Bawipa Hnenah Kan Lungawi

November 25

Tlawngkai Nili

Bawipa Hnenah Kan Lungawi

Siar:

Thufim 3:1-12

Bawipa cu na thinlung zate in rinsan aw. Nangmah ih ruahnak le theihnak kha rinsan aw hlah. Thufim 3:5

Kumkhat Sung Baibal:

–   Ezekiel 24-26

–   1 Peter 2

Anna Anderson cu a pasal in tuante’n a thihsan ih fanu pathum thawn harsazet in an rung um. Virginia ah tlawng saya tindan kai zomi asinain Philadelphia tlawng pawl ih ttuan ding ahcun tlaksammi a nei hrih ih hnattuan a ngah thei lo. Curuangah puan-sawp le puan-ttaih, dawr tumpi pakhat ih zial hnawttu a ttuan. African-American pawl cu thleidan le hnon an tong ttheu. A lamzin cu pit ttheh hmansehla, Bawipa cu thinlung zate in a rinsan ih a tuahmi kipah Amah a theitu pawl cu Pathian in lamzin a hmuh hngai ding ti a zum (Thufim 3:5-6). Pathian rinsan ding, A thu thlun ding le A hnenih lungawithu sim ding hi a fale pawl a zirh hngai ringring.

A fanu upabik Marian cu leitlun huap hlasak thiam hminthang lakih tel baan tiang a si ve tikah Pathian hnenah lungawithu sim in thla a cam sak ringring. 1955 kum Carnegie Hall ih Marian ih hlasak puai le Metropolitan Opera ih hmaisabik a telnak a zoh hnu ah thuthangca ngantu pawl ih thusuhnak cu hiti’n a let hngai: “Bawipa hnenah kan lung a awi.” Himi hi a daan men ih a simmi a si lo. Thungai thlak in Pathian hnenih lungawi thusimnak in a simmi ttongkam a si.

Anna cun a tlaksamnak parah riahsia ih um men loin a ttuan theimi a ttuannak parah Pathian hnen lungawinak langter in Pathian sunlawinak hrangah a hmang. Tuni ah kannih tla zumnak thawn Anna ih nun kan zohtthim thei. Pathian rinsan le thinlung takin, “Bawipa hnenah kan lung a awi (We thank the Lord)” kan ti thei ve a si.    – David McCasland

Pathian ih in pekmi laksawng pawl kan ruah tikah,

Kan neihmi hmuahhmuah tlunah;

Lungkim thei lo le phunzai duhnak thinlung pawl hlo in,

Lungawithu sim duhnak thinlung in neihter.  – Sper

Lungawinak cu Pathian mi sinak hminsinnak pakhat a si.

(Visited 47 times, 1 visits today)

Comments

comments

Comments

%d bloggers like this: