MOTHER’S DAY

MOTHER’S DAY

BY Salai Tin Lian

Mother’s Day hi hlanlai ah cun Greek pawl in an pathian NU sunlawihmak ah an rak hmang. Roman Catholic pawl in Jesus nu Mary sumlawihnak ah an rak hmang. Kan dunglam kum 150 ihsin khan Mother’s Day hi Kohhran ah  hmang a si.  Christiannak ih Mother’s day hramthawknak cu Anna Jarvis in society sung ih mi hrisel lo le rethei pawl ih dinhmun theihthiam a tulzia le society in an tuarnak a theihthiampi ding hi NU pawl ih mawhphurh a si ti ih a au ni cu Mother’s work day tiin a rak ko. Anna Jarvis a thih hnu ah, a fanu Young Anna in a NU damlai ih thiltha a tuah mi pawl sunlawih upatnak le theihnghilh lonak pangpar cu West Virginia Biak Inn ah hlannak a nei.

Hi ni hi leitlun in sunlawih upat tlak NU pawl ih NI (mother’s day) ah a run pawm ih tusan zumtupawl in May Cawlhni vawihnihnak ah kan run hmang. Mi hmaisapawl cun  hi ni ah an NU le sunlawih upatnak ah  Biak Inn ah an feh, an nu le cu  ca in si maw, card, present le pangpar an pe theu.

Kan nih Laimi zumtupawl in Mother’s day kan run hmeltheihnak khal a reihrih lo ih, a hman dan khal kan theithiam tawk hrih lo a bang. Mother’s day hi Nu pawl sunlawih upat peknak lawng ih hman ding a si lo ih, NU pawl in an dinhmun le sinak tawk te ih Innsang, Kohran le Society ih an pekawknak theihpi le pawmpinak thawn hman ding a si. Mother’s day hin leitlun hrang ah thu (message) ken tel mi a nei ih, Nauhakpawl hnen ah NU an thupitzia le tihzah ih sunlawih upat tlak an sinak a zirhtir ih, Pa pawl hnen ah Nu ih dinhmun le sinak leitlun tlun in a tulzia a theihtir. Cuhlei ah Nui thupitnak thei hrih lo tu  NU pawl hnen ah an mawhphurhnak a theih tir fawn. Nunau palbetnak ruang ih kan society hma a sawn thei lo nak khal in zirhtir.

Rel duh mi cu Nu fim le thiam (fit) taktak kan nei nan pasal an neih ve ten Kohran le society ah hmantheih lo in an hol ral. A san cu retheihnak ruang ah kan ti men thei, a ngingai ahcun society in NU a sinak tul lo tuk vek ih a retawk ruang ah a si sawn. Nauhakpawl in NU le sunlawih upatnak ih pangpar pek le, sunlawih tlak NU an sinak theihthiampi ih sunlawih upatnak cakuat, card, present le pangpar pek cu Mother’s Day ih hramthawknak thuanthu (historical background) a si ih, Christian nun mawi khal a si.

Nu ih mawhphurhnak le sinak hi Inn sang lawng in a mamawh loih, Kohran le society khal in a manawh. Nu tel lo in  leitlun hi a famkim thei lo. Nu hi leitlun ih mawinak, nawmnak, daihnak le hnangamnak nan si. Curuang ah mi zo khal  Pathian in NU vek ih in duhdawtnak le in lainatnak hi NU pawl ih nun ah um ding le lang suak ding a si. Nu nan sinak ih par le rah cu mizokhal thleidannak um lo in tlan theih ding a si. Mi hmuah hmuah ih nu nan si ih, cui nan sinak ih rahsuak duhdawtnak le lainatnak cu Innsang tin, Kohrantin le Society tin in an tul. NU pawl ih nan zirhnak cu a kangral theilo mi RO sunglawi a si. NU tha na sinak le Nu pawinawh na sinak Mother’s Day in a lo nemnghet zo. Nunau nan si ih ruangah thinnau lo in, nunau nan sinak  ruangih leitlun in sunlawihnak a lo pek ruangah lungawi uh. DaihNak le Remnak leitlun ih hring suak tu NU s ihram aw.  Happy Mother’s Day

“HNANGAMTEN I UMTER AW”

“HNANGAMTEN I UMTER AW”

Mai Dai Dim

“Kiring…..kiring….kiring….” ‘Pa Buai’ ih phone cu a ring rero. Phone lak a tum rero nan a hnattuanmi ruangah a la theilo. ‘Nu Lak’ cu a thinheng tukah a phone lehlam sutkuai a tum zuakzo. “Buai Cin Thang’ ti hmin rori khal na keng tho!” tin amahte a phun thektho. “Hey… Na boyfriend cu phone a kailo lala maw?”  a rualnu ‘Rina’ ih “aw” a theih in a her ih, “Hmmm…..” tin thawpi saunawn thaw in a let. “Pa Buai’ cu an cawlhcaan a kim in a phone a zoh ih misscall veithum rori a rak um. Zamrang zetin a von ko salih, phone ring awn ahcun, “Take me to your heart, Take me to your soul. Give me your hand and hold me….” ti a ra. Phone ring hla awn cu amahten a pit sal. A ko sal. Hla a ra sal lala. A phone cu a von zoh ih, “Call is waiting….” tin a ra ngan aw. “Hmm!!!! ‘Nu Lak’ ti rori khal na si tho. Lak thei ko hi aw…..” tin a phun hmukhmo.

Suncaw ei dingin a suncaw bawm cu a von ong. A kiang ah le kala (Indian) pawl lawnglawng an si fawn. Rawl ei huamnak thinlung khal a nei nawnlo. ‘Pa Buai’ cu ‘Singapore Changi Airport’ ih hnattuan mi a si. Ingineering lam a si ih, an Companny ih Assistant Manager a si fawn tikah man caan timi hrimhrim a nei dahlo. Changi Airport ih ‘Cet’ lam ttuanvo hmuahhmuah cu a liang parah a um thluh ti theih rori a si. A pu (Boss) in le a rinsan tuk tikah a ziangkim hi a kutah a re top.

‘Nu Lak’ cu buai hiamhiam in a phone lawngcaan ti umlo rori in mi a biak. “Okay, okay, a tthabik in ka rak zuam ding,” tin ti phahin a phone a vun thlak cu……. ‘Pa Buai’ ih misscall a rak si lala. “Hmm!!!!!” ti lawngin a thawpi a suah sal lala. ‘Nu Lak’ cu ‘Maid Agency’ ttuan in ‘Bukit Timah Shopping Centre” ih um mi a si. Anih a hnattuan cu phone biak rero hi a si. Kawlram phone a ko thul, Singapore Employer(Inntek) pawl a biak thul, mi inn umpawl in an lungkim lonak thu an sawisiat can tin…. A hna khal set thluh zik thlang. A kaa khal kham theituk. Cutin nikhat sungah biakaw thei loih can an hman can hi siarcawk a si nawn lo.

‘Pa Buai’ cu Church ih rinsan emem mi a si. Fala hmuahhmuah ih zoh mi a si fawn. Fala hrekkhat tla cu ‘Pa Buai’ ih khawm a hruai ding hngakhlap zettu khal bolo! Cu lakah ‘Nu Lak’ cu thlahnih ah veikhat tivek lawng ‘FCFS’ ah a khawm thei. A san cu, a Boss-pawl in zarhpi ni sun 12pm tiang lawng off an pek ruangah a si. Ttongdang hmannak ah a khawm ttheu. Cutin duhdawtnak thinlung nei veve si in thin hnangam ti um thiam loin ‘Pa Buai’ le ‘Nu Lak’ cu can an hmang ringring. ‘Pa Buai’ in, “Keimah lawngin ka lo duh ih ka lo ngaithiam ringring ruangah luar na kai!” a ti ih ‘Nu Lak’ ve cun, “keimah minu sawn ih kawh hmaisa le simfiang lawng na hngak ringring!” a rak ti ve.

Nikhat cu ‘leitlun duhdawtnak ni’ an timi ‘VALENTINE’S  DAY’ a si ih an pahnih cu rawl ei tlang dingin an tawngaw. Manawl can timi hi an neilo tuk veve. ‘Nu Lak’ cu zanah ‘France’ ttong a zir tikah man can a neilo. ‘Pa Buai’ khal le nauhakpawl Chin/laica a zirh ih a man velo. Cutin can maltakte an tawnawk sunah hitin biazai an seh aw……

Valpa ih biazai:

Ka tum i ruh ih saruh tong ti bang,
Ka ton ngahmi a ruh ah hnangam tawk hlah ee;
Leng hmuah lakih iang nei hleihluan ka hrang lengdawh.
Zingpit cerlian ninu hongsuak khaw;
Ka hrang khawruah tamtertu ah.
Zan thlapa te suak salin, a phurhcihmi ka mitthli,
Merem thiamhlah ‘Tintling’ cung zal zawn;
Ham ve keng ee… Uico saruh ham bang ti ing-khaw,
Theisal ee maw, Uico tal ka rak si ta-heklo cu!
Ka thla a ttem Valdang anka na leh can,
Ka thla a vai mikip hahio mi ‘Hlingpar’ na si ka fiang can;
Ttawt ngahtu si thei ve ing maw ti ruatin nittungrau maw!
Thin hnangam ti um lo’n ka kil tlaitluan mi ‘Hlingpar’;
An sim ‘Ak’ rawl tlan mi hluan in ee…
Ka thitha hmuah fep in ka ruh thlik tiang zoitu na an nem,
Thei sal ningla ka hrang hnangamnak tling i tur maw!
Ngam thei hlah ee.. anka nem lawng cun,
Lo ngen ko ning! ‘Hnangam ten i um ter aw’ tin;
Ka hrang hnangamnak a tlin ding ni,
Run inn hlumtu ka ‘Thainu’ na si tik can;
Hi thu na theihcun hnangam ten i umter ding ruahsannak thawn,
Ka lo ngen ee,,, “Hnangam ten i umter aw’ ka duat boihte laklak!….” tin, ‘Pa Buai’ cun biazai a seh.

‘Nu Lak’ khal cu um thei lo’n  lungsung anka nem cu a hon sam ve.
Lengnu ih biazai:

A kung um loin ‘par’ um thei hlah ee…
‘Par-kung’ hmuahhmuah lakih hling nei ‘par-kung’ maw ka rak tawn ngah.
Lengdawh mitza tawn-awknak a cuih hling nei ‘par-kung’!
Khiak theitu si zuam in nittung ka rau ve maw!
I pawm velo thing-sang par le khamhrap lakah,
Zawng fano in tlak phangin a nu a pawm hngetmi hluan in,
Thlaphang zet cingten ka pawm hngetmi kan duhdawtnak;
Zan khua tlai ah ‘Tintling’ cung zal merem thiam lo’n,
Ka ruat tawn ee…Van ih Si-Ar rual tla siar tlangin,
Zau ka nuam ee… na ttangneem sung bei lai ni.
Lo ngen ve ning! “Hnangam ten i umter aw” tin,
Hlan pipupawl an sim tawnmi hluan in;
Ttaangdang sungah nuam hna zau ih um ai-in,
Ka hril sawn ee… na ei siambawltu si ding ka duh ‘Huval’;
Arpi fano rual thla in a hupmi bang,
Na thla in i zawn hram law na ttang nem sungah,
Hnangamten zal thlang ko ning ka Uu Buabuai aw.

Tin a hon seh ve. Cutin…… Cutin……. Zo hman “Hnangam ten ka lo um ter ding” ti tu um loin “HNANGAM TEN I UM TER AW” ti in an can an cemter ta an ti panlo maw…..

Chin Tawngih Let Mi Zuknung Delhi Ah Tlangzarh

SalaiMai Entertainment ih tuah mi Chin version film a vei (1) nak cu India khawlipi New Delhi ah March 25, 2012 DBCF biakinn ah zanlam 4:30-5:30 tiang can hmang in tlangzarhnak  an neih  thu kan dawng.

SalaiMai Entertainment Delhi Branch cun CRO, CCYI, CNCP, FCWDS le Kawhhran dangdang hnenah sawmnak ca a pek vekin Chin tawngih leh mi zuknung tlangzarhnak ah sunglawi zetin an rak telpi thu khal CT palai hnenah SalaiMai Entertainment tuanvo neitu pakhat cun  a sim.

Hi zuknung tlangzarhnak DVD 25 zuar thei a si ih a zanah tuanvoneitupawl in inn tinah zuar vivo a si cih. Delhi hrangah DVD 85  zuarsuahtum a si ih a ni khatnak ah DVD a cem zik. Delhi ih Chinmi thurawn tlak upa hrekkhatpawl cun SalaiMai ih tuahtuannak an hmuh tikah an lungawipinak  langternak ah sumpai pekmi khal an nei hnuaihni ti thuthang kan dawng bet.

 

 

 

 

 

 

 

 

 

 

SalaiMai Entertainment Delhi Branch Chairman Salai Van Khaw Piang Ih Lungawi Thu Sim Lai

 

 

 

 

 

 

 

 

 

 

SalaiMai Entertainment Delhi Branch Secertary Salai Lal Sawi Ceu In SalaiMai Entertainment Thutawi Sim Lai

 

 

 

 

 

 

 

 

 

 

CRO President Salai Va Lal Thlan In Thucah Tawi Sim Lai.

 

 

 

 

 

 

 

 

 

 

Salai No Doi Ceu In Zaihla Thawn Mipi Awhlai

 

 

 

 

 

 

 

 

 

 

SalaiMai Entertainment Delhi Branch Pawl Zuk

 

 

 

 

 

 

 

 

 

 

Mai Zo Par Iang (Nute) In Zaihla Thawn Mipi Awhlai

 

 

 

 

 

 

 

 

 

 

Chin Tawngih Lehmi Zuknung DVD Zuar Lai

 

 

 

 

 

 

 

 

 

 

Chin Tawngih Leh Mi Zuknung DVD

SalaiMai In Website A Lo Tuahsak Thei

SalaiMai In Website A Lo Tuahsak Thei

Kan san hi IT san a si thlang ruangah Website sungah thil thatha le rotling tha cabu, zuknung, zaihla ret a si. Hnatuan ropineipawl khal in an tuah thei mi le an hnatuannak leitlun mipi hmuh dingin website phunphun thawn pholang rero a si zo. Kannih Laimipawl khal in cuvek tuah cu kan thiam ve thlang. Kan nunphung, kan calai, zaihla phunphun le kan hnatuannakpawl website ret na duh asile SalaiMai in manawlten le rang zetin a lo tuahsak thei. Rak pan ve aw.

Tuahsak Theimipawl

Website designing & development. (php, wordpress, jhoomla)

Graphics Design.

Website Promotion SEO services.

Website Marketing.

Application development.

Flash animation.

Corporate Presentations.

Logo design & corporate identity .

Online Web Advertising

Website Hosting and Domain Name

Pehtlaihtheinak.

Salai-Mai

Enquiry and Sales

Ph. 9958033239
www.CognitonOnline.in
support@cognitiononline.in,

james.music4christ@gmail.com

New Delhi, India

Ziangtin Kan Ruat?

Ziangtin Kan Ruat..?

Salai Mazawn

Mi zokhalin mah le tawkten thu kan ruatih khua kan khang. Pacang  tha lungfim, nutling pakhat ka si tiin kan thinlungih kan thuthen cat mi cu kan tuah theu. A cancan ahcun kan thinlungih rung suak mi pohpoh hi hlawhtlinnak lawnglawng si hmang tiin kan ruat. Kan tuah duhmi cun kan mit in cawter theu ruangah kan thinlung um mi hi a tha bik ah kan ruat, hlawhtlinnak lawnglawng  si hmang kan ti. A cancan ah ziang kan tuah ti hman kan thei aw nawn lo. Lungfim zetin kan tuah kan timi khal hi kan hrang siahralnak a rak si theu. Kan duhdan le kan ruahdan  cu thupi zetin kan hmu. Asinan midang ruahdan le hmuhdan  ahcun a rak thupi lo. Cumi lakah ziangtin kan tuah ding….?????? Ziangtin kan ruat..????

Veitampi cu …Thiltha kan timi hi mi hrang siatnak le riahsiatnak  a rak si theu. Kan tumtahmi in kanmah riangri in awk that theu. Thudik kan timi in buainak in thlen theu. Mipi mithmai kan zoh laiah kan sinak a rak hlo lala fawn. Kan sinak kan langter zet laiah midang ih in hmudan a rak dang lala. Leitlun nun dan thiam hi a har zet. Kan zawhmi lamzinpi hi a dik maw? Nitin kan nun dan hi zianglam  zin a si ???

Delhi Ah Chinmi Raltlan Nupa Vaipawl In Thawi

Wesley

21 March, 2012

India, New Delhi , Budella Veng, Wz 34-A, ih um Chinmi raltlan Pa Pum Ngaih Khual le a nupi Nu Khaw Sawn Cing cu an inn sannak tei sungkua vai (kala) pawl in an thawi ih Nu Khaw Sawn Cing cu zianghman thei nawn lo in a um ti thuthang kan dawng.

9 March, 2012 zianglam ah Nu Khaw Sawn Cing cu  inn hnuai ih tidai khai dingin a feh. Vai (kala) pawl in tidai an khai thluh hnuah Nu Khaw Sawn Cing cun tidai a vun dawng ve zikih inn neitu tei cun tidai an phihsak. Nu Khaw Sawn Cing cu mithmai tha lem lo in inn tlun a kaih ih inn neitu cun a dung thlun  in awka hro zet in an hringhro. A pasal  Pa Pum Ngaih Khual cu kut an thlak, culawng duhtawk lo in an umnak inn ihsin suak ding in an dawi.

Pa Pum Ngaih Khual  teiih inn san man pek tikcu hi thlathar 15 a si theu. Inn san ding an hmuh lohli lo ruangah ni 4 an um bet. 17 ni ah inn san ding an hmu rem cang ruangah ni 4 kan um man le meisa man kan lo pe ding an ti. Ni 18 suak ding in paisa an pe.  Asinan inn neitu vaipawl cun thlakhat man in pe uh an ti ih thudang  khal rel bet man lo in an nupa in an thawi ciamco. Nu khaw Sawn  Cing  cu a hngawng an rekih na sa zetin an vuak. Cutin, biak khal theih nawn lo in a um.  Zomi Community Hruaitu pakhat an phone. Zamrangten bawm dingah a thleng asinan amah riangri an rak thawi tum bet.  Zohman run awk theih a si lo ruangah  Zomi Community hruaitu cun Palik pawl a phone. Palik pakhat cu a ra thleng nan zianghman ngaihsak lem lo in a um bet.

Vikasnakar Private Zato ah Nu Khaw Sawn Cing cu an phur. Zato ih an vun phurh lai ah a thawitu vaipawl khal an tel. Nurse pawl le a thawitu vaipawl cu thuthup an rel ih an biakawk lai hliamtuar kiltupawl in an hmu. Vai tawng thiam lem lo ti fam cu ziangthu an rel ti an thei lo. A rei hlanah Nurse pawl cun zianghman a na mi a um lo nan tlung thei. Mina zualpi lawng hi zato ah riah a theih an ti ih an tlunter. Nu Khaw Sawn Cing cu nikhua zianghman thei lo in a um lai.  Zomi Community hruaitu dangdangpawl an thlen tikah a cang lo ti in DDC zato ah an fehpi. X-ray (dat-hman) cu an la nan zianghman tuahmawhawknak a um lo an rak ti thotho. Zinglam 1:00 ah an rak tlun ter thotho. Nu Khaw Sawn  Cing cu lungfim in a um hrih lo.

Hithuhla hi Slic le CRC ah theihter asi. UNHCR khal ah thuhla sim tum rero lai a si. Case a fel hrih lo. Chinmi inn kiangkappawl ih simnak ah inn neitupawlin Palik hnenah nawhthuh paisa an pe ti in an sim  bet. 2011 lai khalah Pa Pum Ngaih Khual le Nu Khaw Saw Cing ih sungkhat an umpi nunau cu vaipwl in an rak ti buai zo thu kan dawng bet.

FUD Cu CRO Ah Thleng A Si Zo

Wesley
18 March, 2012

New Delhi : Falam Union Delhi cun tuikum hrang a veikhatnak (1) vangtlang mipi thurelnak cu 3 March, 2012   ah Living Faith Baptist Church ah tluangten an nei suak thei tiin thu kan dawng.

Hi vantlang khawmpi ih asuak khawmtu Falam mile sa pawl cun tu ih Falam Union Delhi tiih an pawlkom hmin cu  Chin Refugee Organization tiih thleng dingin an lungkim tlang ih cutin a hmin khal thlengin nemhnget cih a si. Cu hleiah Rih zin lampi cehnak ah Delhi ih um Falam raltlan beunak hawl pawlkhalin mahle theitawk cio ih bawmnak  peve dingin an lungkim tlang.  Nauhak pawl hrang khalah vakvai men lo ih kilkhawinak tha sawn nei thei dingin zirh awknak tlawngkhal tuahsak dingin mipi pawl cun ngennak an neiih hruaitu upa pawl ih hmalaknak nei ding ih thunemhngetnak an nei tiin thu kan dawng bet.

Kum dang hnakin mipi a suakkhawmtu khal an thahnem zet tiin tiin CRO hotu pawl in an sim ih an thurelkhalnak khal a tluang zet tiin CT palai hnen ah an sim.  Delhi ih um Falam rinsan mi upa pawl khalin forfialnak leh thutawi simnak an nei.

Falam Union Delhi hi New Delhi ih a thleng khawmtu Falam mi le sa upa pawl in 1998 kum ih rak din mi a si.

Delhi Burmese Pastor’s Fellowship Din

Community dangdang hruaitupawl ih ngennak vekin Chinmi raltlanpawl  taksa, thinlung, thlarau ih pitling vivo theinak dingah le pawlkom dangdang cangvaihnak ih hmai nawrpitu dingah Delhi ih Chin-mi Pastor-pawl cu vei thum tawnawk khawmnak an nei ti thuthang kan dawng.

Avei thum tawnawk khawmnak 10/ 2/ 2012 DBCF Biakinn ah Chin mi Pastor 12 suakkhawm cun kutkaiaw in Delhi Burmese Pastor’s Fellowship (DBPF)  cu dinsuak a si ti thuthang kan thei.

Community dangdang cangvaihnak a cak vivo theinak dingah le mipi hrangah rawlulh thlacamnak thawn tan lak rero zo a si ti Lailun thuthang palai in CT palai Wesley a sim.

 

Chairman – Rev. Daniel Kap Thuan Thang
Vice Chairman – Rev. Boi Kho
Secretary – Pastor Peng Thawng
Asst. Secretary – Rev. Nehemiah Sui Nei Piang
Financial Secretary Rev. Ngin Khan Do
Treasurer – Pastor Vung Hau Thang
Auditor- Rev. Van Thawng Lian
Rev. Abraham Ram Lian Khar

Delhi Ah Calai Seminar Avei (4)nk Nei Ding

Chin Nonawn Calai Pawlkom, Delhi in kum thawk metting nak ih thusuak vekin April 2-3, 2012 ah  Salai Sen Ro Sang hmangin Sun le zan  Calai Seminar an nei ding thu kan thei.

April 2-3 NCNP tawlrelnak in Calai Seminar a si dingih ni 5-6 LFBC mino ih tawlrelnak in Calai Seminar a peh thotho ding. Ni 7 ah DBCF minopawl ih  tawlrelnak in Senpi Lairel dan Seminar neih leh a si ding. Himi Karkhat sung Seminar neihnak ah mipi hmuahhmuah sawm a si thu le kawhhran tin ah sawmnak ca an pek tum thu  Chin Nonawn Calai Pawlkom, Delhi tuanvoneitu pakhat Salai Mazawn in CT Palai Wesley a sim.

Chin Nonawn Calai Pawlkom, Delhi in 2011 ah Calai Seminar vei ( 3 ) a rak nei thei zo ih. Nove, 2011 ah Rev. Dr Sui Lian Mang hmangin  “Chin Cangantu Kutkaih” Chin Grammar  Seminar  hlunghlai zetin an rak tuah dah zo ti thuthang kan thei.

Salai-Mai Entertainment Thutawi

SALAIMAI ENTERTAINMENT THUTAWI

SalaiMai hi 2008 lai ihsin rak din zo mi a si ih, leitlun hmun dangdang ih kan milesapawl hmun khat teih kan pehtlaihawk thei ih khawtlang, ram le miphun, kan tawg le calai, nunphung khaisan, tumnak thawn rak din mi a si.

Tuihlan tiang ahcun SalaiMai cu internet ih social network pakhat (www.salaimai.net) men a si ruangah, kan mipi tam sawn internet thawi naivai aw lo deuh  hrangah kan hlawkpi thei thluh lo. www.salaimai.net ihsin khal in Calai lamah thansonak hmutu khal an um rero zo.

Curuangah tlawmngai mi, mal lai sumpai le thazang suahkhawmin, kan mipi hmuahhmuah ih hlawktlan theinak ding beiseinak le kanmai tawng rori ih zuknung a phunphun letih kan tawng, kan calai khaisan vivo thei beiseinak thawn SalaiMai Entertainment din mi a si. Ahleice in sumpai bawmtu um lo.

CHIN VERSION FILM A ZOH THEIH CING DING
SalaiMai Entertaiment  Chin Version Film avei ( 1 ) nak cu harsatnak a phunphun lakah Pathian zangfahnak in  tluangten tuah suak a si zo. Leilung tlun Chinmi umnak hmunkipah zoh theih a si cing ding.

TUMTAHMI
Tulai cu information le media san a si thlang ruangah, kan tawng, kan calai khal hi media thotho in a karhzai theibik ding ti ruahsannak thawn SalaiMai Entertainment khalin film a phunphun hi tlin lo cing te’n kan tawng ih a tawlrel tumnak a si.

1. Media a phunphun, kan theih mi tawng teih kan zoh tikah ka mit ih kan hmuh ban hrih lo mi le kan ke in kan thlen ban lonak le kan mahte ih kan polsuah thei lo mi theihkauhnakpawl kan hmuh ih kan ttul kan sammipawl kan hmuhsuah theinak dingih in ti beng var ding ti ruahsannak kan nei.

2. Kan tawng le kan calaipawl hi a va zirnak ding a har ruangah, kan zoh paih zawng film zoh phah ih ca a thiam cia lo khalin, mai tawng ih film zoh phah ih ca kan kan zir phah theiih kan thansoh theinak dingah le kan hlawkpi theinak khal kan beisei.

3. Film a phunphun-ah nunphung le ziaza dangdang kan hmuhih, kan nunphung le kan lungputpawl a tha cia mi kan sawmsoh-ih, a that  lo mi kan hmuhmipawl kan rem that vivo theinakpawl hi kan tumtah bikmipawl an si.

TUMTAMMI DANGDANG A UM LAI

SALAIMAI ENTERTAINMENT, DELHI  BRANCH DIN A SI

SalaiMai Entertainment in kan tawng in film tuah vivo ding in tumtah mi a neih  ruangah hmun dangdangih sin kan miphun hrangih hnatuan a cak vivo theinak dingah SalaiMai Entertainment, Delhi Branch a dinnak a si.

SALAIMAI ENTERTAINMENT

AVEI (1) NaK

CHIN VERSION FILM

PEHTHLAIHNAK

Salai Thang Tin Lian (Chairman)

Salai Lal Lawm Sang (Director)

SalaiMai Entertainment

B-5/3 Saron Veng

Aizawl, Mizoram

India 796001

Ph:+913892321658

Email: thangte.salaimai@gmail.com

b.salailawmsang12@gmail.com

Website:www.salaimai.net

SALAIMAI ENTERTAINMENT, DELHI  BRANCH

Salai Van Khaw Piang Ph. 8130702174

Salai Lal Sawi Ceu Ph: 9560426739

Salai Mazawn Ph: 9971602788

NLD In Nay-pyi-daw Ah Hmat-pung-Tin Tuahnak An Nei

NLD  hruaitu Daw Aung San Su Kyi le U Tin Oo cu Nay-Pyi-Daw ah feh in NLD Party Hmat-pung-tin rampi khelhtheinak ih telthei ding in tlawngkai ni 5(Dec 23) sun ah an tuah.

Rampi khelh theinak ding ih NLD hmat-pung-tin cu ‘Pyi-tuh-hlut-daw’ U Tu Ra Shwe Mann, ‘A-myo-ta-hlut-daw’ U Khin Aung Myint, U Tin Aye pawl in zohfelsaknak le thurelpinak an nei.

BBC/VOA

‘International Human Rights Day’ New Delhi Ah Hmang

India Khawpi New Delhi ih um Kawlram mi pawl cun 10/ 12/ 2011(zarte ni) nazi 11;00Am  ihsin 2;00 tiang BCRC Hall ah ‘International Human Rights’ hmannak an nei. BWD, CHRO, HREIB le WLB  hruaitupawl in fawrhvialnak le minung pakhat ih canpual simnak an nei. Leilung tlun dan ah mi pakhat cu duhduh ih hmuhsuam le namnuai a thiang lo thupawl khal sim relnak an nei bet ti thu kan dawng bet.

Himi tikcu le can ah mipi 100 leng lo an ra suak khawm thei ih mipi a ra suakkhawmtupawl khal in hlawknak an ngah thu CT palai hnenah Wesley cun a sim.

Next Page »