B.C.E. 1010 Ihsin Tuni Tiang Israel Ih Zir Dingmi

September 27, 2012 ni ah Israel Prime Minister Benyamin Netanyahu in United Nations ih thu a simnak ah leitlunpi thuhla a  ngainatu pawl hrangih hminsintlak zetmi pawl a tel. Cumi cu Iran in nuclear bombs a tuah thu nasa zetin a simmi hi a si. Israel hrang ahcun, Iran in Israel ih dinghngetnak siatsuah dingih an hringhro ringring laifang ih an dinhmun rori a simmi a si. Iran President Mahmoud Ahmadinejad le Muslim biaknak hruaitu sangbik pawlin Israel ram hi Palestine pawlih ram a si, curuangah Israel ram cu Palestine pawl pek ding a si, tiin a hringhronak ṭongkam pawl cu siar cawk a si nawn lo. Curuangah Isael in hlanlai B.C.E san ihsin tuni tiang thuanthu sungih a zir dingmi pawl cu theihṭha ngaingai mi a si.

Jerusalem hi Siangpahrang David san le a fapa tei sanlai, 1010 to 970 B.C.E., le Siangpahrang Solomon san, 967 B.C.E, hrawng ihsin thokin an Israel ih khawlipi a si ringring zo. Jerusalem hi Temple Mount hmunah a umih cunah cun Solomon in a hmaisabik temple a sak. Cuticun Israel siangpahrang pawlin an luah lan ta. Cun cutawk thotho ah Siangpahrang Herod in a pahnihnak temple, Second Temple cu a saksal. Atu tiang acuih temple cu Jerusalem nitlaknak lam phar kiangah hmuh ding a um lai. Atu ahcun cutawkah nitin in Jews le miphun dang pawl ra in thla an cam ṭheu. Cuihsin Jerusalem khawlipi hlunpi cu 1948 ihsin 1967 tiang Jordan Siangpahrang pawlin kum 19 sung an uk. Cumi siangpahrang pawl cu Muslim pawl an si ruangah Jerusalem ah Jews pawl ra in Western Wall timi nitlaknak lam phar ih thlacam ding cu an kham. Jerusalem ih um Jews hmuahhmuah cu an dawihlo. Jewish, Israel, pawlih inn pawl, zung pawl, synagogue pawl, hlanlai ih pupa ro a simi Olives tlang kiangih um thlan le khanlung pawl, hminsinnak pawl hmuahhmuah khal an siatsuah thluh.

1967 ah Israel ram cu Egypt, Syria le Jordan pawlin an laak ih, an duhduh in Jerusalem tel in an uk. Tuni ah Israel cun Jordan ih uk lai vekin a tuah lo. Jerusalem le a dang hmun thianghlim zate ah Muslims, Christians le Jews pawl cu zalen zetin lutkhuan a pe thluh. Israel in Second Temple, a veihnihnak temple, cu AD 70 ah Rome pawlih siatsuah a tong zo ruangah le Muslim pawlih siatsuah a tong zomi pawl ruangah a fimkhur ngaingai. Biaknaklam hlanlai rosiah pawl cu an kilhim. Islamists pawlin Israel ram le ramsung um hmun thianghlim pawl cu rinlopi in an siatsuah pang ding ti an ṭih. Cucu Afganistan ah Muslim acozah Taliban in Buddha biaknak milem nasa zetzet pawl cu 2001 a siatsuah dah zo. Cuvek in Jerusalem le Israel rampi siatsuah a duhtu pawl a um ahcun an um men thei lo.

Prime Minister Netanyahu U.N. ih a thusimnak ah, “Islamists pawlin leitlunpi huap ih Muslim zate ih lungkimpinak a hawl rero. Annih cun Israel, Europe le America pawl siatsuah an duh. An tuah duhmi cu zalen zetin tuah an duh. Annih cun santhar leitlunpi cem ko in tuah an duh.

“An tumtahmi cu Nitlaknak lam ih sanmannak le ṭhansonak pawl siatsuah ding cu a si. Annih cun Nitlaknak lam pawlih ṭhansonak le sanmannak pawl cu an daw ih an hua. Kan economic a ṭhangsomi le pumpaak zalennak kan neihmi pawl hi an daw ih an hua. Islamist Muslim hnipuan hruk ih Muslim daan thlun ding lawng an duh. Anmai ram ah kanmah cu in hua. An ramsung ah um in siang lo. Muslim tampi in Nitlaknak lam nuntu khawsakdan an cawngih, ramukawkdan khal an cawngih an ṭhanso vivo tikah an thin a heng.

An lungkimmi Muslim daan cu mi hmuahhmuah thlun ding an duh. An ruahdan a bang-awmi Muslim hlandaan feekfeek pawlin sanman Muslim pawl cu an that. Cucu tuni ih nitin kan hmu ringring mi Sunni,  Shia le Alawites pawl karlak ih thahawknak pawlin fiang zetin a sim. Sunni pawlih ram Saudi Arabia le  Shia pawlih ram Iran pawl kan zoh tikah Saudi Arabia in U.S. hnenah Iran dem ding a forh. New York Time ih tarlangmi vekin Syria inn sungsang tampi cun Shia tamzet umnak Iraq ram ah umnak hawl in an pan. Ziangahtile Syria ramsung ah thahawknak a sosangtuk ruangah a si. Cucingin Sunni pawlin anmah le an rualpi inn sungsang pawl cu Iraq, Shia ram, pan lo dingin an kham hrih.

“Himi pawl ruangah Islamist pawlih sidan cu ziangvek a si ti cu nan ngaihtuah thei ko ding. Cucu Israel do ih neh ding hi a si. An thil titheinak power pawl hmang tahrat in an duhdan vek cekci in Jerusalem le Tel Aviv khawlipi lamzin pawl tlunah Jews pawl thah an duh. Duhtawk in hrem an duh. Kei le kan lak ihsin mi tampi in France le Germany ramhnih kom hnakih cak sawn dingin Iran cun a zuam rero a si tiin kan zum. Ahlan ah Iran hruaitu pakhat in, Iran ih kan neih dingmi nuclear bomb pakhat in Israel rampi a siatter thei ding tiin a sim zo. A ngaingai ahcun kanmah hnakin Muslim leitlunpi hrangah tih a nung sawnmi a si. Cuvek cu Israel in a net tiang kan siang hrimhrim lo ding,” tiin a sim.

Atufang ah rampi tampi cu President Obama ih homi U.S. in a ho ih Iran tlunah siipuazi hrembetnak a tuah rero cu a si ko e, asinan cumi cun Iran in tumtahmi cu cawl ko a tuah thei lo ding vekin a um. An siipuazii a tlaniam ruangah a rim phahnak a um lo. Curuangah ziangtin tuah sehla a ṭha ding? Hrekkhat cun U.S. in a zamrang theibik in Iran hi cawhkuan pek thlang sehla, a cuih cawhkuan cu raldonak khalin sisehla, U.S. in Israel bawm sehla tiin an duh. President Obama in Jack Kennedy sanlai ih Cuban missile thubuai vekin sa vutvo in thungrul thlang sehla tiin tla an duh.

Prime Minister Netanyahu in U.N. ih thu a simnak ah ahlan New York Times ih editor a tuan dahtu Bill Keller ih thu a relsal. Cupa cun Iran in nuclear nei sehla a ṭha ve ko tiah Sep 9 ah a sim dah. Cuvek ruahnak lungput nei tla kan um ko ding. Atu tikcu hi leitlunpi in thil pahnih hril dingmi a nei ih, cucu Iran in nuclear cu nei ve men seh tiih ṭhencat ding maw, nei lo dingin kham uhsi tiih ṭhencat ding hi a si. Hril ding harsa zet veve a si. Iran in nuclear nei seh tiin ṭhencat sehla, Iran in U.S. ih New Jersey State tia fang a simi Israel tlunah a duhduh in tuah ko seh ti thawn a bang-aw a si. Iran in nuclear hriamhrei cu a thupten a forhfialmi mihel pawl, Hamas le Hezbollah pawl cu a pe tengteng ko ding fawn si!

Cuticun Middle East ah nuclear ral a tho dingih cuihsin leitlunpi cem ko in ralpi veithumnak vek ralpi tla a suak ko ding. Middle East ah nuclear ral a tho ding cu kan zapi hrangah a ṭihnung ngaingai mi a si. Israel cun zaan ah thawten a itthat thei lo dingih, Iran in nuclear hriamhrei hmangih a do pang a si ahcun a theitawp suah in an kham-aw ve ko ding ti cu nang khalin na ruat ngah ve ko ding. Israel in 1983 kum ih Czechoslovakia rampi ih tonmi vek vansiat siatralnak cu hmaton ve lo dingin a zuam ve ko ding.

Prime Minister Netanyahu in Iran thawn pehpar in a kimcang theibik ih timtuah ding le Israel humhim ding cu kan liang parah ṭhum-aw a si tiah a sim. “Zovek Israel PM khalin rampi dinhmun a siatthei tikcu a thleng ahcun, rampi humhim dingah midang pawlih lungkimpinak thawn kan hmailam hrang himnak dingah a tuah tengteng a ṭul. Culo ahcun, hruaitu tling a si thei lo ding,” tiah a sim ih, Israel hi rampi pakhat a si hlanah siatsuah a tong dingmi cu ramdang pawl hnenah bomnak dil ding asinan atu ahcun rampi pakhat a si ruangah bomnak dil a ṭul lo tiin a sim. PM Netanyahu cun, “A ṭha. Tuni ahcun bomnak kan dil lo, asinan kan tim kan tuah,” (“Well today we do not beg, we prepare,”) tiah a simbet.

INTERNET

(Visited 112 times, 1 visits today)

Comments

comments

Comments

%d bloggers like this: