Mexico Ram Ah Thah Awk Nak A Tam

Mexico ram saklam khawpi pakhat Monterrey ah mithi ruang lutan bulmi 49 sar a si. ralkap hotu pawlin an sim nakah  lamzinpi kapih mithi ruang sarmi pawlhi mipa 43 leh nunau 6 an si tiah an simih, hi mithi pawl kan thahmi a si tiih  puangawtu rit theihthil ih sumdawng pawlkom  pakhat Zeta pawlih an mithah mi pawlhi an lu an kut leh an ke pawl an tansawm thluhih buridip sungih an khumthluh ruangah zozo an si timi theihsuak a harzet ding tiah an simih, Palik hotu pawlcun hi mithi pawlhi a liamcia nihnih hrawngih thahmi an siding tiah an sim.

Mexico ramahhin ri theihthil zuartu pawlkom dangdang an umhi an do aw in an thataw ciamco ih, tuithla ni 4 khalah khan Nuevo Laredo ah rit theihthil ih sumdawng pawlih thahmi  mithi ruang 23 an sarzo ih hi pawlkhal an lu an ban leh an ke pawl tansawm thluhih buridip sungih khumkhawm an siih hrekkhat pawlih lu tlacu lilawn hnuaiah an tar. cumi hnu tuithla ni 9 an khan  Guadalajara khawkiang Motor 2 sungah mithi ruang 18 sar a si thotho. Mexico ramah hin rit theihthil ih sumdawng pawlkom dangdang an umih an mah leh an mah an do aw ih  an that aw ciamco ih minung tamzet an  tizo.

Syria Ram Buai Nak Zia um lam A Pan Thei Lo

Nikum March thla ihsi Syria  ram President, Assad hlawnthlak tum ruangih an ram buainak cun tutiang zia umlam a pan theicuang hrihlo ih  hi an ram buainak ruangih mithi cu 12,000  an kimthlangih theih a si.

Mizan sun kahlah Syria ram laili Homs Province ih Rastan khua ah  Opposition lam ralkap pawlih Cozah ralkap tomi Motor pathum an kap ciamco ih Cozah ralkap 23 an thiih midang tamzetin hriamhma an tuar tiah Syria  Observatory for Human Rights pawlcun an sim.

Syria ram buainak tireh dingih Cozah ralkap leh Opposition mipi pawlin thutiam kamnak an neih veve mi an thlun  taktakmaw tiih zohfiang tuding UN in pailai minung 189 a thlah lutih, hiti vekih UN aiawhtu pawl umlai rori khalah an buainakin zia umlam a panthei cuanglo ih, tihni sun khalah Cozah ralkap kut tuarin Civil mi minung 30 lenglo an thi thotho ih, Syria ram Cozah in ramdang thuthangca latu pawl an ramih luhter a sianlo ruangah  an buainak leh mithi zat khalhi fiang famkim tei theihthluh theih a silo.

Nepal Ram Vanzam A Tla

Nepal ram khualtlawng phur Agni Air Vanzam  khualtlawng 18 leh a Vanzam hnatuan minung 3  phurtu cu Pokhara ihsi Jomsom panih a zuan nakah  Nepal ram khawpi Kathmandu ihsi Km 200 hrawngih hla Jomsom vanzam ttumhmun ih ttum a tum laiah  tlang a ttaih ih a tla. Hi Vanzam tla ah minung 15 an thiih midang paruk cun hriamhma nazet an tuar.

Hi Vanzam tla ih mithi pawlhi India  rammi 13 leh vanzam mawngtu Pilot 2 an siih, hriamhma tuartu minung 6 pawlhi  vanzam hnatuantu minung 1 India rammi 3 Denmark rammi 2 an siih Helicopter hmangin  Pokhara sizungah phurh an si.  hi Vanzam tla sungih to minung tamsawncu India rammi an siih, Jomsom khawpi kiangih  Muktinath temple zoh dingih feh an si. Nepal ramah hin  kum 2010 August thla ah khan nikhaw sezet lakah  Vanzam a tlazo ih minung 14 an rak thizo ih, nikum  September thla khalah Mount Everest zohtum ih feh  pawl tonak Vanzam a tla ih minung 19 an rak thizo.

Russia Ram Vanzam Indonesia Ram Ah A Tla

Russia ram Vanzam Sukhoi Superjet-100 an timi khualtlawng minung 45 phurtucu tihni zan ah khan Indonesia ram khawpi Jakarta ihsin a zuangsuakih minute 12 hnuah biakpop theih nawnlo in a hlo ih mizan zingah khan Indonesia ramah a tla tiah hmuhsuak a si. hi Vanzam hi biakpop theihnawnlo ih a hloh ihsin Helicopter 2 hmangin hawlcih a siih, Vanzam lam thu neitu pawlin an sim nakah hi Vanzam  Pilot leh Co- Pilot in an zuansuak ihsi minute 21 ah an zuannak vansang feet 10.000 ihsin  feet 6.000 ih zuanniam an dilih cumi hnu ihsin biakpop theih an si nawnlo tiah an sim vethung.

HimVanzam hi  a hloh ihsin hawl rerocih a sinan nikhua a siattuk ruangah hmuh theih asilo ih, mizan ziang ah khan  tipi thuanthum ihsi feet 7,200 hrawngih saang tlangkhaam khokrokzet karlakah  vanzam tla kekkuai themcu  Helicopter ihsi hmuhsuak a si. Indonesia ram President, Susilo Bambang Yuhoyono cun hi vanzam hi ziangruangah a tla timi zinzawi fiang a ttulih a sinan cumi hnakin Vanzam sungih minung pawl nungdam an ummaw timi theihfiang zamrang a ttul a si a ti. Asinan nungdam an umlo tiah theih a si. Hi Vanzam hi tlangsang kham khokrok zet lakih tla a si ruangah  mithi ruang pawlhi laksuah an harzetdingih Helicopter hmangin an tlun ihsin hridai vawkthlakih mithi ruang pawlcu surpuan ih vungtuamih khaiso an tum.

Hi Vanzam hi Russia ram raldo nak Vanzam tuahtu Sukhoi Company in khualtlawng phurh nak dingih an tuah hmaisa bikmi vanzam a siih, tuah hin Russia in Indonesia ram hnenah Vanzam 45 zuar a tum rero laimi a siih, Russia hin ram dangdang khalah zuarsuak nak hawlin lamzin a hawl rero laifiang mi a siih, Vanzam 170 hrawng zuarsuak nak cu a hmu zo ih himi Vanzam manhi dollar Million 35 hrawng a siih a man a malzet.

China in Ralthuam Hman Mai A Duh

China leh Phillipines ramcu  South China Sea tipi thuanthum tikulh fatakte Scarborough Shoal an cuhawknak thuah an karlak boruak a se vivo ih, himi ruangah China Cozah cun an ram mipi pawlcu Phillipines ram fehlo dingin thu a suah ih, Phillipines ramih umcia pawlkhal lengsuakvak lo dingin theihter nak a pe. Famkim Siarbet

France Ram President Thar

France ram mipi pawlcun  an ram President hrilnak vote thlak a voi hnih nakcu tihni sunah khan an thla ih an ram President tharah Socialist  Party hruaitu, Francois Hollande  kum 58 micu hriltlin a si. Francois Hollande in nehnak a co ruangah President, ttuanlaitu Nikolas Sarkozy cu kum 1981 hnu lamih France ram President hril nakih term hnih nak tlinban nawnlo umsun a si ih, Francois Hollande khalhi kum  1980 hnu lamih  Socialist Party hruaitu pawl lakih President, hrangih hriltlin hmaisa bikmi a sive ih, vote tla zaa ih 52% a hmu ban.

President, ih hriltlinih puan a si hnuah Hollande cun a mah lawmtu mipi pawlih hmaiah thu a simih, France ramcu Europe ram dangdang pawlih zoh mi leh mitfut nakbik ram asi ruangah an ram sumpai dinhmun tuahtthat dinghi a ngai pawimawh bik a si dingthu a simih, a sinan  an ram sumpai dinhmun tuahtthat nak dingih Cozah sum hmanding timal tum micu thil thabik a si kemaw ticu ralring zetih zohfiang a  ttul ding tiah a sim.

President, fehsuak dingtu Nikolas Sarkozy khalin President thar Francois Hollande cu lungawi pinak thu a simih, Sarkozy cun President cu ram mipi khalin an zahthiam a ttul a si a ti. British Prime Minister, David Cameron, Germany Chancellor, Angela Markel leh ram dangdang hotu pawl khalin  President, thar Francois Hollande hi lungawi pithu an simih, Germany Chancelor, Angela Markel cun an ram tlawng cingdingin a sawmcih.

President, Francois Hollande hi a liamcia kum 30 lenglo ihsin  Politics lamah sulhnu a neituk lemlo ih kum 1997 ihsin 2008 karlak ah an  Party Socialist Party Secretary tilo cu Cozah lam khalah  sinak pawimawh zianghman ttuanmi a neilo. tuithla ni 15 ah President, ih laklut a si dingih an ram sumpai dinhmun tuahtthat ding thuah an ram mipi pawlih beisei leh duhdan vekih thu tluknak  khirhkhan zetzet a hmaison thlangding ih a phur a ritzet dingah ruah a si.

Russia Ram President Ah Vladimir Putin Lak Lut

Mizan sunah khan  tuikum March thla ih Russia ram President hrilnakih hriltlin mi  Vladimr Putin cu an ram khawpi Moscow ih  Grand Kremlin Palace ah rin umnak thutiam tuah terih laklut a si. Vladimir Putin hi Russia ram President term hnih rak ttuanzotu  a siih, an ram daanpi ih um vekih term hnih hnuah pehzawmin President a cuh sunzawm theilo ruangah  a cawlih kum 4 sung Prime Minister a ttuan hnuah  tuikum March thla ih an ram President hrilnakih a cuhsal ruangah hriltlin sal a si.

Tui President, term hi kum 6 sung a siih, tluangtei kum 6 a ttuansuak thei a si len Josept Stalin ih hnuih Russia ram President ttuan reibik a si ding. Vladimir Putin President, ih laklut a si laiah Opposition lam mipi pawlcu  Grand Kremlin Palace kawtka ah an pungkhawmih Vladimir Putin President ih laklut an duhlo thu leh President laklut nak khawmcu baang dingih an duhthu an aupi ciamco haiih Palik pawl thawi an buai ruangah mi tamzet kaih an siih, an kaihmi sungah Opposition lamih hotu mi langsar zetzet khal an tel.

President, Vladimir Putin laklut nak khawmhi ropi zetih tuah a siih Soviet President hlun  Mikhail Gorbacher, Italy  Prime Minister hlun, Silvio Berluslomi, Russia President hmaisabik, Boris Yeltsin ih nupi Naina Yeltsin leh  President, hril nakih cuhtu tling banlo minung 4 pawlkhal an tel.

President laklut khawmnak hi ropi zetih tuah a si ruangah  Russia tangka rouble Million  20 hrawng an cemih ruah a siih, hihi dollar cun 6.64.000 hrawng a si ih, himi ih hleiah President lawmnak zanriah  i khawmnak an tuah leh dingmi ah   rouble Milliion 12 hrawng an cembet laiding.

Titanic Lawngpi Titanic II Tuah Sal Tum

Australia ram leilung khursung thil mankhung laihsuak nak lamih sumdawng miliamzet Clive Parmel cun kum 1912 ih lawngpipil Titanic vek cekci Titanic II tuahsuaksal a tumthu le kum 2016  cemzawngih England ihsi New York panih fehsuak ter tengteng man a tumthu a simih, hi lawngpi hi Titanic lawngpi pilvek cekci ih tuahtum asiih,  China ramah tuah a si dingih an tuahthluh ih khual a tlawn khalah China ralkap pawlin an kil ding.

Hi lawngpi hi a fehter nakah lung alh thei hmanglo in diesel hman a si dingih Titanic lawngpi pilzo mivek cekci in Pindan 840 leh tlanlennak tualrawnpi 9 a nei ding.

Clive Parmel hi Australia ramih milian 5 nak hrawng a siih, paisa a neih zat fiangte in theih cu a silo nan Pound Billion 3 hrawng a nei dingih ruah a si.

Hi lawngtuah a tum mihi pil maimai theilo dingin tulai thiamnak  sang phunphun hmang ih tuah tum a si. Clive Parmel hi mimak danglamzet a siih tuihlan khalah a sum dawnnak a tluanthat laiah a hnatuan tupawl minung 55 pawl cu  Mercedes Benz Car man khung tha zetzet a rak leisak thluh zo hai.

Burma Ram President, Thein Sein in Ram Danpi Thleng Dang Lam A Tum Lo

Burma ram  Opposition Party National League for Democracy (NLD) ticket ih  Parliament Member hriltlin thar mi pawlcun an mah lakluh nakdingih an thutiam dingmi ih an lungawilo ruangah Parliament tokhawm nakih an tel theilo dingthu an sim.  Theihcia zo vekin  MP hrilthar mi pawlin an thutiamkam lakding lakih an duhlo micu Ram daanpi kilhim  ding timi a siih, hihi NLD pawlcun Ram daanpi zathiam ding tiih thleng an duh.

Himi daanpi thleng danglam dingcun Parliament ih pawmpi hmaisat a ttul ruangah leh thutiam kamnak an lakhlan ah cun Parliament tokhawm nakih an telthei fawnsilo ruangah Parliament tokhawm nak neihleh tikah NLD, MP pawlhi an teltheilo ding ti a fiangih, Parliament ah hin ralkap hotu pawlih thlawpmi Union Solidarity and Devolopment Party in seat 80% lai an luahfawnsi ruangah  NLD pawlih duhdan hi Parliament in a pawmpi zum a um tuklo ih ruah a si.

President, Thein Sein cun mizan sunah khan tui a tlawn laiank Japan ram khawpi Tokyo ih thuthangca latu pawlin an suh nakah MP pawlih thutiam kamnak an lakmi Ram daanpi kilhim ding timi hi thlengdanglam tumnak a umlo tiah a letih, Aung San Suu Kyi cu hriltlin mi a si ruangah MP si tengteng sehla a duhthu a simih, Asinan thutiam kamnak a lak duh dingleh duhlo dingcu a maithu a si a ti.

France Ram President Hril Nak An Nei

France ram President, hrilnak vote thlak a voi khat nakcu tihni sunah khan an thla ih, vote hi an thlakni ah siarcih a siih,  vote siarfiang zomi ah  Presidnet, ttuanlai tu   Nicolas Sarkozy in a  mah cuhtu Francois Hollande cu a baanlo.

President tuanlaitu Nicolas Sarkozy hin vote siatzo miah  vote za ih 27.1% a hmuih, a mah khingsongtu bik Socialist Party hotu  Francois Hollande in vote za ih  28.6% a hmu zoih,  National Front hruaitu Marine Le Peni in zumbanlo pi in  vote za ih 18% a hmubanve.

Vote thlak a nawlhnih nakcu hmaithla ah an thlasal dingih tui dinhmunah President tuanlaitu Nicolas Sarkozy  ih dinhmun a niamsawn ruangah  nasazetih ttan a lak  theilo ah cun a tlinzum a umlo ih  National Front pawlih thinlung a nehzet a ttul dingih ruah a si. France ramah hin President hi kum 7 hrangih hril an siih  tui President ttuanlai Nicolas Sarkozy hi kum 2005 ih an rak hriltlin mi a si.

Burma Ram thu EU Pawlin An Rel Ding

European Union ram Foreign Minister, pawlcun tuisunih tonkhawm awknak an neih dingih himi ih an thurel khawmdingmi pawimawh langsar lakih tel dingah EU in Burma ram hremnak an pekmi hlihsal dingthu hi an thurel dingmi lakih pawimawh pakhat a si tiah theih a si. Burma ram Cozah in a thazawngih lamzin a zawh rero thlang ruangah ram dangdang pawlih hremnak an pekmi sung ihsin ziangmaw zatcu hlihsak an si a zumih, Norway Foreign Minister, Jonas Gahr Stoere khalin  nikum ihsin Burma ram Cozah in a thiltuah danah lamzin tha a zawh rero thlang ruangah, zumnak hnakih ttha in thil a tuahih lungawi umzet a si tiah a sim.

European Union in Burma ram hremnak a pekmi lakah Company 800 lenglo pawl a hrenpit sakih ralkap Cozah hotu minung 500 pawl hnenah hremnak a pe ih hi pawlhin European Union ram pawl an tlawngvaksuak theilo ih America leh Canada ram pawlkhal an tlawn siansak an siloih cui hleiah sumdawn nak lam leh bawmnak peknak lam khalah sangka an kharsak, hi hremnak an pekmi pawl sung ihsin ziangvek an hlihsak salding timi thuhi theihfiang nak a um hrihlo.

Tui dinhmunah Burma ram Cozah dinhmun hin ram dangdang ih fak a hlawhzet nan  minung diknak covo kilhim tu hnatuan tu pawlcun  Burma ram Cozah cu mipi duh hrilmi Cozah a silo ruangah leh Cozah thu neitu pawlhi ralkap Cozah  nak hnuaih   hotu hlir an silai ruangah hremnak pekzomi hlihsak sal dinghi a cu hrihlo tiah an simih Kachin ram tla ah cun  Burma Coah in  thilttha tuah tumnak zianghman a neih mi hmuhding  aum hrihlo tiah an sim ve thung.

China in India A Hro

Kandungzarh tlawngkai ni 5 ih India in  Km 5,000 ihhla kapban  Missile test  nakih a kahsuak ruangah China cun India cu ram In hnen pawlih himnak siatsuah tum leh  mi hringhro ah a puhih, hiti vekih thil tinawnlo dingin leh a tile sal a si ah cun a sawhkhok a natzet ding tiah a hro.

Theihcia zo vekin  kan dungzarh tlawngkai ni 5 ah khan India cun  hmunhlapi Km 5.000 ihhla kapban Missile Inter- Continental Ballistic Missile (ICBM) Agni V cu  Odisha ih  Wheeler tikulh Intergarated Test Rangs (ITR) ihsin an ram tikcu ihzianglam nazi 8;07 ah khan a kapsuak. Defence Research and Devolopment Organisation (DRDO) hotu VK Saraswat cun  Missile an kahsuak mihin India Ocean ih a tumtah mi a kapfuhzet tiah a sim.

India in Missile a kahsuak mihi metre 17 ihsau metre 2 ih hlai a siih, Km 5.000 ih hla kapban a siih, Agni V Missile hin Nuclear ralthuam Kg 1.000 hrawngcu meithla cerek hnakih zamrang sawnin  a tumtah nak hmunah a zuanpi thei. hivek Missile hi India ih a neih hlanah US,UK, France, Russia, leh China pawlin an rak neizo.

Agni V Missile hi raldo nakih hman a si ah cun  Asia khawmual ram hmuahhmuah leh Africa ramih hleiah Europe ram pawlkhal kapban dingih tuahmi a si. Hi Missile hi an kahsuak hnuhnu cun a tumtah nak kapfuhlo dingih ti danglam khamsal a theihnawnlo ruangah Cabinet Committee ih thutluknak tuahta lo cun kahsuak theih a silo.

Pakistan Ram Vanzam Tla ih Mithi Pawl An Thei Fiang Hrih Lo

Pakistan ram Vanzam tla ih mithi ruang parh sawmnawi pawlcu zozo an si timi theihfiang a si hrihlo. Theihcia zo vekin  kandung tlawngkai ni 5 zan nazi 6:30 ah khan  Pakistan ram Vanzam khualtlawng minung  121 phurtu Boeing 737-200  Bhoja Air jet cu Karachi khawpi ihsin Islamabad panin a zuangih Islamabad ih  Benazir Bhutto International Airport  thlenhlan  Km 10 hrawngih hla Hussain Abad khawkiangah a tla ih a phurhmi khualtlawng minung 121 leh a hnatuantu minung 6 pawlhi an thithluh  mithi ruang ziangmaw zatcu laksuah thluhzo an sinan a  taksa pawl a parh thluh ruangah zo ih taksa an si tipawl theihfiang nak a um hrihlo.

Hi Vanzam ziangruangah a tla timi theihsuak theinak ceet Black Box khal hmuhsuak a sizo ih, Interior Minister, Rehman Malik cun Vanzam tlaknak sanhi fiangtei theihsuak hlan sungcu Bhaja Air hotu Farooq Bhaja hi Pakistan ram lenglam ih suahter sian a si hrihlo tiah a sim. hi Vanzam hi a tlakah a puakkuai ih  a alh nasa ih a sungih mithi pawlhi a taksa a parh sezetih mi tampi cu an lu a tanih an ke a baan pawlkhal a tan thluhih  mithi ruanghi  Hussain Abad khua ah laksuah rero an sinan zozo ih taksa an si timi theihfiang nak a umlo ruangah  DNA test tuahding an si.

Kum 2010 khalah Pakistan ramah hin khualtlawng phur Vanzam  cu Islamabad ih ttum dingih a  zuan laiah a tla ih khami ttum khalah minung  152 an rak thizo.

Next Page »