Awphei Thuah (double vowels)

10570348_678390772253635_2137786650775024329_nThuhmaihruai

Awphei thuah hi a duhlotu pawl cun, ca ngan tikah cafang pakhat a tam ih, canganmi a sauter men; Awphei kan thuah khal le a aw a sau cuang lo; Cun, a sau le a tawi, thuah ding cin theih a har ih thuah lo lawlaw a tha, an ti. Asinain, thuah lo duh pawl hi, “o” ih ngan dingmi tampi ah “aw” in ngan a duh thotho ih hi khal cafang pakhat tam ringring a si thotho ruangah an tansan a fek lo nasa. Awphei thuah duhtu pawl hrekkhat cun, kan awsau hmuahhmuah ah thuah an duh, an tum ih, buaithlak thotho ah a cang fawn. Curuangah IPA ih awsuahterdan, cakalhmang ih duhdan, awsuak cafang hmangtu pawl miphun dang ih an rak hmandan pawl thawn kan run tarlang hnik pei.

Awphei thuah tikah aw a sauter maw?

A naibik awsuak cafang hmangtu Mirang pawl in hmandan kan zoh tikah, biazai le nunthuleng an nganmi tete kan zoh sile, aw an sauter tikah, awphei an thuah ko; Tahthimnak ah, “Ooooop!” tivek in tampi hman an thuah. Himi thu ah “awphei thuah ruangah aw a sau” ti hnakin aw sauter an duhmi kha siartu mipi theifiang dingin an duh tikah “awphei thuah an hmang” tiin a fiangsawn ding ka zum. Cun, awphei thuah a um tikah, aw sauter in siar ding, khi a rak si ve. Cutiin ka ti tikah, Mirangca hmanthang (common English) ih awphei thuahmi pohpoh khi awsau an suak, ti duhnak a si lo; Special ih thuahmi pawl rel duhnak a si sawn. Curuangah Chin cangandan ah khal himi hi kan theihthiam a `ul. Awsau pohpoh ah thuah thluh siloin special in thuah tul kan nei theu. Tongfang pakhat ih sullam dangdang suak ding pawl lawngah awphei thuah hman ding, tinak tluk a si.

Awphei thuah hman tulmi tongfang pawl:

Awphei thuah hman tulmi tongfang pawl kan theihfiang a tul. Cumi pawl cu hitiin simfiangnak kan run ngan hnik ding:

1. Tongfang pakhat, awfang pakhat pawl ah:

Tongfang pakhat hi awfang pakhat maw, pahnih maw, pathum maw, cuhnak ih tam maw, a um thei ih cumi ah awfang pakaht tongfang pakhat kan ngan tikah sullam dang suak thei tongfang (awfang) pawl cu kan duhmi awsau hminsinnak hrangah awphei kan thuah tikah tampi thathnemnak a nei. Tahthimnak pawl ka run tarlang hnik pei:

Aa       = Miaa, mibanglo ti simduhnak

Caan    = tikcu caan

Daan    = Moses Daan, bylaw, Khawtlang daan

Zaang = kan dunglam taksa, zaang

Thii      = Minung thii, ramsa thii, taksa sungih a timi thii

Tuu      = Rannung tuu

Ti duhmi cu awkhat suak tongfang pawl ah zatlang hman ding cu awphei thuah a tul lo ih, sullam dang tampi nei thei, kan fiangsual theimi pawl ah, sullam pakhat lawng nei dingmi awsau tongfang ah awphei thuah kan hman tikah, tampi thathnemnak a nei. A luantuk cun hmang lo sehla, awsau pohpoh awphei thuah thluh ding cu sim duhmi a si lo.

2. Tongfang pakhat, awfang pakhat hnakih tam ah:

Tongfang pakhat, awfang pakhat hnakih tam ah cun sullam theihfiang sual thei, thuah lo ih harsatnak a um ding rori lawngah awphei thuah hmang fangfang sehla a thabik. A cang theitawk cu awkhat suak tongfang lo ahcun hman lo thei hi a thabikmi a si. Tahthimnak run tarlang sehla:

Aanka              = tongkam, simmi, thucah

Kombeet         = kombet thawn sullam a bangaw lo.

Thongbet         = thil pakhat ka thong ih adang thil pakhat ah a betaw.

Thongbeet       = voi khat ka thong hnuah ka thongbeet.

Zaangfah         = Zangfah

Himi “zaangfah”  tongfang hi thuah lo khal ngahmi a si. Ziangruangah tile “zangfah” tiin kan ngan tikah sullam pakhat lawng a nei thotho ih awsau in kan suahter theu; Awtawi in suahter sile kan tong ah sullam a nei lo. Chin tong thiam lo pawl cun, awtawi in an siar sual pang sile, a mawi lo tuk, ti men ruangih awphei thuah duhtu an umnak a si. Thuah tul rori a si lo nain, thuan lo tikah siar sual le tongkam mawi lo vek a suah ding ruangah pomsak ding men fang khi a si. Chinmi siar ding lawng ruah ahcun awphei thuah tengteng tulmi a si lo.

Hiti vekin adang tampi khal awfang pakhat hnakih tam a suah ahcun awphei thuah lo theih lo rori lawngah thuah fangfang ding a si.

Hminsin: Cafang thuah hi awphei lawng siloin awtung khal thuah a tul ahcun thuah theih a si ko. Tahthimnak ah “inn” tla kan rak thuah ih “in” thawn sullam dangdang an si, sullam pakhat neimi hminsinnak ah “inn” kan rak hman hi thil tha ngaingai a si. Bulpak hmin pawl ah awsau a um ih cafang thuah kan duh ahcun awtung thuah (double consonant) hi hmang sawn sehla khal theihfiang a ol ngaingai. Tahthimnak ah “Professor Riang Vell” tiin dunglam cafang “ll” a thuahin amah in khal a hmin a ngan tikah, “Veel” tiih awphei thuah “ee” hnakin a dunglam ih awtung thuah “ll” hi a mawisawn tiin ka hmu. Bulpak hmin a si ruangah “a sual” ti theih khal a si lo. Kawl pawl in Mirang cafang in an ngan tikah “Lynn, Shwe Mann,,,” tivek ih an ngan khal hi kei cun, a mawizet in ka hmu.

Ref: H. Sui Lian Mang ih nganmi Chin Cakalhmang (Chin Grammar) sungta a si.

 

Comments

comments

Comments

%d bloggers like this: