Australia PM Tony Abbott Ka Tonnak – Dairy

Zuk: Michael Sukkar MP, Wesley Bawi, CCV sungtuan, Australia PM Tonny Abbott, Van Biak Thang, CCV hotu, Van Bawi Lian

Zuk: Michael Sukkar MP, Wesley Bawi, CCV sungtuan, Australia PM Tonny Abbott, Van Biak Thang, CCV hotu, Van Bawi Lian

Australia PM Tony Abbott Ka Tong

Van Bawi Lian

Australia ka umnak kum 6, thla 8 le ni 10 cekci a si. Hi ni cu ka hrang ni danglam ce le hminsin tlak ni sunglawi a si. Rampi uktu le hotu pakhat ton hi midang hrang ahcun a sunglawi dan a danglam ko ding. Minung kan bangawk cio lo vekin kan ruahdan le kan tuahtehnak khal a bang aw ciolo. Ka hrang ahcun damsung ih hminsin ropibik pakhat a si. Australia prime minister Tony Abbott kut kai phah ih thusim theinak ka neive leh ding ticu ka sunmang hmanih ka rak ruah dahlo mi a si.

August 20, 2014 tlailam sml 4;04 cekci ah Chin Community Victoria (CCV) sungṭuan, Pa Wesley Bawi in in rak ko. Kan lecturer thawn kan biakawk lai a si ruangah ka kai manlo. Minute 10 ah ka hei biak sal. Thaisun ah Austalia PM Tony Abbott tonnak ding hrangah hmun pakhat te a um ih na tel man pei maw in ti. Vei le khat ah keikhal cun AW ka man ding, karak tel ding tin ka let cih. Tu rori ah hminpek a ṭulih na man ngaingai a ṭul tiah in ti. Ka lungawi tin phone cu ka phit.

Ka tlawng ca ap ding pawl le a tam zet. Asinan Australia PM tonding cun ka thinlung i ciah neh zet ih ka timlam aw ve. Thusuhnak caan um pang sehla ziangmi ka sut pei? Ziangtin ka biak pei? tivek pawl ka ruat. Ka thinlung in cuvek caan ṭha khal cu ka neih thei lo ding tiah ka ruat. Ziangah tile keicu Asia ram ih ṭhanglian, Palik le ralkap pawl ih ukbet mi le an kuthnuai ih zalennak neilo milai pakhat te ka si vekah ka ruat aw.

10649684_782145725182808_3593285364224507883_n

 

Ton ding caan le hminpekawk caan cu zing sml 10:00 a si ruangah zingten a caan khel dingin ka pok. Ka umnak hi Melbourne nitlaknak thlanglam, Latrobe University kiang a siih Chin mi zohman an umlo. Zing ah ka phone alarm cu a awn. Ka thuam ka tuahaw ih Melbourne nisuahnak lam Chin mi 3000 tluk umnak hmun lam panin sml minute 40 tluk moṭaw ka mawng.

CCV sungṭuan, Pa Wesly Bawia thawn kan fehtlang ih a hmun kan thlen hlanah CCV hotu Pa Van Biak Thang in, midang hotu upa pawl an thleng zo ih nan ra thleng zik maw tiah in rak ko. Minute 15 tluk caan a duh lainan, rampi hotu lubik tongding cun mi thupi pawl khal tik cu khelin an timlam aw ti a lang fiang zet.

10603402_782147911849256_3692101047387960282_n

PM in thu a simlai

Ka ruah dan ahcun palik pawl le kilhimnak pawl nasazet in an ret dingih, kan moṭaw le kan mah tak ruang pumpi khal in dap thluh ko ding tivek in ka ruat. India ram ah kum 10 kan um ih cumi ih an palik pawl ih an ram hotu pawl an kil vekin an kil ṭhepṭhep ko ding tiah ka zum. Kan luh hlanah ziang maw tal cu in ti ko ding ticu ka zum zet.

A hmun kan thleng, a kiangkap ah Michael Sukkar MP, member of Deakin timi poster pawl an rak tar. Palik ka hmulo, ralkap le kilhmintu khal ka hmu lo. Ka thinlung ten a hmun kan diklo a si pei maw tiah ka ruat. Pa Wesley Bawi cun hinah a siko tin in tiih cutin ka moṭaw cu moṭaw dinnak ah ka va cawl ve. Kilhimnak a va seve tivek in ka thinlungthupten ka ruat. A sungah an um ko ding tin ka ruat hrihlai. A sung kan va lut ih zianghman a um cuanglo. MP Michael ih zung hnaṭuan pawl cun kan hmin pawl an rak ngan ih cumi cu la phahin coffe kan in khawm.

Mi ṭhen pawl cu an lut thluh zo ih mihrek khat an ra rero. Chin mi ihsin mi paruk Chin Community Victoria ihsin Van Biak Thang, hotu, Wesley Bawi, sungṭuan, Australia Chin Community ihsin Hre Ling, hotu, Lian Ding Hmung, sungṭuan le Van Kung Ling, advisor pawl an rak um. Nisuahnak lam ih vantlang mipi pawlkom ih member tambik veve an si. ACC pawl in sungtel 1500 leng an neiih CCV in 400 zik tluk an nei. ACC hi Hakha, Thantlang deuh an siih CCV hi Falam mi pawl an si.

Mah le thuam cio in lai puan an rak bat aw. Chin mi pawl ih kan nunphung kan uar zia ka hmuh tikah a thupten ka rak suangaw zet. Mi rang ram kan thleng nan ni thupi, khawitawk kan um khalah hivek ih kan hnam puan le thuamhnaw kan rak ngainat tal hi Chin mi kan sinak le kan miphun cawimawinak hrangih sunglawi pakhat a si zia a tak in ka hmu. A suak khawmtu vantlang hotu upa dangdang pawl in, puang danglam mawi thlenthlen pacangṭha pa ruk ih liangbah cu zoh mawi an ti ve ih khoitawk ihsi ra mi nan si ti pawl cu sut lo in an um thei lo.

10653477_782145758516138_9079534868429648451_n

Van Kung Ling, Wesley Bawi, Hre Ling, Van Biak Thang, Lian Ding Hmung, Van Bawi Lian

Chin mi ticu kan sinak rel dingah harsatnak tampi kan rak nei. Ziangruangah tile a fate zet mi miphun pakhat te fang kan si tikah in rak theitu an rak malzet. Kan rampi ihsin thok a ṭul ṭheu ih cumi ihsin kan pengṭhen, cutin kan pawlkom tivek ih rel a ṭul ṭheu. Chin mi ih pawkom dangdang um tivek pawl tla thuruat thiam deuh cun an mangbang deuh ṭheu. Asinan Melbourne nisuahnak lam ih um community pawl cun kan Chin mi pawl ih umtu khawsak dan in thei zet ih relfiang awk ciamco khal ṭul lemloin, zo kan si, khawitawk ah kan um, ziangvek ṭong pawl kan hmang titla in rak thei zet. Theilo tu ṭhenkhat hnen lawngah te nasa ngaite ih simfiang a ṭul ṭheu.

Deakin Community Morning Tea an tuahnak hmun ah kan va lut ve. Thurelnak ding hmun an rak ret cia ih rampi huap TV ihsin ABC le Skynet pawl khal an tim an rak tuah thok rero. ABC le Skynet pawl kiangah cun an thiltuah dan zohphah in ka hei bia. Tu hnu rei lote ah rampi TV ah live in kan thlah ding. Channel 7, 9 le SBS pawl khalin kan zuk mi hi in rak laksak cih ding. Cucu kan hnaṭuan dan a si. An feh theilonak hmun ah a caan le kan feh ih, kan thlen banlo nak hmun ah a caan le an ni pawl an tleng. Sinan kan thuthang pawl cu kan hlawm aw ton thluh tiah in ti. Ka thinlung ten kan Chin media pawl khalin hivek in thuhla pawl hi hlawmaw ton vivo thei sehla kan rampi dinsuahnak ding ah a ziktluak mi le duhthusam a si ding tiah ka ruat. Cuvek dinhmu ngai kan thlen ding cu sunmang lawngah kan silai sikhawh tiin thu ka ruat phah. Cutin a sung ahcun mi thupi tamzet pawl thawn thu titi khawmnak kan nei.

Zing sml 10:30 ih thleng ding a si ruangah a caan a hmang dik pei maw tiah ka sml cu ka rak zoh. Minute 3 tluk lawng a tlai. Kan um khawmnak inn pi sungah a ra luh hlanah media pawl an ra tlan ih cutin zuktu pawl le a mah kiltu ralkapthiam pahnih an ra lut. Cutin a ra lut.

Sangka kiangih rak hmuaktu tlawngta nauhak le kum upa lam pitar pakhat a bia ih minute 2 tluk a titi pi hai ta. Mi thupibik a si konan a mi biak dan ka hmuh tikah mipi ih nel ngam dingin a um ti cu a kiangkap um tu kan zate ih hmuh hngan dingin a langter. Thusimnak ding hmun ih an ruahnak hmun ih thusim dingin Michael Sukkar MP cun a sawm ih thusimnak a nei thok.

995645_782147745182606_2456335388464482518_n

Melbourne hi leilung tlun ih umnak hmun ṭhabik tiin an hril. Kum li a zawnzawn ih an hrilnak a si. Melbourne ih rak um ti ah karak uar aw in ka lung a rak hmui nasa. Australia PM ih a thusim kamkaunak ah ‘Melbourne hi leilung tlun ih umnak hmun nuambik hrang ih an hrilnak san khal nan mah pawl community hotu pawl ih ṭuannak ruangah a si. Kei khal nuam ka tiih ka suangaw zet a si tiah a ti. Minute 6 tluk forhfialnak le thazaang peknak le a thuken mi pawl simnak a nei. Cutin pakhat hnu pakhat mi upa le council hotu pawl tonak a nei.

Thusuhnak caan ṭha ka nei ve ding ticu ka ruat hrihlo. Kan luhlan deuh te ah MP Michael Sukkar zung ih ṭuan a secretary nu hnenah thusuhnak caan a um pei maw tiah ka sut. A thusim thluh hnu ah minute 45 a caambet ding ih cumi ahcun nan ngah ve ko ding tiah in sim. Sinan keimah in ka tong thei ding ah ka ruat aw lo. Pakhat hnu pakhat tlawngta pawl khal cibai in thusuhnak le sannak tete a nei vivo.

Thusuhnak neive dingin mipi lam ih a fehnak lam ahcun ka rak ding ve. Ka hmai ah tlawngta nauhak le an principal pawl an um ih cutin thusuhnak an nei rero. Ka kiangah a ra thleng. Ka thinlungten ziangtin ka biak hmaisabik pei tiah ka ruat. Ka thin cu a khur ih malte karak ṭhia. Ziangah tile Leilung tlun ih ram uktu lu ka ton hmaisabik mi a si ruangah a si. Ka kut khal a khur deuh ko.

‘Hi Mr Tony ka lo tongngah ih ka lungawi’ tiah a kut ka kai, ‘Hello Van, ka lo tongngah ih ka lungawi ve’ tiah ka hmin thoknak thawn ka awm parih ben mi hmintarnak zoh in in let cih. Ka hmin ih in kawh men hmanah ka lungawi tuk zo. A kut thlah hrihlo in ‘kan ni cu Burma ihsi ra mi kan siih Chin community kan si tiah ka sim cih’. Cule ka kiangih um Chin hotu upa dang pawl ih kut a kai vivo. ‘Nan ram hotu Aung San Suu Kyi khal ka tong dah zo. President khal ka tong. Suu Kyi kha a fim deuh, a thuruah a ṭha sawn’ tiah in ti. Cu thluh veten ka kiangih um Chin upa pakhat in humanitarian visa thu hla ah lo suh duhmi kan nei tiin a ca ken mi a pe. Michael Sukkar MP cun keimah in hica cu ka rak lo laksak dingih ka rak kuat leh ding tin a rak ti. Cutin thuhla dang zianghman a relpi bet nawn lo. Cutin ka lam ah i naih ih ka hmai fang zoh phah in thuhla i hawn sim.

 

10624895_782145621849485_7124009012926398189_n

Ka kiang nai deuh ah I ra naih. ‘Longih a ratu pawl khamnak ding le daan thar kan tuah ruangah raltlan beunak hawl mi tampi hrangih kan rikhhiah mi pawl cu a sinak vekin hmalaknak kan nei vivo ding tiah in ti hai. Cule kan lungawi ti phah in le, Chin hotu dang pawl ih kut a kai sal. Kei mai zawn ih ding  a silai rungah a kut ka kai salih, ‘Chin mi raltlan mi thawngsawm li lenglo Malaysia ah an um ih Delhi ah thawngriat an um. Himi pawl hin Australia rampi ih bawmnak an ṭul. Australia rampiih dan lo ih a luttu pawl ruangah kan unau pawl ih canvo hi an hloh in ka thei a si. Himi thu ah ziangtal in tuahsak thei pei maw? tiin a kut kai phah in hmaiton rori ah a mit fang zoh in ka sut’. Hi thu cu nan local MP hnenah rak rel in rak sut bet awla, rorel inn pi ah kan rel vivo ding tiah in ti. Ka lungawi ti tiin a hmaifang zohfahin kan be aw ih cutin midang a be peh vivo.

Ka thusuh mi le ka dilmi in tuahsak thei ding le dinglo cu Pathian thu a si ko. Australia rampi hotu lu Prime Minister Tony Abbott hnen ah kan Chin mi thu hla ka rak sim ngah mihi ka diriamnak pakhat cu a si. A rak hngilh in a thei nawn lo khal a si men thei. Asinan a hnathlam ah a sansung ah Chin timi le kan miphun ih harsatnak thuhla sim ngahtu ka si ruangah ka lungawi. Mirang dan in an mitfang zoh phah in le an kut kai phah ih thuhla um dan simngah tu ka sihi ka san thuanthu ih ka ngan khum mi thuanthu, mihrang ah ruahtlak lo a simen dingnan, ka hrang hminsin tlak caan sunglawi a si.

Kan zuk aw tlang ding tiah ka sawm ih ka liang parah a kut retin in run kuah. Ka phone thawn tulai santhar ṭongfang Selfies in kan zuk aw. Kan zuk ka zohsal ih bangawknak kan nei vek tla in ka hmu aw. Facebook ah ka tarih rual le pi pawl in nan bangaw in rak titu tla an um. Thungai pi tla cu asi lo ding. Putar kum 45 luan zo kei kum 30 kim fang ih rak bang cu ka va tar zikte tivek in kan ruat aw. Sinan Rampi hotu rak bang ve khal a sunglawi tiin ka hnem aw.

10583963_782145588516155_3801706384459522192_n

Australia rampi hotu lu rori mipi vantlang hnenah zalen zet le nel um zet ih a tlanlen hi ka zoh tikah zir ding siar cawklo I pe. Kan Chin mi pastor pawl le kan hotu upa pawl hnak hmanin biak a nuam sawn pei maw tivek tiang ka vun ruat.

Ziangruangah kilhimnak lam khal India ram ih palik paw lih an hotu pawl an kil ih mipiih tham banlo dingih an ret vekihan ret lonak ti ka thei fiang. Mipiin an ngaina ih ram zalen, ram dai, buainak le mipi thahawknak umlonak hmun ah kan um ti ka fiang aw. Palik le ralkap paw ih nekcepnak le hmuhsuamnak ram a silo ram zalen pawl ih thinlung le khawruahnak hi kan rak ban lo a si tihi ka thei suak rori.

Kan hotu pawlin kan mipi pawl ih lawhban dingin le thurawn nuam dingin um thiam ding hi kan ṭul a si ti ka fiang thar zet. Australia rampi hotu lu a sinan a lakphak in ding coffee khal a mahte in a tuah aw. Cutluk ih ngaitlawmawknak thinlung hi kan ram hotu le kan miphun hotu pawl in nei ve hai sehla ni nikhat ahcun Van Arsi zoh in kan Chin mi khal thlapi kiangah ram kan din leh ko ding tiah ka ruah san a si.

Austraia mipum million 22 lenglo, Melbourne Million 5 luan um lakah Australia PM tongtu ka rak si ngah ve hi Pathian thlawsuah a si tiah ka ruat lo thei lo a si. A hleice induhsaknak thawn in sawmtu CCV hotu pawl le sungṭuan Pa Wesley Bawi parah ka nunsung ih ka hngilh dah lo dingmi thuanthu in tuahsak a si tiin ka hminsin ih ka lungawinak khal ka langter duh a si.

(Visited 762 times, 1 visits today)

Comments

comments

One Comment

  1. Rev. Dr. Van Thawng Lian (Adelaide) 0432070197 says:

    ka rual na va ti that lawmman ve ka lo dawr, ka lo aur tuk,

Comments

%d bloggers like this: