Bawipa A Tel Ahcun

Bawipa A Tel Ahcun

 Rev. Run Cung Mang (LCF Malaysia)

 “Na Biakinn thiang sungih a ummi, Na hnenih thangtthatnak hla cat lo ih a satu pawl cu mi lungawi an va si so. Na hnen ihsin thazaang a latu, Zion tlanglam ih thinlung a retu pawl cu mi thluasuak an va si so. A caarmi Baka horkuam sung an feh hmanah tidai putnak hmunah a cang; ttoruah in tikhur pawl cu a khahter ttheh a si. An feh phah in an cak deuhdeuh: Annih cun pathian lakah Pathian bik cu Zion ah an hmu ding.”

– Saam 84:4-7

 Thuhmaihruai:

Leitlun nun hi a caancaan ahcun beidongnak, thinnaunak le ttihphannak hlir in a khat. Ahleice in Malaysia dinhmun ah tla hi cun thinphan ding hi a tamtuk cuang. Hnattuan ngah a har, dam lo ih siizung um, Operasi, rela le palik ih kaih le khih, thawng tlak, damiah ih paisa le handphone lonsak tivek pawl hi theih ding a um ringring. Bible sungih kan hmuhmi: Baka horkuam, a thimmi thihnak horkuam le marah tikha thawn kan nunnak hi a bang phahphah maw ti’n ka ruat. Sihmansehla, zumtu a mi le fa kannih hrang ahcun thukam pelh dah lo Pathian in kan umnak kipah in umpi ringring ih ziangvek dinhmun le tikcu caan khalah thlangam daihnak le tuar theinak, hlawhtlinnak kan ngah thei ringring a si.

 1.                 Bawipa a tel ahcun a caarmi Baka horkuam ah tidai a put

Saam 84 hi thanauzet ih um caan ah thazaang thar ngahnak a si. Pathian theitu le rinsantu hrangah Pathian Biakinn thiang sungih thlen le Amah thawn pawlkom ih a thawtzia le a mankhunzia a tarlang. Saam hla ngantu in, “na Biakinn cu ziangtluk in so ka duh, a sung thlen cu ziangtluk in so ka hiar, Bawipa ih Biakinn sung thlen cu ka ngaizet a si. Ka thinlung zate’n a nungmi Pathian hnenah lungawi in hla ka sa,” a ti. A va mak ve. Kannih teh Biakinn kan ngaina maw? Kan nunram zohfel saal kan ttul. Bawipa thawn pawlkom awknak ah maw leitlun thuhla le nomceennak ah kan caan kan hmang tam sawn?

Saam hla ngantu in hiti’n a simbet: “Na Biakinn thiang sungih a ummi, Na hnenih thangtthat hla cat lo ih a satu pawl cu mi lungawi an va si so! Na hnen ihsin thazaang a latu, Zion tlanglam ih thinlung a retu pawl cu mi thluasuak an va si so. A caarmi Baka horkuam sung an feh hmanah tidai putnak hmun ah a cang. An feh phah in an cak deuhdeuh,” a ti. Hih kan leitlun nunnak ah harsatnak phunzakip tong hman uh singla, Bawipa kan pan ahcun, Bawipa kan hnenih a tel ahcun mangbang vansannak, Baka: ttah-aihramnak sung ihsin lungawinak le thlangamnak kan ngah ding. Kan nunnak sungin thangtthatnak le lungawinak cerhti nung a put thei ding. Hla phuahtu in, “Harnak phen ih lungawinak, buainak phen ih a hmel mawi hmutu kan si, Baka hmun ah lungawinak ka sar suak” a ti bangin ninghan riahsiatnak sungin lungawinak kan hmu ding.

2.                 Bawipa a tel ahcun thihnak horkuam hman ka ttih lo

Saam 23 khal hi Pathian ih milefa pawl hrangah thlangam daihnak in petu a si ve. Saam hla ngantu in Bawipa cu a nunnak neitu le kilhimtu, tuukhal in a tuurun a khalh bangin a khaaltu a sizia a thei fiang. Sammi zianghman ka nei lo. Ei ding tampi umnak tlimno lakah i bawhter, in ding tidai thiang umnak ah i hruai a ti. A thanau caan ah thazaang thar i pek saal a ti. A thimmi thihnak horkuam sung zawh hman ningla maw Bawipa ka ttih lo ding; ziangahtile nang cu ka hnenah na um, Na talhtum le na kianghrol in ka hna in ngamter, a ti. A va dawt um ve. Nunnak ih thinpit mangbangnak ton caan khalah Bawipa ah a tthum aw thiamtu ih nunram ahcun ttih ding a um lo zia, le Bawipa ih umpinak cu an thazaang cahnak huham le an hnangamnak a si zia a fiangter.

Zumtu nulepa ulenau pawl, hih leitlun kan khualtlawnnak lamzin tluan hi vun thlir ttha hnik! Na mizaan, tuni le thaisun hi vun ruat hnik. Bawipa ih duhdawt zaangfahnak le umpit lamhruainak na hmu fiang maw? Bawipa tel lo sehla atu na dinhmun hi na thleng thei pei maw? Cuvekin Bawipa tel locun na hmailam khal ruahsan ding ngaingai a um lo sokhaw. A thupibikmi cu, Bawipa cu i Rundamtu le ka Bawipa a si. Amah cu ka nunnak i kilhimtu le nitin i cawm ih i tawlreltu a si. Bawipa thawn ka um ahcun zianghman ka ttih lo, ka hna a ngam ti theitu kan si ding hi a si. Hla phuahtu in, “Kei cu phaan ding ka nei lo, harsat mangbangnak cu thleng hmanseh, keimah ih a nungmi Bawi Khrih ruangah tuar daan ka thiam si, hmuh thei lo nun lungawinak” timi hla kha na nunram taktak in hlimzet le lungawizet in na sak thei ding.

3.                 Bawipa a tel ahcun tidai khaa cu tidai thlum ah a cang thei

Israel mifa pawl ramcaar nelrawn ah, Pathian ramtiam Canaan ram an pannak thu ka siar tikah mak ka tituk. Atufang ih Laimi kan dinhmun, ahleice in hmun laklawh a simi Malaysia ram ih a taang hrihmi pawl ih thuanthu thawn ka tahtthim tikah Bawipa tel lo ih um cu raap thlak a sizia ka hmu. Asinan Bawipa a tel ahcun ziangkim ah lamzin a umzia khal ka hmu fawn. Israel mi pawl neelrawn ramcaar sungih an fehlai ah ni thum sung rori tidai in ding hmu loin an um thu ka siar tikah ka zaang an faak nasa (Suah. 15). Ziangtluk in a har ding ti ka ruat. Caan tawite niling lakih kan leenvahnak ih kan tihaal hmanah ziangtluk a har? Ni thum sung rori tidai in ding hmu lo ih um cu ziangtluk in so a har ding? A ni thumnak ah tidai an tong nain vansiat le malmak ah tidai kha, in awk ttha lomi a rak si betbet fawn. Sihmansehla, Moses in Pathian hnenih thla a cam tikah Bawipa in thingtan a khihhmuh. Bible thiam pawl in hih thingtan hin Jesuh Khrih ih thinglamtah a kawhhmuh an ti. Moses in cuih thingtan cu tidai kha sungih a vun thlak tikah tidai cu in theihmi tidai thiang ah a hung cangih Israel mi pawl tihaal riamtertu ah a cang tariai. A va mak em.

Zumtu kan nitin nunnak ah tla himi vek kan ton caan a um ttheu ve ko ding. Kan ruahsannak cu ram tthangso le ram picang, hmun nuam deuh ah ei khop ngah deuh in um thei ding hi a si cio ko ding. Asinan Malaysia ah dam lo le naa in retheihnak kan tuar. Kaih le khih tongin thawngtla, palik cianphan le fifir damiah tongin neihsun lonsak le sunralnak kan tong. Bum le nekrawk tong khal bo lo. Hnattuan hmu loin harsa le vansang in kan um. Hnattuan man nihlawh ngah thei loin nehsawh tongtu khal an tam. UN lut duhzet nain lut thei lo, lut thei ko nain remcaang thei loin pending le reject tong tivek khal kan um ruri. Hitivek ih remcaan lonak nelrawn ramcaar ih kan vahvaihlai ahhin Bawipa a pan hna kan thiam ding a thupi ngaingai. Bawipa tel locun mi hrekkhat ih dinhmun cu aatnak thlak le lunghlohnak tlak a si. Tihaalzet caan ih tidai kha in vek a si. Sihmansehla, Bawipa a tel ahcun Khrih thinglamtah ih huham cahnak thawngin nehnak kan nei thei. Harsatnak sungin remcaannak kan ngah saal thei. Beidongnak khawthim sung ihsin ruahsannak khawtleu a suak thei. Thinpit mangbangnak sungin lungawi hnangamnak a suak thei.

 Thunetnak:

Nitin kan bulpak nun, kan innsungsang nuntu khuasaknak, kan kawhhran le kan pawlkom, kan miphun sungah Bawipa a tel ringring maw? Bawipa a tel lo ahcun ttah le ai-hramnak, buainak le hnaihnoknak, iksiknak le nahsuah awknak, ninghannak le beidongnak hlirin kan khat ding. Sikhalsehla, Bawipa thawn kan um ih kan hnen ih Bawipa a tel ahcun Baca ramcaar khal in cerhti nung a put thei vekin a ro a caarmi kan nunnak sungin a hninghnomi lungawinak nun a um thei saal ding. Bawipa a tel ahcun thimnak le thihnak horkuam sung zawh vek sihmang nungla kan nunnak ah hnangam daihnak, raltthatnak le hlawhtlinnak a um ding. Bawipa a tel ahcun kan hmuhtonmi pawl: nelrawl ram ih tidaikha Marah vek sung ihsin thinnomnak, lungawinak tidai thiangte a hung put saal ding. Saam ngantu in, “an feh phah in an cak deuhdeuh” a ti bangin nitin kan nunnak ah thlarau thazaang cak deuhdeuh in kan um dingih cakzet le raltthazet in hmai kan nor deuhdeuh ding.

Mi lungawi, mi thluasuak, mi neinung le mi hlawhtling kan si cio theinak dingah Bawipa cu kan nunnak ih laimuril ah ret ringring uhsi! Ziang tivek caan khal ah Bawipa lawng rinsan in ko uhsi! Bawipa cu a Biakinn sungah thangtthat le biakin, “Bawipa nang tel locun” ti’n Moses banigin thinlung takin thlacam uhsi! (Exodus 33:15). Cuti cun “Baka hmunah lungawinak ka sar suak” na ti thei ve ding.

Pathian in thluasuah malza in sawm sak hramseh!

 BACA HMUN IH LUNGAWINA

– Unice Kham Thiam (Aa Ni)

 1.            Ka theithiam zo Bawipai’ remruah,

Harsatnak le buainak kan tonmi hi;

Kan nun tthangtertu, in caktertu le

A duhdawtnak langtertu.

 

Amah duhdawtu A kawh mi hrang ahcun,

An tthatnak dingin ziangkim A tuah sak ttheu;

Ttahnak phen ih lungawinak,

Harnak phen ih A hmel mawi hmutu kan si;

Na remruahnak cu ka hrangah a ttha,

Baca hmun ah lungawinak ka sar suak.

 

 2.            Beidon ttah caan cu tam hmanseh,

In run hnem ttheu Vanlam lungawinak in;

Hmuhsuam nautatnak Donak kan tonnak,

Bawipa Jesuh’n in tuarpi.

 3.            A caar Baca hmun thleng hman ning,

Ka hmai ah cerh tinung a luangter ih;

Amai’ kut cak in kan nun lam in hruai,

Cahnak ah cahsinnak ah.

 Hminsin:*

Jesuh Ka Lo Duh series sung taa

 

(Visited 63 times, 1 visits today)

Comments

comments

Comments

%d bloggers like this: