Australia X Factor 2013 Ngahtu Dami Im Ka Uar Rori Ko

Van Bawi Lian

245085-d78d8d8e-0ac6-11e3-8e3e-24f3529673f4

2008 kum ihsin Australia ih X Factor hi hlazuamnak ih ka uar bik mi a siih pelhlo ten ka rak zoh ve ṭheu. Tuni tiang an hlasak mi pawl le a zuamtu pawl khal ka uar mi pawl cu ka sumpai cem in karak vote ve. Kum dang hnak in tuikum ih a ngahtu Dami Im hi ka lungawi cuang. Zumtu a si ruangih ka ṭannak cu thuhran, a hlasak mi pawl hrimhrim hi ka tleirawl tir ihsin ka uar tuk mi hla pawl lawnglawng an siih a sak dan ka diriam in ka uar tuk. 2008 ihsin kum 4 rori a pehpeh in ka ṭan mi pawl in an ngah ih keimah ten ka rak lung hmui ve zet. 2008 ihsin angahtu pawl cu Altiyan Child, Reece Mastin, Samantha Jade le tuikum Dami Im pawl an si.

Tuikum Australia X Factor hlasak zuamawknak ih pakhatnak a ngahtu Dami Im cun a lungawi thusimnak hitin a nei ‘hi tivek ih i cawisang tu hi ka biak Pathian a si, duhsannak a nei ruangah hitin I cawisang, mi harsa, nu le pa neilo, rual banlo pawl bawm theitu dingah in tuah asi, ka ngah mi pawl hi an mah pawl bawmnak ah a zaten ka hmang thluh ding, Pathian in amah sunlawihnak tilang tu dingah I hmang asi’ tiin a sim.

Dami Im hin Australia X Factor ah hlasak dingin a pasal Noah a hruai ih cuntin Hero timi Mariah Cary ih hla thawn a hmaisabik zuamnak ah a tel. Hlazuamnak ih thuṭhennak tuahtu, Ronan Keating, Red Foe, Danny, Natalie pawlcun an lungkim tilangnak ah an um hmun ah dingin lawmnak an nei.

Boot Camp ih an zuamawknak ih a hlafang a hnih ruangah Top 12 pawl lakah a tel theilo. Asinan mibik 12 pawl an hrilmi lak ihsin pakhat ih remcanlonak ruangah an la kir sal. Mipi hnenah Live ih hlasaknak an neih thok ihsin Australia mipi lawng siloin Australia X Factor tuṭhentu pawl ih uar bik mi lakih pakhat a si vivo. A hlasakmi lakah “Bridge over Troubled Water” ti mi tla cun Australia pawl ih an ngai tambik pakhatnak rori a ngah. Culawng siloin “Don’t Leave Me This Way” ti hla a sah laiah Australia X Factor tuṭhentu pawlcun a hlasak mi hman a cem hlanah an rak zawn in an rak lam pi.

2013 Australia X Factor an zuamawknak ah hla fing 12 (an sak mi pawl nawn sal in) an sak ih vei 9 lenglo Australia X Factor tuṭhentu pawlin an lungkimnak le an lawmnak tilang in an ding. ‘Hitluk in Australia kum 4 sung X Factor thuṭhentu ka si sungah mi ropi, hlasak thiam ka tawng dahlo, zarh tinte in kan milai pawl ih kan zuam bikmi cu amah (Dami Im) hi asi ringring, a phu rori a si’ tiin Ronan Keating cun a sim. A netabik an hlasak zuamawknak ih a sak mi “And I am telling You” ti hla a sak thluh ah Australia X Factor tuṭhentu pali pawl cun an tonak ih dinglawng hman duhtawk lo in an cabuai par rori ah dingin an lawm.

Dami Im hi kum 9 a ti ihsin South Korea ihsin Australia ah an ra vai lut. Piano le Violence tumthiam a si hlei ah zirhtu a si. Pathian duh zettu le an kohhran ih hlahruaitu le piano tumtu pakhat a si. Australia Brisbane ah a pasal Noah thawn an um.

A hlasak mi : The X Factor Australia 2013: Dami Im: And I Am Telling You – Grand Final

Comments

comments

Comments

%d bloggers like this: