Beijing Ah Hillary Clinton

February 21, 2009
Surbung Tlang Thuthang
 
Beijing Ah Hillary Clinton
 
Asia ram dangdang tlawng rero laitu  US Secretary of State Hillary Clinton cu China ram  Beijing khawpi ah a cam laiih. Beijing khawpi ih a camsungah hin China President Hu Jintao, leh  China Prime Minister Wen Jiabao, a kawmih thaisun Biak In ih a khawm hnuah  Washington panin a tlung thlang ding. Hillary Clinton hin Beijing a camsungah US leh China rualpi that awknak leh pehtlahi awknak tha sinsin a duhthu asimih. Tibet leh minung  diknak covo zahthiam dan cungcang ah US leh China cun thurual awk theilo nak lai neihman sehla himi in rualpi that awknak leh hnatuan tlangnak lamzin a tibuai ding asilo tiah asim. Hillary Clinton hi China a fehhlan ah Japan, Indonesia leh South Korea a fehzo.
 
China foreign Minister Yang Jiechi thawi thuthang ca latu pawl an kawm tlang nakah Hillary Clinton cun US cun  China thawi rualpi that awk sinsin a duh tiah asimbet. Himi hlan ah China Foreign Minister thawn nazi pahnih sung an kawm aw ih. Hillary Clinton cun China thawi rualpi that awkdingcu a thinlung luahtubik si hmansehla thiltampi tuahding a neihlai thu asim.
 
Israel President In Cozah Tuahding Ah Netanyahu A sawm
 
Israel ramih Likud Party hruaitu Benjamin Natanyahu, cu Cozah thar tuahdingah  President Shimon Peres, in a sawmih. Benjamin Natanyahu, cun Leitlun sumpai dinhmun tlasia zet lakah Israel ram khalin tikcucan harsazet a hmaitawn veding tiah sim in. Politics dinhmunah  Party dangpawl thawi ttangtlangih Cozah tuahtlang a duhthu a simih. Asinan  Kadima Party hruaitu Tzipi Livni cun  Benjamin Natanyahu thawi Cozah nak tuahtlang ding hnakcun Opposition lamih to a duhsawn thu a simve. Cu ruangah Cozah nak tuahtlang dingih an ttantlang thei zum a umlo.
 
President Shimon Peres leh Benjamin natanyahu cun thuthang ca latu pawl an kawmtlangih  Likud Party hruaitu Benjamin  Natanyahu in  zarh 6 sungah Israel Cozah thar a din a ttul tikhal an tar lang. Likud Party hruaitu Benjamin Natanyahu hin  Kadima party hruaitu Tzipi Livni leh Labour Party hruaitu Ehud Barak khal Phone in a bia ih  Cozah nak tuahtlang dingin a sawm tiah an sim. Benjamin Natanyahu, cun Iran cu Nuclear ralthuam nei tengteng tum ih Lebanon leh Gaza ih Tapung Hezbollah leh Hamas pawl a bawm ringring  ruangah Israel ih ral leh hmelma bik asiih  Israel in a kilkhawi thei a pawimawhzet asi a ti. Israel hin Palistinian  Uk a tumlo ih. Asinan israel hrangih  buainak tuahleh hnawksak zawngih um ding cu Israel in a remtilo ding asi a tibet.
 
Tlangleng Leh Bus Ttaih Aw
 
Mizan nazi 11:00 hrawngah Slovakia ramih Brezno khawkiang ih  Tlangleng leh Bus an ttaih awk ruangah minung 10 an thiih midang 20 lenglo in hriamhma an tuar tiah Brezno, Police pawlin an sim.  Bus ah hin Minung 36 an to ih hriamhma tuar besia deuh pawlcu  Banska Bystrica Siizungah Vanzam in phurh an si. Bush thawi an ttaih awk ruangah tlangleng khalin an lamzin a zawhsual,in minung ziang mawzat in hriamhma an tuar.
 
Thailand Thawng In Ihsin Harry Nicolaides An Suah
 
Australia ramih Ca nganthiam Harry Nicolaides cu  Thailand ram Lal ti hminsia zawngih ca nganih puh asi ruangah. Tui kandung January thla ah khan kaih asiih.Kum 3 sung thawng tla dingih ti a si hnuah  Thailand ram Lal in a ngaidam salih suahsal asi hnu ah an ram Australia ah a tlungih  Melbourna khawpi ah a nupi leh  a fate pawlin mitthli thawn an rakhmuak. Harry Nicolaides cun Thailand ramih thawng a tlak laiih Australia mipi pawlin an raktanpi nak cu a hrangih lung awinak rotling asi thu asim.
 
TV ih a langdan ah Nicolaides hin thawngtla kawr a hruhih a ke ah kawl khal bun asiih Australia mipi pawlcu an lung a awilozetih. Harry Nocolaides ih Ca nganimi hi kum 2005 ih Cathupi lozet a nganmi asi nan Thailand ram Lal hmin tisiat nak a tel tiah puh asiih Cope 50 a tuahmi ah Cope 7 lawng a zuarsuak man asi.
 
Nagaland Ih NSCN Pawlin Remnak Karkhat Sung Tuah
 
India ram Nagaland State ih Tapung Group pahnih ral awzet leh that aw ringring National Socialist Council of Nagaland (NSCN) hmin bang aw Party Pahnih cun  karkhat sung kut thlak awlo dingin rualrem nak an tuahih. Hi Tapung Group pahnih in karkhat sung rualrem nak an tuahnak sanhi. Nagaland ih  do awknak leh buainak rehthei lo cu  rualrem nak a um theinak dingah  Peace Convention tuisun ihsin an thawk dingih cu mi hrangih rem awknak hi tuah an si.
 
 Hi Convention tawlrel tu  Forum For Naga Re- Counciliation (FNR) cun (NSCN) Tapung Group pahnih cun tuithla cem tiang remawk nak an tuah thei dingih an beisei thu khal an simih  Hi Convention ih tel dingin Naga miphun dangdang leh   Pawl dangdang ai awhtu leh State dangih sin Naga miphun dang pawl khal an sawm thluh ih. Naga ram ih Miphunzawngih Tapung Group pahnih feh ih do awknak leh thah awknak a reh thei nakdingah thei tawkih hnattuann an tum asi.
 
ULFA Tapung In-India Cozah Hnenah Dil
 
India ram Assam State ih  United Liberation Front Of Assam (ULFA) Tapung pawlin India Cozah hnenih  an thildil mi Piont 18 cu  Mizansun ah Assam State Chief Minister, Tarun Gogoi, cun  Prime Minister  Monmahan Singh hnen ah a thlenih (ULFA) pawlinan thildil mi Point 18 sungah Assam ramcu India danpi sungih um thotho in  India ramdanpi sungih thu neihnak sang Autonomy an dil nak thu an nganih. Tui April leh May thla sungih India ram rorel nak sangbik Lok sabha hril awknak dingkhal ah  an thildil,mi a hlawh tlin theinak dingih Manifesto ih telter tu pawlcu an bawmding thukhal an nagntel.
 
(ULFA) pawlin an thildil mi dangah  Assam State ih Assembly ih seat 70% cu  an mai duhmi Assam rammi dikleh tha antimi hrangah an retcia ih. Cui hlei ah tui thawngtla laimi (ULFA) hotu pali pawlkhal suahter an duhthu leh  ramdangmi danloih runglut ru pawl khamnak dingih Bangladesh ramri khar danding thu leh  Asssam ramsungih ramdang ralut pawl hawlsuakih  Innerline Permit hmanve an duhthu khal an tarlang cih.
 
CHin Natinal Day Hmang
 
A Vawi 61st nak Chin national Day cu kan Chin mipi in hmuntinkim ramsung leh ramleng ah hman cio asiih.  Canada ram Ottawa khawpi khalah  Mizansun ah ropi zetih hman asi. Ottawa khawpi ih  Chin National Day hmannak ahhin  Chin mipi ih tlunah  Burma ramsungih tlangparmi midang tamzet leh kawl miphun tamzet khal an tel. Ottawa khawpi ah hin Chin National Day hi kum 7 hman asi zoih  cumi sungah tuikum hi a ropi bikih ruah asi.
 
Hi kan miphunpi ni hmannak ahhin tlangval leh fala hlasak thiam minung 10 hrilsuak mipawlin ramhla mawi thawn  thiamzetin mipi in awi ih. Lam mawi phunphun thawn hman asi. Himi laiah Hlasak thim Tv Peter Hung Ling leh Pi Len Za Ting hlasak nakih an tello ruangah mipi ngaihven an hlawhzet.
 
Can Hman Dan
 
Hi kan miphunpi ni hman nakah hin Sayama Bobawih leh Pi Len Za Ting in Announcers thiamzetin an tuanih mipi in kaihruai thiamin in ti phurzet. Hi kanmi phunpi nihi Pu Sui Ceu in Pathian hnenah hlannak inneih sak hnuah  Fl Aung Ling Peng in  Lairam na dammaw? timi hla mawi in awn nak hla a sak.  Chin National Day hotu Pu Tha Zul, in Mipi hmuahnak leh Lung awi thu thiamzetin a simih. Fl Sunday Par in Chin national Day Statement siar nak a nei.
 
Hi Chin National Day ah hin Minung pathum ih mipi hnenah thucah simnak an neiih.
 
1. Pu Tawk Thang             Halkha
2. Pu  Khuang Lian Sum   Falam
3. Pu  Thang Ning Kee      Mindat
 
 Hi pawlhi Mipi hnenih thucah simtu pawl an si.
 
  Himi hnuah CND khuallian Chief Guest, Mary Lee cu laksawng peknak neih asiih Fl Van Sui Lian Sung in Kanlai hnemrang puantil mawi Chief Guest hngawngah a awrh ter. ih  cumi hnuah Chief Guest, Mary Lee in thusin nak a neicih.
 
Cimi hnuah  Karen Community ai awhin Saw Ler Moo in thusim nak a neiih. Cumi hnuah (NLD) Party ai awhin  U Aung Myint Kyaw in thucah simnak a betin kancan hmanmi cu  Kachin Pastor Koo A Htang in Pathian hnenah lung awi thusim thlacam nak neiin kan cemterih   Cumi hnuah In hnuai Hall Inpi sungah  Lairawl zanriah ropi zet i tlangnak kannei ih Zan nazi 11 ah  a vawi 61 nak Chin National Day cu hman theh asi.
 
Hi Chin National Day thuhi tuanvo neitu Upa Pu Hram Nei Luai, hnenih si kan dawnmi asiih a mai remti nakin Surbung Tlang ThuThang ah tisuak asi.
 
(Visited 46 times, 1 visits today)

Comments

comments

Comments

%d bloggers like this: