Australia Ram Ah Lawng A Pil

China PM India A Tlawng

China ram Prime Minister, Wen Jiabao cu ni 3 sung caam dingih mizan sunah India ram khawpi New Delhi a thlengih, India ram tikcu caan ih mizansun nazi 2 hlante ah  Palam Air Force Station ah a tumih, China ram Cozah mi pawimawh leh sumdawng milian minung 400 hrawngin an thlun.

Palam Air Force Satation ah hin India ram  Union Minister, of State for Commercial and Industry Jyotiraditya Sciendia leh Foreign Secretary, Nirupama Rao in an rakhmuak. China PM hin India ram sungih a caam sungah President, Pratibha Patil, Prime Minister, Manmohan Singh leh UPA Chairman Sonia Ghandhi a kawm dingih, India leh China ram pahnih karlak rualrem awknak leh pehtlaih awknak lamzin thuhla an reltlang dingah zum a si.

An thurel tlangdingmi lakih  pawimawh deuhbik pawl lakah cun  China Cozah in India ramsungih Bank dinih Tax tamdeuh lakih sumdawn awkding thu leh J&K leh Arunachal Pradesh State ih minung um pawl hrangih China Cozah in Visa a hrantei a tuahsak theumi India in a duhlo thu leh, ramri cuhbuai awk nak thuhla  leh India in UN Security Council Member hnget ram sidingih a dil rero mi an reltlang dingah zum a si. China PM, Wen Jiabao hin PM a si hnuah India ram a tlawn voi 2 nak asiih, mizansun zamlam ah khan  Tagore International School khal a palcih.

Australia Ramah Lawng A Pil

Australia ram Christmas Island kiangah Iran leh Iraq ram ihsi raltlan pawlih tomi lawng a pilih,  minung ziangzat an thi timi theihfiang a si hrihlo. Hi lawnghi Australai Cozah in raltlan pawl a ret khawmnak Christmas Island panih feh a si. BBC in a sim nakah himi lawng sungah raltlan minung 70 hrawng an to ih, minung 40 hrawngcu runsuah thei an si tiah a simih, mithi ruang 27 an laksuak zothu khal a simtel.

Royal Fliying Doctor thupuangtu in asim nakah an mi tuamhlawm rero laimi lakah minung 3 cu an bese zet tiah a sim. Australia Prime Minister, Julia Gillard in colh a laksungih a mai aiawh tu Dy, PM, Wayne Swan cun  mi hrekkhat pawlcu runsuah an si nan mi hrekkhat cu tidai sungah an pil tiah a sim.   Hi lawng pillai hmutu pawlcun lawnghi tikap a thlenzik zawngah tisuar in a fen salih cumi hnuah lungpi a pahih lawnghi a phelih a pilcih tiah an sim.

Australia ramhi ramdang ihsin raltlan pawlin an pan tamzetih Cozahin an ramsungih umnak a pek theihlan sungcu Christmas Island ah retkhawm an siih, Cozah buaipi tlakzet a si ruangah an ram Politics dinhmun khalah auhla bikah an hman phah hngehnge. tu ah hin Christmas Island ah ramdang ihsi raltlan minung 2,000 lenglo an um lai.

European Union in Palestinian Ram  pawm Lo

Palestinian hruaitu Mahmoud Abbas in kum 1967 ih Isreal thawi ramri an raktuahcia mi vekih Palestinian ram cu ram pakhat ih pawmpi dingih European Union ram pawl a ngen nakcu European Union Member ram Foreign Minister pawlcun Palestinian cu ram pakhat ih an pawmsak theilo thu an an simih, Isreal thawi an karlak rualrem awknak an tuahthei hnulawngih an pawmpi theidingthu an sim. Palestinian hi leitlun ram 100 lenglo in ram pakhat ah an pawmpi nan Isreal thawi ram an cuhbuai awk ringring ruangah ram tampi in ram pkhat dinhmun ah an pwmpi hrihlo.

Comments

comments

Comments

%d bloggers like this: