Baibal Sungih Theih Tha Sasaw Kuung

unnamed

– Salai Thang Luai

Israel pawl cu Izip ram in ramtiam an thlen hnu ah Pathian hmai ah thu tiamkamnak an tuah. An thutiamkam mi theihpitu dingah lungto tumpi cu Joshua in sasaw kung hnuai ah a phun. Yahweh in Abraham hnen ah fapa A pek ding thu, sim ding ih a feh tik ah Abraham hi sasaw kung kiang ih a um lai a si.

Sasaw kung hi thing `tha a si ih, Lairam khal ah hmuh ding a um. Sasaw kung hi sawkung lole `thilkung ti khal in an ko. Mirang `tong in ‘oak’ an ti ih, Chin (Lai) – English Dictionary ah `thil kung tiah a hmang ih, Chin (Falam) Baibal in sasaw kung tiah a hmang.

unnamed (1)

Thing `tha a si vekin; inn sahnak, cabuai, tohkham, bizu le lawng saknak tiang in an hmang. Sasaw kung hi Asia, Europe le North America ah an um. Australia le South America ah malte hmuh ding a um. Sasaw kung hi phun 400 luan an um ih, burbuk can in pi 80 tiang sang khal an um. Lairam ah phun ziat a um ti hi felfai ih nganmi a um lo nan, amalbik phun hnih cu an um ding. Rah a nei ih, a kung ih zir in a rah khal an danglam. An hnah khal a bang aw lo.

Sasaw rah hi Mirang `tong in ‘acorn’ an ti ih, Blue Jay timi vate le thia-hlei khal in rawl ah an ei. Amak zet mi cu Blue Jay vate le thiahlei pawl in ‘acorn’ hi lei sung ah an thup ih, vur tlak can, rawl ei ding an neih loh can ah an pawrh ih an ei sal `theu ti ah hliakhlai tu pawl in an ti. TV Show khal ah Blue Jay le thiahlei pawl in ‘acorn’ an thup dan le an lak sal dan pawl an ti lang `theu.

unnamed (2)

Israel Siangpahrang Pahnih

CrownSaul ih ruang cu sasaw kung hnuai ah an vui ih, Absalom cu sasaw kung ah a lu/sam a tang ruangah, David ih ralkap pawl in an that ngah.

Saul ih lal lai ah Israel le Philistine pawl hi an rak do aw ring ring. Israel pawl ih neh can a um ih, Philistine pawl ih neh can a um. Tum khat cu Philistine le Israel pawl nasa zet in an do aw. Asinan, himi ni do awknak cu Israel pawl ih sun ni a si. Israel ralkap tampi cu Gilboa tlang ah Philistine pawl in an that ih, Saul ih fapa pathum; Jonathan, Abinadab, le Malchi-shua pawl khal an thi. Himi ni thotho ah Saul siangpahrang khal a thi ve. Saul le a fapa pathum pawl ih ruang cu Jabesh ih sasaw kung hnuai ah an phum.

Absalom cu Amnon a thah ruangah, a pa hnen in a tlan ih, a nui’h sungkhat pawl umnak Geshur ah kum thum sung a um. David siangpahrang ih ralbawi Joab ih dilnak vek in Absalom cu Jerusalem ah a kir thei nan, kum hnih sung cu a pa David a hmu/tawng thei lo.

Absalom cu dai ten um men lovin, a thup ten lam`tatng a tuah ih, netnak ah a pai David ih lalnak a cuh. David cu Absalom `tih ah a tlan. Absalom in a dawi ih, David ih ralkap le Absalom ih ralkap pawl cu an do aw. Absalom ih ralkap pawl an sun ruangah Absalom cu a tlan. Sasaw kung lakah a tlan ih, cuti ih a tlan lai ah a lu/sam cu sasaw kung in a rak awk. Absalom sasaw kung ih a khai awk lai cu Joab in fei pathum thawn a sun. Cutin Absalom cu a thi.

Saul le Absalom hi bang awknak tampi an nei. David dotu an si ih, ral kut ih thi siangpahrang khal an si. Hmel `that lam ih lar an si. Cui’h tlun ah pakhat cu sasaw kung hnuai ah an vui ih, pakhat cu sasaw kung in a rak awk ruangah a thih phah. Saul le Absalom hi sasaw kung thawn khaikhin ding um lo hmansehla an pahnih ih thuanthu cemnak ah sasaw kung a tel veve.

Sasaw kung `thatnak tampi lak ah ‘kum rei a daih’ mi hi rel a hlawh hleice. Thlarau lam ah ‘Pathian ih kilkhawinak’ a khihhmuh ti khal in zumtu hrekkhat cun an sim. Khuahlan ihsin tui san tiang thing `tha ih tling, Baibal khal ih um, sasaw kung hi, minung hrangah `thathnemnak tampi a nei lawng hman si lo, zumtu pawl thlarau nunnak khal ih sullam nei a si vek in a thuhla hi ca ih ngan le kaa ih sim awk tlak a si.

unnamed (3)

(Visited 313 times, 1 visits today)

Comments

comments

Comments

%d bloggers like this: