Bawipa Zaanriah Hmantlangnak

October 3

Nipi Ni

Bawipa Zaanriah Hmantlangnak

Siar:

1 Korin. 11:23-26

A tican cu hih sang nan ei tinte le hih hai nan in tinte Bawipa a ra kirlai hlan lo a thihnak thu nan phuang tinak a si.     – 1 Korin. 11:26

Kumkhat Sung Baibal:

Isaiah 17 – 19

–   Efesa 5:17-33

Kawhhran tampi ah October thla zarh hmaisabik Nipi Ni hi “Leitlun huap Bawipa Zaanriah Nipi Ni (World Communian Sunday) ti’h an hmang. Himi ni cu leitlun ih um zumtu kawhhran hmuahhmuah in Bawipa Zaanriah hmunkhat ah hmang tlang thei dingih tuahmi a si. Himi ni ah zumtu pawl lakih ka tel thei ve cu ka hrangah a thupizet tiah ka ruat.

Kum khat cu hih ni ah hmailam khual hlapi tlawng peh dingin vanzam cawlhnak (airport) ah ka si ih Biakinn ah khawm thei loin ka um. Keimah lawng ka to ih thuthangttha sungih Bawipa Zaanriah thu, Jesuh an kaih lai le thinglamtah ih an thah tiang ka siar. Cuih hnu ah kan siar ttheumi 1 Korin. 11:23-26 sungih “Bawipa Jesuh in an zuar zaan ah sanghlom pakhat a laak ih …. (c. 23) timi thu ka ruat. Cuti cun sang le sabit ti ih an langter duhmi pawl, le Bawipa Jesuh kan hrangih thihnak a tuarnak thu pawl ka ruat ciamco. Hih caan fang ahhin hmun tampi ah zumtu tampi cu Biakinn thleng thei lo, khawm thei lo le zumtu dang pawl thawn Bawipa Zaanriah hmang thei ve loin a umtu pawl le Pathian biakkhawmnak nei thei lo dingin dawnkhamnak a tongtu Jesuh dungthluntu pawl thawn tla pehzom aw thluh kan sinak thu pawl vun ruat phah in ka tuar thuk nasa.

Tuni ah ziangvek dinhmun le khui tawk hmun ih na um khal asile Jesuh Khrih na ai-ah thinglamtah parih a thihnak thu ruat awla lungawi le hnangam in um aw. “A tican cu hih sang nan ei le hih hai nan in tinte Bawipa a ra kirlai hlan lo a thihnak thu nan phuang tinak a si” (c. 26).    – David McCasland

Hih a sunglawimi pehtlaihnak ih zumtu kan pehtlaih awk tikah,

Jesuh thihnak thu in theihter ih in ciingmangter,

Hmunkhat ah in ttemkhawm ih pumkhat in siter,

Ziangahtile miphun zakip hrangih a pekmi man a si. – Hess

Khrih lawmh tlangnak in thazaang thar le lungawinak in pek.

Comments

comments

Comments

%d bloggers like this: