Awnmawi Tuah

February 18

Tlawngkai Nithum

 Awnmawi Tuah

 Siar: Saam 126:1-3

 Pakhat le pakhat saam hlabu sung hla, aap awknak hla, thangtthatnak hla le hla thiang in bia aw uh. – Efesa 5:19

 Kumkhat Sung Baibal:          Puithiam 23-24           Marka 1:11-22

 Ziangruangah khuai pawl an awn ti na the maw? Ziangahtile ttongfang an ciing nawn lo ruangah a si.

Himi capohnak thawn pehpar in lunglam operation tuah hngak ih a um mipa ih thu i vun mangter. Operation tuah sual khal a um thei men ti a ruat ruangah thinhar le lungleng in a um ciamco.

Culai ah siizung hnattuantu pakhat a ra ih operation khaan ah a fehpi. Hnattuan pa in, “Nangmah lawng ka sunmang na si,” timi Pathian hla a sak kha a thei. Cutikah a suahkehnak Ireland ram ih hringdildel lo, a siat thlangmi hlanlai ih lungto phunmi pawl a vun mang saal. Cumi hla in a thinlung kha inn ih um vekin a ruat awter. Hnattuan pa hlasak a ttheh vete’n minaa pa cun, Horatio Spafford ih hla, “Ka thlarau hrangah a ttha” timi hla a sak cih ve.

Operation tuahnak khaan leng an thlen tikah hnattuantu pa hnenah lungawi thu a sim. “Ka ttihnak hloter dingah le ka thlarau thazaang tlunter saal dingah Pathian in tusun a lo hmang,” tiah a sim. “Ziangtin so?” tiah hnattuanpa in a sut tikah, “Na hla sakmi in Pathian cu ka hnenah a run keng,” tiah a ti.

            A si, Bawipa cu kan hrangah thil nasazet a tuah a si (Saam 126:3). Kan thinlung sung cu hla in a khatter. Kan hlasakmi kha midang thlarau cakter saalnak ah a hmang ding a si.

                                                                                     Ka Bawipa ka sunmang si hram aw,

Nangmah lo runtu dang ka nei lo;

Suun le zaan in ka ruahbik mi na si,

Na umpinak cu ka it le ka thawh khalah tleunak a si.

(Visited 26 times, 1 visits today)

Comments

comments

Comments

%d bloggers like this: