Australia Prime Minister A Tlu Sual

Surbung Tlang Thuthang

Pu Sum

USDP Chairman Ah Thein Sien Hril Sal A Si

Voice oh America in a simnakah  Burma ram President Thei sein cu a Cozah kailaitu Union Solidarity and  Development Party (USDP) Chairman ah hrilsal a si tiah a sim. Asinan an Party sungih thil thupi buaipi tu dingah Parliament Speaker,  Shwe Mann cu tuanvo pekcih a si tiah an sim. Shwe Mann khalhi ram tuahtthat duhtu minung ih ruahmi a siih an Party Vice Chairmen 3 lakih pakhat hrilsal mi a siih, midangcu Htay Oo leh Aye Myint an si. USDP  Party hin Burma ram khawpi Naypyidaw ah Annual Conference an neiih himi ah an Party minung tamzet an suakkhawm.

Himi Conference ah an Party Chairman  Thein Sein tlengtu dingah Shwe Mann hi an hril zum a umnan Thein Sein hi hrilsal a siih, Shwe Mann hi kum 2015 ih Burma ram hrilawk nakah President ih hrildingah zum kaibik mi a siih, USDP Chairman ih Thein Sein an hril mihi Parliament in a pawmhnget sak ta a ttul dingih, USDP Central Executive minung 44 pawlkhal hrilcih thluh an si. USDP Party hin kum 2010 hrilawk nakah khan Seat um hmuahhmuah hmunli lakih  hmunthum tlukcu an la ih, theihcia zo vekin khami hrilawk nak kha NLD pawlcun an Boycot.

Kan dungthla ah khan President Thein Sien cun New York ih a tlawn nakah President cuh a tumnawnlo thu a simzo ih, Aung San Suu Kyi khalin ramdanpi thleng danglam ih President ih hril theihding a si an cun President ih hril a ello thu a rak simve zo nan tui dinhmunah Burma ram Daanpi ah ramdang mithawi pehzawm awknak neitu cu President, ih hril theih an silo timi a um ruangah  Aung San Suu Kyi ih pasalhi British a siih hleiah a  fate pawlkhal kahpia an siih curuangah ram Daanpi an thleng talo ah cun Aung San Suu Kyi hi President ih hril theih a silo dingih ruah a si.

Australia Prime Minister A Tlu Sual

Ni  3 sung caamih India ram tlawng laitu Australia Prime Minister, Julia Gillard cu mizan sunah khan  Mahatma Gandhi ih thlan Rajyhat ah a tlusualih a sinan a siatsuah awlo. a kedam bunmi kedil sang ttiangtti in hrampi hnimhring leiduup a palpil ngahsualih cunah a tlu. hinu hin tuikum January thla ih Canberra ih Australia Day an tuah nakih buainak suah lai khalah a kedam a rak thlauhlo zo.

British PM in Iran Kap Hrih Lo Dingin Israel A Ngen

London ih Juda pawl pakhat United Jewish Israel Appeal tonkhawm awknakah British Prime Minister, David Cameron cun  Nuclear ralthuam tuah thuhla ruangih hmuhthiam awklo nak ruangah  ralkap cahnak hmangih Iran kap hrihlo dingih Israel Prime Minister, Benjanim Natanyahu a ngen.British PM cun Iran cu Nuclear ralthuan tuah a tum tiih theih a si ruangah ram dangdang in hremnak peklai rero mi  asiih, tui dinhmuah Iran Cozah cu sumpai dinhmun leh a ramsung thilri dinhmunah a tlaniam in a talbuai rero zoih, Curuangah tui dinhmuan ah ralkap cahnak hmangih kah a culo a ti.

Israel khalin Iran hi ralkap cahnak hmangih kahmai a duhthu a rel ringringih, a sinan ram dangdangin hremnak an pek ruangah sumpai leh ram dinhmun ah nasazetin a tlasia in a talbuai rero laiih  himi ruangah ralkap cahnak hmanglo ih boruak ttha a suahthei nakding  um thei thil a si leh silo hngah hrih a duhthu a sim.

British PM cun ramliamzet leh Zinnen (Oil) neitamzet Iran Cozah thilti danhi a mawhthluk zet thu asimih, ramlian zet sisi ih a ram mipi hrangih  lamzin tthahman ruahsak lo ih Vansang ih rocket kahsuak tivek menmen  a buaipi mihin a ram a tise zetih , hiti vekih a feh vivo a si ah cun a ram mipi pawlkhal Cozah parah an hel loding ti simtheih a siloih, Iran in ramdang hrangih buainak leh ttihnung thil a tuah tum mihi British Cozah cun a thlir ringring a  si a ti.

Relzo vekin Iran in Nuclear ralthuam a tuahsuak a si ah cun Israel cu a kah hmaisa bik duhmai a zum um ruangah Israel khalin  a humhim awknakah Iran Nuclear hi an tuahsuak hlanih ralkap cahnak hmangih kahsiatsak a tum nak a siih, tuah European  Union Member ram pawlcun  Iran  hremnak pe in Bank leh  pehtlaih awknak thilri dang pawlcu an satcat thluh zoih Iran ram sungah thirlam thilri hrimhrim khal kuatlut an khamin tuah Iran Cozah hi sumpai dinhmunah a tlase zetih a talbuai rero lai a si.

Russia in Turkey Rel Fiang Aw Dingin Thu A Pe

Theihcia zovekin kandung zarh tlawngkai ni 3 ih Russia ram khawpi Moscow ihsi Syria ram khawpi Damascus panih  zuang khualtlawngphur vanzam minung 183 to theinak Airbus A320 cu Turkey Vanzam ralkap pawlin a lamzin rak khamsakin an ram vanzam ttumhmun Esenboga ah an ttum terih, Vanzam sungih minung leh thilri phurmi pawl an ceksak tikah minung 35 an toih, Syria Cozah ralkap pawlin Civil mipawl kahnak ih an hmanding ralthuam ziangmawzat an hmuh ruangah an thilri phurmi pawlcu an  hlanthlak sakih cumi hnuah a vnazam cu an zuangtersal.

Turkey Foreign Minister, Ahmet Davutoglu cun Syria ram Cozah ralkap pawlin Civil mi pawl kahnakih an hmanding ralthuam thilri hrimhrim cu Turkay ram Cozah in an ram leipar siseh Vansang lamzin siseh fehtlang ter a sianglo ih curuangah himi Vanzam khalhi Moscow khawpi ihsi an zuansuak hnu reilo te ah Turkey Vanzam ralkap pawlcu Vanzam pahnih hmangin a lamzin kham dingih thupek an si tiah a sim.

Himi thuah Russia  Cozah cun  Turkay cu a thilti danthu simfiangaw dingin thu a peih, Turkey in Syria Cozah ralkap pawlin Civil mipawl kahnak dingih hmanding ralthuam an phur an timihi Russia  cun a theilo a si tiah an simveih, Curuangah  himi thuah Turkay cun a tuahnaksan a simfiangaw tenteng ding a si tiah an nawrveih, Syria Foreuign Ministry khalin Turkey in himi Vanzam a rak kham naksanhi a relfiang a ttulih, himi Vanzam sungah ralkap hmanding ralthuam leh daan in a sianlomi thilri zianghman phurmi a umlo tiah an simve. Himi ruangah Turkey Cozah cun  buainak sosang a suahbet lo nak dingah Syria ramsung Vansang parih  an Vanzam zuanglo dingih  an ram Vanzam thu neitu pawl thu a pe.

Syria Ram Buainak

Nikum March thla ihsi Syria ram President Assad hlawnthlak tumnak ruangih buianak suakcun tutiang rehlam a panthei cuanglo ih, himi an buainak ruangih mithi cu 40,000 an kimzik te thlangih, mizan sun khalah Syria cozah ralkap pawlin  Opposition lam mipi pawlih umnak  Idlib leh Aleppo Province  ih um Opposition mipi pawl  raldo nak Vanzam leh bomb hmangih an kah ciamco ruangah minung 90 lenglo an thibetsal.

Tuithla ni 10 ihsin Opposition pawlin an kusungih an lakzomi Maaret al- Numan leh sumdawn nak hmunpi Aleppo leh Al-bab khua pawlcu Cozah ralkap pawlin tini zan ihsin raldo nak Vanzam hmangin an kapciamco salih, Human Rights Watch pawlcun  Syria ralkap pawlin UN ih hman a sianlo mi ralthuam Bomb ttihnung cu Civil mi pawl kahnak ah an hmangtiah an puhih, hihi Syria Cozah ralkap thu neitu pawlcun  thu dilo a siih, Tapung misual pawlin Syria ram an siatsuah nak rapthlak zetzet pawl thuhsak tum nakah Media  pawlin thu diklo zetzet an thehdarh mi a si tiah an simve.

(Visited 88 times, 1 visits today)

Comments

comments

Comments

%d bloggers like this: