Tualkhiang Nauhak 3 Ni 5 Sung Hlo

Kawlram le India ramri Cikha Township sung ih um, Tualkhiang khua ah March 2, 2012 ni ahkhan Nauhak 3 cu ni 5 sung rori an hlo! Khuapi unau le khuaseh hnenpawlin ramhnuai hmuntin kiltin an dap/hawl hnu khalah an hmu loih beidong le mangbang zet ih ruahsannak khal an neih thei nawn lo hnu ah Pathian bawmnak le kilhimnakin, March 7, 2012 (Wednesday) zanlam 2:00Pm hrawngah, Haiciin ram Haupi Kawl nisuahnak lam, Tangha vâ kiangah Cangai khawrh ih feh, Haiciin khuami nunau 2 in an va hmu ngah ngêlcel.

Famkim Siarbet

Mizoram MST Bus Cangsual Ah Mi 16 Thi

Ni 3.3.2012 zarhte ni, sunlai 12:30 hrawngah Mizoram MST Bus MZ-01G/9038, Aizawl ihsi Vaitin pan (minung 34 to mi) cu, Darlawn khawn lan (km 1 hrawng ih hla) ah a Accident ih, a hmunah minung 9 an thi cih! Darlawn Damdawi inn lamah mi 7 thi bet lala in, hi ca kan ngan tiangah mi 16 an thi zo ti a si. Hliamhma tuar bese taktak an um hnuaihni lai ruangah thi zat hi an pun bet lai zum a si.

Mithi hmin pawl-
1. Rinmawii (32) D/o
Thianhlima Sakawrdai
2. Pahlira (54) S/o Hminga
3. Thamami W/o Pahlira
4. Lalngilneii W/o Lalthudika
Vaitin
5. Lalsawmliani W/o Tlangruata
Vaitin
6. Rosanga H/o
Tangrochhingi, Vervek
7. Tlangrochhingi W/o Rosanga,
New Vervek
8.Engmawii W/o Thangliana
Khawdungsei
9. VanlalhriataS/o
Dengchhunag,Khawdungsei
10. Rothagkimi W/o Autea,
Sawleng
11. Lalthanzama Sunhluchhip
12. F. Lalthanglian, Driver,
Bawngkawn
13. Vnlalchhawna,Conductor,
Upper Rep
14. lalnuntluangi (2) D/o Lalthianghlima, Luangmual
15. Dingpuii,Khawdungsei
16. SK Batra P&E Department
pawl an si.

Darlawn khua ihsin Sihbial zin (PWD pumpelh zinhlun) ah an tlan ih, lamzin black-top lo a sivekin a nêm deuh ih, “zinthlang lam kan nêk deuh ruangah nuamte te’h liam thla in, hlapi (tivâ) tiang kan riil ih Bus tlun khuh khal a thlong, linglet zawngin a um” tiah Bus cuangtu pakhat cun a sîm. An cangsual daan hi, an cangsualnak bul ih nu pakhat feh cun a rak thei ngêlcel ih, Darlawn leh a kiangkap khuapawl cu a pun khawm ih runsuah hna leh thilri thiar suah hna, tlawmngai in a t’uan cih a si.

Accident nak hmunah hin DC, Aizawl, SP Aizawl leh MST Asst. Director, MST pawl an feh hngal ih, Transports Minister Pu PC Zoramsangliana, Pu H. Rohluna, Minister leh Pu H. Darzika, Transport Secy pawl khal mipi thlamuan dingin an feh.
Pu PC Zoramsangliana, Transport Minister cun a Department comi a sivekin ka mawh a si tiah Minister ihsin Bannak, Chief minister hnenah a theh lut cih. An pawm le pawm lo cu CM thu a si ding. Mithi le hliam pawl hi, Darlawn Hospital ah lak an si ih, Doctor a um lo laifang a si ruangah Aizawl le Khawruhlian Medical team pawl an feh ih a hmunah post mortem hngal an si ding. Accident thuhla a theih veten Chief minister Pu Lalthan Hawla cun Transports le Forests minister pawl, Magistrat le palik pawl a fial hngal ih mithi cu Aizawl ih post mortem sese t’ul loih a hmun ih ti hngal dingah Doctor le a t’ul mipawl a fial cih a si. Aizawl Civil hospital khal ralring aw ringring dingah a theihter bet.

CM cun Magisterial Inquiry a din hngal. Bialtu MLA Pu Pianmawi cu hi thilthleng a theih veten cangsualnak hmun a pan hngal ih, Aizawl DC le SP in thlun bokin, DGP Pu Lalrokhuma Pachuau cun first batalion Doctor Lalparliana le a t’hihruai pawl a fial ve hngal a si. Pu Zoramsangliana cun Mithi sungte a tuarpi thu le hliamtuar pawl an t’hatsuah lohli theinak dingah a duhsak thu a sim hai.

Ni 3.3.12 thotho, zanlam nazi 2:00pm hrawngah khan Lunglei ah LPK Truck a cangsual ih, minung 21 cuang in, hliam tenau an tuar thluh ih, vant’hat ah thi cu an um lo ti a si.

LPS

Tio Ah Mi 2 An Kap Aw That

Falam peng, Hmawngkawn khua ihsi Vangchhia ih vai zo, Pu Khaw Lian leh Kawlrammi pakhat (Kara ti ih theihmi) cu ni 23/2/2012 ah Vangchhia ihsin Local Council Vote thlak thluh veten, Mizoram le Chinram rit awknak Tio kap hrawngah ramtawi in an feh ih, tawkfangah meithal zunhnih puak theih a si ruangah an vawng zoh ih an pahnih in, thi ih hmuh an si. Himi thilthleng hi a san theih a um hrih lo ih, Palik pawlin an zingzawi rero lai tiah Hmawngkawn ihsin thuthang theih a si.

Thuthang famkim update kan tum ding.

A Nupi A Thah Hnu Ah Mipi Thinheng In Amah An Cil That

A nupi hrok hri at cat ih thattu Pu Kap Than Mawia cu mipi thinheeng in amah an cil that.

Ni 12/2/2012 siim lam 2:30pm hrawngah khan Tlungvêl Venghlun ih um Vanlalthuami kum 27 D/o Lalrama cu an In hnen pa a pasal vek ih a kop Pu Kapthanmawia kum 30 mi cun a In ihsin dawi suakin khawlakah a bawh bet ih Namtawng in a hrok hri a at/zai cat ih, Vanlalthuami hi a hmunah a thi cih! Vanlalthuami hi, a biang le a sip khalah nam ih sahnak a um. Khawlak ih an bawhbet awk lai (a hngawng a at lai) hi a hmutu an umnan midang a pun sungah a rak thi man zo ti a si.

Pu Kapmawia hi an nu a thah hnu ah amah le mah khal a hrok hri at cat ih thah awk a tum hmel nan, a vumpi pilh fang lawngin a at aw ngâm ti a si. Amah hi mipi thinheeng cun a cîl ciamco ih, (khawtlang hruaitu le MYA in a dang thei lo) a him sawnnak dingah YMA hruaitu pawlin Aganwadi insungah an ret lut nan, a hliamhmâ tuar lovin a thi cih.

Vanlalthuami le Kapthanmawia hi man le mual pekawknak um lem lo ih nupa vek ih um tlang an si ih, fa an nei lo tiah LPS cun a tarlang. An ruang hi, anmai khua veve Tlungvêl le Thingsûl ah lak an si.

Thulaknak: LPS Chibai Mizoram (13/2/2012)

Ngui Ringring In Minute 2 Dîng Ding

CT News Mizoram | January 29

India cun zalennak a sual lai ih nunnak liam (thi) pawl hngilh lonak dingah January ni 30, 2012 ahkhin ram pumah Martyr’s Day hman a si zik ih, Mizoram acozah cun himi ni pual hin Tlawngkai nikhat sunhlan sml 10:59 – 11:00 karlakah Siren a ti awn ding ih, hnattuan ih feh hmuahhmuah khalin an hna cawlhsan lawkin, ngui ringring ih minute 2 sung cangkhai loih din ding a si.

Minute 2 a liam ti theih theinak dingah Siren hi sml 11:02 le 11:03 karlakah ti on sal a si ding. Aizawl khawpi sung ih Veng tin ah Local Council aurinnak hmang ih phuang darh dingin Mizoram acozah cun a ngen a si. Mizoram District dangah cun Martyr’s Day hman daan ding hi an DC pawl hnen ciar ah ttuanvo pek a si ih, Sub Division, Block le Village Level Office hmuahhmuah khalah hi caan hi, hmang cio dingah theihter an si zo. Fim zirnak inn tinkim khalah hi caan hi urhsun tak ih hmang ve dingah acozah cun ruahsannak tumpi a nei.

Saikhum Khua An Tthiat Tum

Mizoram nisuahnak lam ramri ih um Saikhum (Phaibok) khua cu tthiatbal thluh ding ih ti a si ruangah khuasung umpawl a khawnawtin harsat buainak an tawng!

Ni 16/1/2012 ni hi, a khawnawt ih suaknak caan an pek ni netabik a si ih,
Kawlrammi Inn 20 lenglo umpawl cun, a hleicè in mangbang vansang an lam thu khuasung mi kan biak popnakah CT palai an sîm.

Mizoram mi diktak khal himi khua ah zohman um an siang chuang loih, Saikhum khua hi tthiah an duh hrimhrim a sithu khal an rel tel. Saikhum khua tthiah duhtupawl hi Vaphai khua mipawlin Mizoram acozah an nawrmi a si thu khal CT palai an sim tel. Himi khua ih Zato an sakmi khal kha, Palik pawlin an khar sak zo.

In le lo hnget neizopawl khal forener case ih nawrsuah an tum ti a si. Inn 60 kimnak khua ihsin, Burmami Inn 20 pawl cun suah/tlun nak ding an neih lo ruangah an umnak Innpi an tthiah a si khalle suahnak ding an neih lo thu khal an rel tel ih, an tthiat simaw an nawkkang simaw a si khalle, mitthli thawn zoh men lo cu ti thei kan nei lo ding tiah kan palai an sim.

Himi thu kan lak lai ah Palik OC cu commitee nei dingah Vaphai ah a so lai ti a si.

Laitlang Ah Motor Accident!

Ni 16/12/2011 zanlam nazi 5:00Pm hrawngah khan Fartlang khawdai (Falam peng) ah Mawtaw a let ih mi pakhat a thi!

Rih ihsi tlung Alian Pa Motor cu, Fartlang khawdai zinkawi ah a ke dunglam a tla ih a let. Motor ih to hi report kan dawn vek asile minung 50 hrawng an kîm ih, vansiat le malmak ah Pu Lian Thuama le Pi Nuam Boih (Khawpisip) tei fanu Lal Nun Sangi kum 12 cu a hmunah a thi! Mi pathum hrawng hliamhma tuar an um ih pakhat cu Tibual Zato ah an pan pi. Hi Motor hi Biakte, Cinmual ih mawnmi a si tiah report kan dawng.

Vansiat a tawngtu Lal Nun Sangi ruang hi, Falam ah Post moretem dingin a zan2 ih feh pi ding a si. A nu Nuam Boih hi, Locom khawsuak a si.

Vanduainak tawngtu inn sungsang hrangah thlacam pi cio uhsi.

CT ah casiar ding a tam sinsin

Chinmi website lakih t’ha bik le cangtlung bik ih sim theih CT website ah nikhat hnu nikhat casiar ding an tam/pung sinsin. Ziangahtile, hotu sungt’uanpawl ih nan t’hahnemngainak lio2 le miphun nan duhdawtnak zar lio2 a si in a lang. Nan parah lungawinak simcawk lo ka nei.
Kan mi rinsan pawl khalin an theih/thiamnak pawl an rawn bur khawm ih, a cangtlung sin2 fawn.

A hlan deuh ahcun thuthang siar ding hawlin kan unau pawl website ah inthlahrung aw zetin ka leng dukdo threu ih, rualdawt a na duh nasâ. Ziangahtile, zodaizilthli thiangte lennak kan Lairam nuam ih umpawl (keimah vek) hrekkhat pawl cu kan Chintong (Falamtong) bak thiam/theih kan nei loih mirâng website ah ruaht’ham lo thuthang tampi siar ding um khalsehla, umzia a nei lo a si.

Atu cu website dang bih rero t’ul loin, kan Chintong website CT & CW ah thuthang siar ding lawng siloin, IT lam zirnak, Sermon, Awnmawi, Laitong zirnak… tvk tampi a um t’hep2 thlang ih, tampi ka hlawk pi a si. Cuihlei ah CT fehtlang ih zuamawknak pawltla timtuah a si leh zel hi, ropi ka ti zet. Hlawhman nei lo ti theiaw cingte le Chin miphun duhdawtnak ruangih t’uanvo an la ngam hi, suantlak le sunlawih tlak an si vekin, Chin miphun hmin vek khalih sunlawihnak Capi pektlak rori an si ka ti duh.

Cun, website lengtu pawlin kan casiarmi parah coment tampi pethei tum cio sehla, cangantu’ hrangah tha tampi a um lawng siloin, casiartu khalin kan hlawkpi sin dingah ka ruat.

Hi vekih kan mi tlawmngai pawlin website t’ha in huun ta cengmang cu, Leitlun ramkip ih um kan Laimi fimpawl khan, thu/hla tampin rawn burkhawm fing2 dingah phung ka lo sawm bet.

Chin miphun hrangih thu/hla tinkim in hlawmtu CT dam ring2 aw.

Zodai Zilthli