BAIBAL HI RINTLAK A SI MAW? – By Hre Kio

BAIBAL HI RINTLAK A SI MAW?

(Can the Bible be trusted?)

Rev. Stephen Hre Kio, Ph.D 

Tui san ah cun zumtu Khristian (hrekkhat) khal in Baibal hi rintlak a si lo, ti ruahnak a um theu. Mifimpawl ih ngan mi a si ko lo maw? titu tla an um. Cunah a tawi zawngin Baibal hi rintlak a si, ti duhnak dot sarihin ka ngan duh.  

    (1) Baibal hi an ngan pekte ihsin tuisun tiang kum 3000 lenglo a um zo mi cabu a si. Siangpahrang David san BC 1000 hrawng ihsin an ngan thok ih Zisuh san hnu kum 100 AD tiang an ngan. A ngantu 40 hrawng an si. Cabu 66 a si nain cabu pakhat a si. A tumtah mi cu Pathian duhdawtnak le rundamnak thu a si. Kum tin leilungtlun ah an lei duhbik mi cabu a si ringring. Communist China hmanah kum 20 sungah (1987-2007), UBS (United Bible Societies) hohatnakin Tuluk Baibal  milllion 50 an lei. Cabu menmen a si lo; Milai in an rinsan ruangah an lei a si.   
    (2) Baibal Cathiang hi Pathian tongkam a sangtu profet le tirhthlahpawl ih ngan mi a si ruangah Pathian Tongkam (The Word of God) ih ruah mi a si. Baibal Amah in hiti’n a ti:
    (i) Bawipa ih thu (tongkam) cu a dik (Saam 33:4),
    (ii) Na tongkam cu thutak a si (John 17:17),
    (iii) Ca Thianghlim hmuahhmuah hi Pathian ih thawtkhum mi a si (2 Tim 3:16),
    (iv) Profet ih thusim mi cu milai duhnak men ihsin a ra mi a si lo; Pathian hnen                 ihsin a ra mi thuthang an phuan tikah Thlarau Thianghlim forhfialnakin an phuan mi a si (2 Pit 1:21). 
    (3) Baibal Cathiang hi Jesuh in thuneitu ah a pom. Setan nehnak ah a hmang. Ni sawmli sung sualforhnak a tuar tikah Ca Thianghlim thawn Setan sualforhnak kha a neh (Mat 4:4-10). “Ca Thianghlim in a ti,” tiah voi thum rori Setan kha a ti. Zisuh hmanin thuneitu ih a ruah a si ahcun kannih in “mifim ih ngan cop mi” ti ding a si lo. 
    (4) A hlan ihsin an rak simsung mi (prophesying) kha a kim ngaingai.
    (i) Dan 2, 7, 8 sungah Leilungtlun ih Cozah panga (a sangsangin) an suak ding tiih a simsung mi a kim ngaingai: Babilon, Mede, Persia, Greece le Rom an si.
    (ii) Isai 13:19-20, le Jer 51:37 sungah siatsuah mi Babilon khawpi cu zohmanin an din sal nawn lo ding ih milai zohmanih umnak a si nawn lo ding, a ti. BC 330 hrawngih ram tampi a nehtu ralbawi hminthang Alexander the Great in sak sal a tum; a ralkap 600,000 hrang an ei ding rawl a suah thluh zo. Asinan rinlopi ah a thi. Kum 2300 hnuah Iraq uktu President Saddam Hussein in sak sal a tum zet (pungsan tla a suai thluh zo: 2003) nain rinlopi ah a thi. (USA ralkap in an kai ih Iraq Cozah in kum 2006 ah an that).
    (iii) Israel mipawl an ram ah an kir sal leh ding, ti hi khuahlan lai ihsin an rel ringring mi a si. Assiria ram in siseh, Babilon ram in siseh, khuazakip ihsin an kir ding ti hi an zum zet vekin an kir ngaingai. Cui simsung mi cu kum 1948 ih Israel ram a hung um ih Judah mi tampi an thenthekawknak ihsin an kir sal tikah Zentel can a cem (Luk 21:24); Israel an kir a si tiah tampi in an zum.
    (5) Messiah a suak ding, ti an simsung mi, Zisuh Khrih thuhla a kim ngaingai:
          Profet simsungnak                     Thukam Hlun                  Thukam Thar ah a kim
       (i) Bathlehem ah a suak ding Mik 5:2  Mat 2:1-7;
       (ii) Fala him in a hring ding Isai 7:14 Mat 1:18-23;
       (iii) David cithlah a si ding Jer 23:5 Thup 22:16;
       (iv) Thah thei an tum ding Jer 31:15 Mat 2:16-18;
       (v) A rualpi in a phiar ding Saam 41:9 John 13:8, 19, 26;
       (vi) Paisa 30 ah an zuar ding Zek 11:12 Mat 26:14-16;
       (vii) Fei in an dawt ding Zek 12:10 John 19:16-18, 37;
       (viii) A puan camcawhfung an zuk ding  Saam 22:18 Mat 27:35;
       (ix)  A ruh an khiak lo ding                    Saam 34:20; (Suah 12:46) John 19:31-36;
       (x)  Milianpa ih thlan ah an phum Isai 53:9 Mat 27:57-60;
       (xi) A thih kum le can simsungnak Dan 9:26; Suah 12:6 Mat 27:45-50;
       (xii) Ni thumnak ni ah a thawhter sal Hos 6:2, Tirh 10:38-40; 
    (6) Baibal Thianghlim hi hmual a nei ih milai nunnak thlengtu a si theu. Cabu dang hi bangtuk hi milai thuanthu sungah kan hmu lo. Paul in, “Khrih sungih mi pakhatkhat a um ahcun siamthar mi a si,” a ti (2 Kor 5:17). Asilole, mi pakhatkhat sungih Khrih a um ahcun siamthar mi a si, ti tla a ngah. Voi khat cu tikulh pakhat ah khuaram zoh duhtu khualtlawng (tourist) tampi an feh. Pakhatpa cu “Pathian a um lo,” a titu a si (Saam 51:3). Cuih tikulh ih um patarpa pakhat Baibal Cathiang a siar rero kha a hmu ih, “Ziangahso cuih cabu thuphan tampi an ngannak, milai tuahcop mi cu na siar duh rero?” tiah nautatnak mithmai thawn a sut. Patarpa cun, “Hi Cathiang hi um hlah sehla nang hi kan zanriah ah kan lo ei zo ding,” tiah a let. Hi tikulh um minungpawl nunnak thlengtu cu Baibal Thianghlim a si. Khristian an si hlanah cun misa-ei (cannibals) an rak si. 
    (7) Kan Baibal in, “Zisuh Khrih kan Bawipa thawn pawlkomnak nei dingih a lo kotu Pathian cu rintlak a si,” a ti (1 Kor 1:9). Kan Baibal hi Pathian thuhla le a hnatuannak ngannak cabu a si. Pathian Thlarau ih fialnak le bomnak thawn ngan mi a si. Pathian cu rintlak a si bangin a Cabu khal rintlak a si ve.  
     
    FCFS Magazine Avei(3)nak ta a si.
     
(Visited 150 times, 1 visits today)

Comments

comments

Comments

%d bloggers like this: