Bawm Dingin Cawlta Aw

June 11

Tlawngkai Ninga

Bawm Dingin Cawlta Aw

Siar:

Luka 10:30-37

Na innhnen cu nangmah le nangmah na duh awk vekin na duhdaw hai ve pei.   -Luka 10:27

Kumkhat Sung Baibal:

–   Ezra 1-2

John 19:23-42

Dr. Scott Kurtzman cu Connecticut ram  tthen Waterbury siizung ih minaa rai lam hotu (chief surgeon) a si. Veikhat cu thuzirh dingih a fehnak lamzin ah ttihnungza mawttaw 20 lai khawnden awknak a tong. Hliamhmaa a pu mi pawl lakah a feh ih, “Bawm ttulmi nan um maw?” tiah a au. Minit 90 sung minaa pawl a tuamhlawm ih mi hrekkhat pawl siizung ih a kuat hngai hnu ah, “Ka thiltithei-nak zawn a si ruangah minaa pawl zingbawl taa lo ih taansan hngai in ka feh thei hrimhrim lo. Cutivek ih nung lo dingin ka el aw,” tiah a ti.

Lamzin a feh rerolai ah mi bawm dingin a cawltu mi pakhat ih thu Jesuh in tahtthimnak a sim (Luka 10:30-37). Judah mi pakhat cu damiah pawl in an kai ih a thil an long, a hnipuan an phuak, thizik te in an thawi ih an tlansan. Judah mi puithiam pakhat le biakinn hnattuantu Levi mi pakhat in an hmu nain lamzin khatlam kap in an hrial ih an fehsan.

Judah pawl ih an zomtaihmi Samaria mi pakhat in a hmuh tikah a zaangfah ngaingai. A zaangfahnak cu tuahnak in a langter ih cumi pa ih hma cu siti le sabit hnih in a ttem sak, riahbuk ah a hruai, a tuamhlawm, a hrangih a cemmi hmuahhmuah a pek sak, a ra kir saallam ah a cemzat a pek bet ding thu riahbuk kiltu hnenah a tiamta.

Kan kiangkap ah bom ttul natfahnak tuar tampi an um. An parah zaangfahnak nei in anmah bawm dingah a cawl tatu  si uhsi!   – Marvin Williams

Jesuh hmin in mi va bawm aw,

Duhdawtnak le zaangfahnak kut thawn;

A ttulsam mi pawl le,

Beidong mi pawl bawm aw. – Sper

Zaangfah zawnruahnak cu a cangvai ringring.

Comments

comments

Comments

%d bloggers like this: