CPP le CNP Komaw Ding

Mizzima

2010 ih hril awknak ah a zuam awk bik mi party CPP le CNP cu Chinmi ai awh dingin party pakhat ah kom aw ding an tum thu an thah. Party pa 2 kan kom awk tikah thazang tam deuh kan nei ding tiah Pu Zozam in a sim.

Himi party pahnih kom awk theinak dingah vei thum rori reltlangnak an nei zo. Khawte lam le hmuntin ih party sizung ih feh tikah “ziangruangah nan kom awk lo” ti ah thusuhnak tampi upapawl in an rak tawng theu a si.

Curaungah central lam ahcun kom aw dingin rel a si ih myone le khawte lam tiang in thuhla thanh dingah relcatnak neih a si zo. Hotu hril tikah democracy danten zalenzet in hril ding a si. 2010 hril awknak ah CPP in mi 12 in nehnak an co ih, CNP ihsin mi 9 in nehnak an co.

Suh Kyi Ih Nunnak Ka Rak Runsuak Dah Tiah Khin Nyunt In Sim

May 30, 2003 ih Dipeyin buainak ah Daw Aung San Suu Kyi cu thihtheinak lak ihsin a nunnak ka rak humhim dah a si tiah U Khin Nyunt in Bangkok Post thuthangca thawn thusuhnak ah a sim.

Acozah ralkap ih thapek mi mibur hmangin Daw Suh le NLD hotupawl khual an tlawng lai that ding an rak bawh ih mi tampi in an nunnak a can phah. Cumi lak ah Suh Kyi ih nunnak humhim dingah a naihnak ralkap sakhan ah hruaisuak dingah a kuthnuaipawl a fial thu Sungtthauh hotu U Khin Nyunt in a sim. Kum tluan in ral a tho mi tlangpar mi pawl thawn remdaihnak a tuah ruangah le Aung San Suu Kyi parah ka farnu vekin thinlung ka nei ka ti ruangah thlawng in thlaknak khal a si tiah Bang Kok Post thuthangca hnenah a sim bet.

Himi thuhla thawn pehpar aw in thudik zingzawi le theihgfiang a tul hrimhrim ih nunnak a rak liamtupawl hrangah sumpai pek an tul tiah NLD lukai U Tin Oo in a sim ve. Hmasehla thudik theinak hrangah a thupi nan, a tuahtupawl hremnak pek ding tinak cu a si cuang lo tiah a sim.

BBC

Kawlram Thuthang Le Aungsan Sukyi Khual tlawnnak

Daw Aungsan Su Kyi cu hril awknak hrangah vote ngah ding in Mawlemaing, Mon state a feh lala. Hitawk ih a fehnak hrangah ralmuannak cu a cozah in an la ding. Kan dung Madalay a fehnak ih lungto in an mawtaw to mi an den ngah pang vek cang sal lo dingah a cozah le NLD thureltlang nak an nei. Mawlemaing a fehnak lamzin tluan ah mi thawngtel in an rak hmuak ih nuamzet in caan an hmang. Lamzin ah hmun 2 ah minute pa 2-3 thusimnak a nei phah. Thaisun suimilam 9:00 ah mipi hmai ah thusimnak ropizet a nei ding. Himi thusimnak dingah NLD nehnak co dingin a cangvaitupawl ih a ruahmannak hmun cu tlunlam thuneitupawl in an sian lo ruangah khawpi sung ihsin peng 6 hlatnak hmun ah tuah ding an si.

Hmun hrekkhat ah vote petu ding pawl ih hmin pawl an zohfel tikah mi thicia zo pitar putar le kum kim lo nauhak hmin tla an tel. Cun ahrek khat lala cu a veng pum in hmin um lo tivek.. Hmatpungtin number pakhat in mi 9 lai hmin a um tivek a hnuaihni. Curuanagh NLD pawl in vote thla theitu ding cazinpawl cu fiang deuh le fel ten tuah thei a sinak dingah hrilawknak tuanvo neitupawl hnenah ni 21 sung caan an dil. Acozah tuanvo neitupawl in an lungkimpi ve ti a si.

Lailak hril awknak ding hrangah a lawngmi seat 48 a um mi sungah NLD in a zaten cuh an tum.

Kawlram Acozah In Dollar Fangkhat cu Kyat 800 Rate In Nemhnget Thlang Ding

Sumpai rorelnak kum in 2012-1013 thawknak dingah April 1 ihsin kawlram sumpai cu Dollar fangkhat ah Kyat 800 si dingah acozah bankpi (Bahu bank) in a nemhnget thlang ding.

Tuhlan ahcun kum le khua in Dollar fang khat ah kyat fang 6 lawng a rak si ringring. Hivekin sumtleng rate ti danglam a si ruangah tuihlan ih sumthlengnak rete Dollar 1- 6 kyat cu hman a si nawn zik lo.

Atu a ra dingmi April 1 ihsin Bahu Bank webite ihsin nitinte sumthleng rate tarlang a si thlang ding tiah Bahu Bank ih hotu sang (Vice president in a sim.

Hitivek in sumthleng rate an tuah theinak khal IMF thawn thuhla tampi an rel hnu ah a si ih, hmailam ah harsatnak an tawn pang hman ah IMF in a phi a hawlsak vivo thei ding.

BBC

NLD hotu Daw Aung San Suh kyi Mandalay le Sagaing A feh

April 1, 2012 Ah Karlak Hrilawknak (Ciaphit) Nei Ding

BBC | 31 December

Kawlramkarlak hrilawknak cu April 1,2012 ah nei dingah Yangon ramthen hrilawknak tuanvo neitu U Ko Ko in a sim. Cuihlei ah Kawlram pumpi hrilawknak tuanvo neitu khal in kawlram TV ihsin phunsuahnak an nei zo.

Himi thuthannak an neih ihsin thlakhat sungah hrilawknak ih tel dingmi palai (kusale) pawl ih hmin khal pek ding a si. 2010 ih ram pumpi hril awknak ah NLD in duh lo nak langter in hril awknak ah an tel duh lo. Hmansehla tu ahcun 2008 hril awknak dan an thleng sal ruangah tuitum ih laklawh hril awknak ah tel dingin an lungkim. NLD in hmunlawng hmuahhmuah ah candidate aw dingah an tum. Himi hril awknak ah NLD le Ciankhaingzi party pa 2 in nasaten zuamawknak an nei ding tiah zum a si.

Nitin Baibal siardan

Tong Timi Hi Kan Miphun A Si Ko Maw?

“Ka fanu zangfahten kan inn sung ahcun mirang tong cu hmang hram hlah aw” tiah kan nu in kan fanu kum 5 mi Christina M cu nun a sim theu. Sim lo awk khal a tha lo si hmang ding. Tlawng inn ihsin a ra tlung, a nau thawn an kawmaw, an lek tlang ih an biakawk tikah tlawnginn ih an hman mi vek mirang tong cu a rak hmang ngah ringring a rak si. Kei cun cuvek ciamco ih ti a tul lo a duh le hmang ve awsehla mirang tong thiam tete a thatuk sisi tiah ka thinlungten ka ti theu. Hmansehla can a herliam ih ziang a cang?

Malaysia ihsin kan nu ih a u tei sung an ra thleng. Annih sungkua hi mizo tong hmang an si. Kan fate in mizo tong an thiam ve lo. Cutikah an kawm awk duhzet fawn, aancing lo in an um. Mirang tong an hmang ih kan kham fawn ziang tongin an biak aw thleng ding? Unau an si fawn si? Ruat ve hnik. Kawl tongin an biak awk daih mai. Aw! Kei le laimi felfel ti aw ka si fawn. Kawl tong ih biak awk teh a pawinak a um maw, um lo ve. Ziangruangah kan mah kan rampi tong a si. Asinan Laimi ti ih kawl tong rori in kan inn sungsangah tong ding a mawi fawn lo. Asilole ka fetepawl mizo tong ka zirter mai ah a tha sawn lo maw? Aih, culamlam ka sim tum mi a si lo.

Veikhat cu Wire hri dir in hna ka tuan rero lai ah CRC zung ihsin phone in in rak ko. “Christina pa na si maw? Hitawk ah Lai tong thiam lo laimi ka si a ti aw, nangmai’ mi theih ka si a ti aw. Ziangtin kan tuah ding, laimi a si ngaignai maw? CRC ca “To whom it may concern” timi ca kan pe ngam pei maw tiah” in rak sut. Amah ka vawn biak cun kan hnen ih hnatuan mipa a rak si. Laimi cu a si tuk lawlaw nan lai tong a thiam lo tikah laimi a sinak a keng tel thei lo a rak si sawn. Laimi ka si kan ti awk theinak hminsinnak cu lai tong kan thiamnak a si pei maw? Nang na inn sungsangah ziang tong nan hmang? Tong timicu kan miphun a si tiah kan ti thei pei maw, A si ah teh?

Malaysia Zinzawhnak Bersih 2.0

By.. David Nun Tho

Kuala Lumpur: 09.07.2011 zinglam nazi 10:00Am hrawng a si ih Malaysia Kuala Lumpur khuapi sung um dawr pawl an khar ih lamzin par khalah nidang vek in mawtaw sukso vak khal hmuh ding a um lo. Zin tluanah le au thawnvang theih mi cu Palik mawtaw emergency retmi au aw thawng lawnglawng a si. Chin mi le ramdang mi pawl zo hman aleng suak ngam ci a silo. Acozah in ralrinnak pek leuhleuh cia zo mi a si.

Ziangruangah Besih 2.0 (Clean) timi duhlonak cu harsat ton in cozah thuneitu pawl in an kham n acing in an tuahpeh thotho si pei? Asanbik pakhat asi mi cu Malaysia acozah ih Barisan National timi Party pakhat lawngin rampi kum-54 sung a uk zo.Democracy ram a si tin ati awk nan ramsungah zalennak ngaingai a um lo. Tuih acozah thuneitu pawl cu lole Prime Minister Najib cun One Malaysia timi Malay rammi sinak ah pumkhat kan si ti an aw kio rero na cing in thiltha le covo ngahnak aphunphun ah Malay mi lawng mithmai pek in co a si ringring.

Tuluk le India pawl in zianghman an co bang ve dah lo. Acozah hnatuannak zung pawl khalah 70% pawl hi Malay mi lawnglawng an si. Ramsungah nawhthuh eihruknak atam, Minung covo ngaihsak lo, democracy diktak hmang thei lo, Politic lamah mai thuneihnak duhah aphunphun thuanthu pawl phuah ciamco, sualnak nei lo pawl sual puh tahrat in hrem, ISA timi Internal Security Act daan hmang in cozah dodaltu tiih zum hmang pawl thusuhnak le relnak um lo in kai le aphunphun buainak a um.

Deputy Prime Minister asidah mi Datuk Anwar Ibrahim khal cu a fim tuk ruangah Kum-1998 ah kumkim lo mipa a sualpi a si ti puh tahrat in thawninn sungah kum-10 sung kharkhum a si. Kum-2008 an thlahsal tikah tui dinhmun ah Opposition Party PKR ih Chairman a tuan ih mipi a neh zet. Mifim makzet le ramsung um daan le uk daan ding theizet mi a si hrangah acozah in an tih ih aphunphun mawhpuhnak lole thuanthu hmang in relsiatnak le siatsuah an tum ringring.

Tuitum khala Party pathum kopkhawm in Ambiga timi numi ih hohanak in Bersih 2.0 zinzawh ding thu cu Police pawl hnenah dilnak a nei. Police, Prime Minister, siangphahrang le in an pomsak lo ih daan lo ih thiltuah a si ih zinzawhpawl cu kai ding thu an suah. Bersih 2.0 (Clean) cu Human Right Commission, Malaysia Bar Council le NGO pawl khal in nasa ten an ttanpi.

KL khuasung lutnak zin pawl phit thluh a si ih mawtaw zaten cekfelnak nei theh a si.Sunhnu nazi 2:00Pm hrawng ihsin Pudu, Timesquare, Bukit Bintang, Merdeka Square le kiangkap ah minung an pum karh vivo ih netabik ah Police pawl ih Tear Gas Bomb le tidai kahnak mawtaw thawn tidai kah tahrat in mipi an then darh. Zohman hliamhma roh pu aum thu theih a si hrih lo. Asinan Police pawl in minung 1667 hnak ih tam cu an kai ti thu don a siih cumi laksungah MP (Parliament Member) le Bersih hotu Ambiga khal a tel thu don a si. Ruahsur lakah mipi mipum-50,000 an si ding tin Bersih tuanvo neitu in a phuang nan acozah lam in 20,000 tin thuthang ca ah an ngan. Malaysia ram ih hrilawnak cu hmaikum 2012 kum lai hrawng ah neihsal ding zum a um. Tuitum vek in kan dung kum-2007 khal ah Bersih zinzawhnak neih a si ih mipi-50,000 in an telpi.Curuang khalah parliament tonak opposition pawl in hmun tawkfang an co zo. Malaysia ah Bersih  mipi au aw cu ramsung lawngah tawp terloin ramleng Australia, Britain, France, Hong Kong, Indonesia, Japan, the Philippines, South Korea, Thailand le United States lam khalah sunsawn in embassy hmaiah acozah duhlonak an langter ding in tumtah a si.

Bersih 2.0 Malaysia mipi ih dilmi le au aw pawl cu atang lam vek in a si;

01.   A thianghlim mi hrilawknak daan hrampi nei ding

02.  A um cia mi Postal Ballots tuahthatsal

03.  Phiatsal lole Olten hlo thei lomi catii hmang ding

04. Hrilawnak Vote pek hlan amalbik ni 21 sung Campaign tuahtheinak

05.  Thuthang (media) zalennak le adik mi thu pawl mipi hnen thlenpi

06. Ramsung um mipi zohkhennak nei that sinsin ding

07.  Eihruknak aphunphun ihsin bangsan ding

08. Abaal, duh um lo mi Politic cangvaihnak pawl cawl thlang ding timihi tuitum ih an dil mipawl a si.          Source: Malaysiakini, AFP, Reuters

Daw Aung San Suu Kyi ih suahcam lawmnak

Hram: BBC
Kawlram mipi zalennak sual rerotu Pi Aung San Suu Kyi cu June 19, 2011 ah kum 66 a kim ta.      ” Tuni kawlram ah ralpi thawk dingin timtuah rero a si lai caan ah remnak le muannak a thupibik” tiah a suahcam lawmnak NLD zungpi ah thu a sim. Raldo awknak hmun ih mithi le hriamhma a pu tambik tu hi nauhak le minu (nunau) pawl an si ruangah numipawl in remnak le muannak a tulzia kan thei cuang tiah a ti. Rampi ram khat thangso le nuamzet ding cun remnak le daihnak a thupibik ruangah Pi Suu Kyi ih suahni ah kan rampi le leitlun ah remdaihnak thleng hramseh ti cu a thlcamnak a si.
Daw Aung San Suu Kyi ih suahni lawmnak ah tui kum cu a mah rori feh in a hman theimi kum a si. Kum dang ahcun inn sung hrenbetnak in a caan tam sawn le a suahcam a hmang. Tuitum ah a mah rori in a hmang thei tikah mipi khal an tha a tho hleice ih ramdang le kawlram pehthlaih awknak mihman mi 1000 lenglo an ra suak thei ih, mipi thawn an zatekawm cun mi 2000 lenglo an kim ti a si. Cuvek thotho in KIA an hmunpi khal ah Pi Suu ih birthday an rak hmang ve ih a hrangah thlacam saknak an rak nei. Cun, Malaysia, India, Bangladesh, Tuluk-kawlram ramri le leitlun hmun tampi ah Pi Suu Kyi ih suahni lawmnak cu LND party pawl le mipipawl in hman a si.

Siatsuahnak

October 3

Zarhte Ni

 

Siatsuahnak

 

Siar:

1 Korin 2

 

Curuangah nan zumnak cu minung fimnak parih bunmi si loin Pathian cahnak parih bunmi a si sawn.      – 1 Korin 2:5

 

Kumkhat Sung Baibal:

-   Isaiah 17-19

-   Efesa 5:17-33

 

Leilung ramzuk suaitu (mapmakers) pawl in a hlummi leilungpi zuk cu a pheeng, a peermi cahnah parih an suai tikah a si lopi in siatsuahnak an tuah. Cuti lo cun tuah daan dang famkim le a um thei fawn lo. Leitlun pumpi ramzuk hrekkhat sungah Greenland cu Australia hnakin a kau deuh vekin a lang.

     

Khristian pawl tla cuvek in a si lolam ih sim kawiternak le buainak kan tuah ttheu ko ding. Thlaraulam ram thuhla cu cin le ri fiakzet a neimi leilam ram ihsin theih kan tum tikah zianghman lo kha thupizet ah kan canh ttheu ih thil thupizet pawl kha zianghman lo men ah canternak in thu kan cemter ttheu.

     

Pathian ih simmi thu hnakin thusimtu hminthang pawl ih thu thupitternak in a si lolam ih sim kawiter siatsuahnak thu pawl Thukam Thar sungah vei tampi a sim. Paul in Pathian ih tumtahmi cu, “Thinlung thiang sung ihsin a rami duhdawtnak le sia-ttha thleidannak thinlung thiang le a felmi zumnak um seh,” a ti (1Tim1:5). Zirhnak dik cun Pathian Thu a siatsuah lo ih Kawhhran a kuaiter lo. Cuhnak in zumtu pawl a pumkhatter ih Khrih ih taksapum a tuah ttha ih, leitlun ah Pathian hnattuannak dingah pakhat le pakhat an bawm awter (1Kor12:25).

     

Milai theihnak ih Pathian simfiang tum cu a tlamtling thei lo, kan duhmi a siatsuahter, kan thuruahmi a buaiter ih Thlaraulam thu kan theihmi a zorter. Pathian thutak siatsuah lo dingah milai fimnak hnakin Pathian ih huham sawn ah tthum aw ding kan si (1Korin. 2:5).

 

Hih leilung tisa nun cu a tawituk,

Kumkhua nunnak cu a kautuk;

Milai bumnak thlun cu,

Netabik ahcun thlarau nun hlohnak a si.

 

A palhmi hlon dingah Pathian thutak tleunak sungah langter aw.

KHRIH THINLUNG

KHRIH THINLUNG ( Filipi 2 : 5 )

Evan. S Tha Nei Fai

 Kan khua, kan ram le ramdang um mi kan zate’n Pathian kan duhdawt taktak a si le kan hrin le kan kawhhran member karh ter tum lo in Vancung member sawn le Bawipa’i kawhran sawn kan karh ter tum pei. Krih ih saltha Paul in Korin khua mi pawl hnenah, ” Pakhat in kei cu Peter ih pawl ka si, pakhatin kei cu Apollos ih pawl ka si, a dang pakhatin kei cu Paul ih pawl ka si, pakhat in Khrih ih pawl ka si nan ti cio. Cui pawl, khai pawl ka si nan ti sung cu nauhak aa vek nan si ” a ti ( I Kor. 1:12 ). Curuang ah ramdang ih thleng zumtu unau! lei member hnakin vancung member, lei kawhhran hnakin Bawipa’i kawhhran sawn hi thanso ter, pitlin ter kan tum cio pei. Jesuh Khrih cu pawl dang tampi um hnakin, ” Ka pa, nangmah le keimah pumkhat kan si bangin i zumtu hmuahhmuah khal pumkhat si ter aw” tiah thla a cam ( Jh.17:21 ). KHRIH THINLUNG kan neih cio ding a va thupi em ! Cuticun kan ram a dam ding. Kan miphun a thangso ding. Kan miphun, kan hnam kan thanso theilonak pakhat cu kan thlennak ram kipah kan mai pawl ( kawhhran ) kan tan tuk. Tuum ter kan tum tuk. A poi…a poi….a poi… KHRIH RAM SAWN, KHRIH KAWHHRAN SAWN……thangso seh, tum seh..

Next Page »