan kha constitution thawn a kalh aw” tiah an rak phuang suak. (“US constitution cun “All men are created equal” ti asinan nunau, mi farah le midum pawl cun hril awknak ‘national election’ ah vote an rak thla thei lo, midum le mirang tlawng hmunkhatah an kai tlang thei lo, bus le rawldawr pawl khalah midum le mirang bus pakhat le dawr pakhat to tlang theih asilo. Midum pawl cu mirang pawl sal an rak si dah ih  mirang pawlin an rak ten ruangah an thleidannak a rak si.

 Cutin duhlonak an langter laiah Martin Luther King Jr. cu hotu a rak si ruangah mirang pawlin a innah bomb an puah, hronak a tong, palik in an kai, thawngah an tlak, cutincing cun midum pawl hotu dinhmunah a lar so vivo.

 1957 ah Southern Christian Leadership Conference ah hotu ah an rak hril. Himi pawlkom hin milai canpual, dingnak hrang sual dingah dinmi asi. Kum 1957 le 1968 karlakah Rev. Martin Luther King Jr. hin peng 6 milion (6 million miles) tluk khual a rak tlawngih voi 25,000 tluk thu a rak sim. Mipi pumkhawmnak ah diklonak le midum nekcepnak do in tawn khawmnak hmun kipah a feh ih thu a sim vivo.

 Cumi can lai lakah cabu (5) panga le cahram ziangmawzat a ngan fawn. Birmingham , Alabama ah mipi pumkhawmnak ah  duhlonak langternak arak hoha tikah mi 250,000 tluk Washington DC tiang an feh ih cutawk ah a thusim mi “I have a dream” (Sunmang ka nei asi) thuthlangpi hmang in thu a rak sim. President Lyndon B. Johnson in president a ngahnak ding hrangah campaign a rak tuahsak fawn. Voikul (20) lenglo kaih a tuar ih voili lenglo velh a tuar, upatnak laksawng pali a ngah, Time Magazine in kum 1963 Man of the Year ah an hril.

 Midum pawl hotu lawng si loin leitlun khawmualtin ih upat tlak mi dinhmun tiang a rak thleng. A kum 35 a kim tikah Martin Luther King Jr. cu Nobel Peace Prize dawng tu hmuahhmuah lakah kum no bik si in upatnak laksawng pek a rak si.

Noble Peace Prize na ngah asi ti an sim ve ten, a sum ngah ding mi $ 54, 124 cu “milai canpual mi zapi in zalen zetin an hmuh thei nak ding (Civil Rights movement) hrangah ka thawh ding asi” tiah a puang cih. Pastor asi ih a lian ciamco lo. April 4, 1968, Memphis, Tennesse state ih hnawmhlawn hnatuantu pawlin milai canpual zalennak an hmuh theinak ding hrang ah a cozah hnenah duh lonak langter dingin an timtuah rero lai, a umnak Motel room baranda ah a ding lai kha an thah ih a nunnak in leitlun a suahsan ta.

Hi thu ka siar nak in thu tampi i ruat ter. Pastor le Evangelist pawl in politics hi ziang tin kan hmu! Kan hmuhdan hi a dik maw ! thaten cekaw sal uh si.!

 Mahatma Gandhi in “Tumtah mumal neilo hotu pawl, midang hrang thathnemnak nei lo milian, mifim le cathiam pawl le pumpeknak taktak neilo mi hnatuan tu pawl in  kan khua le ram an ti siat” a ti.

Kan mipi thawhhlawm in pe rero tu pawl  harsatnak a phunphun  an tuar rero mi hrang ah ziang sunmang saw kannih rawngbawl tu pawl in kan  neih ve ding ti hi keimah te thusuhnak ka tuah aw a si.

Biaknak lam hnatuan tu pastor le Evangelist pawl in kan ram a siat rero mi hi thlauthla in mah le kohhran hrang lawng ah le camping / crusade ti mi lawng ah kan dam sung ni hi kan liam ter men ding maw!

Ruah a cu thlang in kan hmu. Ukawknak a that lo ruang ih nekrawknak a phunphun a tuartu kan mipi ih hmailam hrang an tumtahmi thupi hi biaknak hnatuan tu pawl kan thupi a si ve tin ka ruat.

Tuni ih a ra suak khawmtu vantlang mipi in biaknak le politics hi bible ih in zirhdan vek in (II Sansiarnak 7; 14) a hran ten then a theih lo zia hmufiang in Pathian le kan miphun hrang ah mah le ti theinak zawn ciar in kutkai aw in tuan tlang uhsi.!

(Visited 68 times, 1 visits today)

Comments

comments

Tags:

2 Comments

  1. Ti tha riai si

  2. Hi ti vek in kan mi phun lak ih Pathin hna ttuan tu pawl in ruah nak nei thluh seh la
    Kan mi phun hrang ah phan ding a um nawn lo .

Comments

%d bloggers like this: