Benazir Bhutto Ih Thih Ni

Surbung Tlang Thuthang
by- Pasum
December 27, 2008.
 
   India lawng  Bangladesh ah lut
 
  Bay of Bengal tipi thuanthumih Gas leh Oil hawlih hnattuan India lawngcu Bangladesh in an ram Tipi sungih lutah a puh.  Bangladesh cun himi India lawng dawisuak dingin an ralkap lawng pahnih a thlah thu asim. Himi ruangah Bangladesh in a lung awilo thu mizanah India hnen ah a thlen ih.  India cozah khalin hithu hi felfai tei rakzoh a tumthu asim.  himi hlan khalah Bangladesh Foreign Minister Secy, Mohammad Touhid Hossain cun hi thilthleng hi India cozah theihter nak a pekzo thuleh Bangladesh in lawngralkap leh ralthuam keng raldo nak lawng  Khalidbin Walid leh a dangpawl khal himi hmunih an kuatzo thu a simzo.  Himi laiah India lawng ralkap thu puangtu cun. India lawng pawlhi Gas leh Oil hawldingah  Mongla lawngcawlh nak ihsin  nautical mile 140 ih hla ah hnattuan dingin fial ansi tiah asim.
 
Israel in Gaza a phih nak  a ong sal
 
 Israel cozah cun can ziangmawzat sung Gaza lamzin a phihsak micu a awn saksal.Hi Gaza lamzin a awn sal naksan hi leitlun ramdangdang in a nawr nak ruangah Gaza ih Palestinian mipi rethei tukleh zawnzai tukpawl hnenih bawmnak pekthei nakdingah Israel Defence Minister Ehud Barak in thutluk nak a tuah asi. Gaza lamzin hi awn asi veten ti le rawl, sii, leh thildang ttulmi cu Truck 80 lenglo in Israel insin Gaza an panlut cih. Israel cun Rocket hmangih Israel kapnawnlo dingin Hamas pawlcu an ngen sal rero ih. Himi cingin Hamas pawlcun mizansun khal ah Motar hmangin Israel cu an kapsal thotho ih. An Mortar kahsuak miin Gaza ih in pakhat a kahngah ih a sungih um unau nunau kum 5 mileh kum 12 micu an thicih. Tui nihnih thum sungte ah Hamas pawlin Israel hi Rocket 50 lenglo leh Mortar ziangmaw zat in an kapzoih  mizansun lawng hmanah Mortar 13 rori in Israel hi an kap asi. Israel Prime Minister Ehud Olmert cun hiti vekih Hamas pawlin thil an ti rero asi ahcun Israel ih sanlet nakhi nasa zet in an tuar lehding ati. Israel Foreign Minister Tzipi Livni khalin Hamas pawlih thilti dancu ngaidam men har a tithu asim..
 
 
Benazir Bhutto ih Thih Ni
 
 Pakistan Prime Minister hlun misual pawlin an thahmi Benazir Bhutto ih thihni a vawikhat nak cu mizansun ah minung thawng tamzetin Pakistan ram thlanglam Garhi khuda Bakhsh ah  a mai hmin in thlacam khawm nak an neiih. Cozahlam mi upa tampi in thucah nak an sim. theihzo vekin Benazir Bhutto hi nikum tutik cu ah khan hril awknak dingih compaign a neih laiah  thihcilh Bomb hmangih thah asiih . tuisun nitiang  a thattu leh a thatter tu khal theihsuak an si hrihlo. Pakistan cozah ih dilnak vekin UN Secretary Ban Ki–Moon cun Benazir Bhutto thattu leh a thihdan famkim zingzawitu ding Independent Inquiry khal  din cing asi ding tiah asim..
 
Iran ram ah Kedam in Bush ih zuk an deng
 
 US President Bush kedam ih dengtu Iraq Journalist  Zaidi, an ttanpi zia langter nakah mizansun ah Iran ram Tehran khawpi ah mitam zetin an kedam bunlaimi hlitin Bush ih zuk an deng ciamco ve.  Bush ih zuk an denhlan ah an kedam cu vanlam ah an khirhta ih cumi hnuah Bush ih zukhi an dengleh. Bush ih zuk an dennak hmunhi Tehran  University ah asiih tlawngkai ni nga Mosolman pawlih thlacam khawmnak ih mipi pungkhawm pawl ansi. Himi laiah Bush dengtu Iraq Journalist Muntadar al- zaidi cu Iraq court in tuithla ni 31 ah a thuhla a relsak ding..
 
India in Pakistan Ngen
 
India External Affairs Minister Paranab Mukherjee cun Pakistan cu a ram sung ih misualpawl humhim vivo duh ruangah India thawi do awdingih thuthang thehdarh ciamco tuah a puh. Minister Mukherjee cun pakistan cu a ramsungih Misualpawl a cawmmi ramdangin hremdingih an nawrnak ruangah hrawhhrawl suahih India thawi do aw dingvekin thutuah tu ah a puhbet ih a ramsungih misualpawl hrem dingah Pakistan cu a ngenbetsal. Minister Mukherjee cun Mumbei khawpi siimtu pawlcu Pakistan leilung ih sin puaksuak mi asi tihi India cozah in a theifiangzo ruangah Pakistan cu thupan phenah relh rero tumlo in misual pawlcu kaiih ramdan vekih hremdingah a ngenbet.
 
  Minister Mukherjee hin US Secretary of State Condollezza Rice, China Foreign Minister Yang Jei Chi leh Iran Foreign Minister Monounchehr Mottaki pawlcu Telephone in a bia ih Pakistan thilti dan a demthu asin. Cui thlunah India ramih ra tlawng Saudi Foreign Minister  Saud al- Faisal hnen khalah thil um dan  a sim ih Saud al- Faisal cun misual cu misual ansi ruangah zokhalin kando a ttulih ziangram khalin a hrem ding asi ati.
 
Himi laiah Pakistan cun India thawi do aw ding vekih thuthang vakvai cu  tireh a duhthu asim veih. Pakistan Foreign minister Secy, Salman Bashir cun  Islambad ih Indian High Commissioner, Satyabrata Pal, thawi an kawm awk hnu ah  do awk nak dingthu thang tireh a duhthu khal asimbet.  Bashir hin India palai a kawm hlan ah UN Security Council ih Parmanent Member pa nga pawlkhal a dangdang ten a kawm hmaisa ih  Japan, Germany, America, UK, Russia pawl a kawm.  Bashir cun Mumbai siimtu misualpawl do dingah leh hawlsuak dingah India thawi ttantlang a duhthu khal a simbetih. India cozah duhdan kan ngaicang asi ati. Pakistan in ramti tluanih ralkap a ret ruangah India thawn do awk ding tinak a si cuanglo ati. Pakistan Prime Minister Yousuf Raza Gilani khalin Pakistan cu India hnenah a cang hmaisa loding ati ih ralkap pawlih hna cu ralring tei um ringring asiih  cui ralkap pawlin ralrin nak an neih ruangah India thawi do awk ding tinak a umlo atibet..
(Visited 40 times, 1 visits today)

Comments

comments

Comments

%d bloggers like this: