Australia In Ralkap Kuat Bet Ding

April 29, 2009
 
Australia In Ralkap Kuat Bet Ding
 
Australia cun NATO ram pawlin  Afghanistan ih ralkap an kuat betlo a si ah cun Ralkap  kuatbet a tum  nawnlo thu a rak simzo nan, Afghanistan ih buainak a suah ringring thotho ruangah  US President Barack Obama ih ngen nak vekin a ralkap 450 a kuatbet sal dingthu Prime Minister Kevin Rudd cun a sim.
 
Afghanistan ah hin Australia ralkap 1,100 an um laiih  tui 450 a kuatbet dingmi  sungih ralkap 100 cun  Oruzghan Province ih Afghanistan ralkap pawl Training an pe dingih  ralkap 120 cun tui Afghanistan rampi hril awknak ih humhim nak Security hna an tuan ding.a dang a tanglai mi pawlcun Afghanistan ram humhim nakih ralkap dang pawl an kom ding a si. Kum 2001 ihsin Australia hin Afghanistan ah hin Ralkap a rak kuat zo ih ralkap 10 an thizo.
 
Swine Flu Nat Nak In  Ram Dang Thleng Vivo
 
Swine Flu natnak cun leitlun ram dangdang khal a tibuai vivo laiih Mexico khawpi ah cun Cinema, rawl dawr, Zu dawr leh mipi vangtlang punkhawm nak hmun pawlcu kharter thluh an si. Minung Million 20 hrawng umnak Mexico khawpi ih Deputy Mayor, Jose Angel Avila cun himi dan tuahmi thlun duhlo ih dawr leh mipi vangtlang punkhawm nak ong thotho tu pawlcu dan vekin hrem an si ding a ti.
 
Hi Swine Flu natnak ruangih Mexico ramin sumdawn nakleh thil dang ih a sun zat cu dollar Million 57 a kim dingih ruah a si.Hi natnak ruangih minung thizat cu 159 an kimzo ih midang 2,498 in himi natnak hi an ngah ih cumi sungah minung 1,311 cu sii zungah ret an si. UN hnuaiih Food and Agriculture Arganisation cun himi natnak hi Mexico ramih Vok vulh nakih si  suakmi a si leh silo an zoh fianglai ih, France leh Germany cun Mexico ih tlawngluh dinghi an kham thluhzo asi. Asia leh Latin America ram hrekkhat pawl khalin himi natnak khamnak dingah an ram Airport pawlcu thazet in an cek rero asi.
 
China, Russia leh Ukraine pawlcun an ramih Voksa lakluh an kham zo ih, US leh Brasil ih voksa zuartu pawlcun  Swine Flu timi hmin thleng zamrang lo asi ah cun an sumdawn nakin a tuarzet ding thu an sim.Hi natnak hi Brasil, Guatemala, Peru, Australia, South Korea, UK, Spain, Israel, New zealand, Canada, US, Mexico leh European Union ram 7 pawlah a thlengzo tiah WHO thu puangtu Dr, Keiji Fukuda cun a sim.
 
Turkey Bomb Puak
 
Mizan ah Turkey ram nisuah naklam Kurdis pawlih umnak Diyarbakir leh Bingol kiangah Bomb a puakih ralkap 9 an thi.Hi Bomb puakhi ralkap pawl Duty dingih an fehnak lamzin ah kammi asiih Mawtaw in a palpuak asi. Turkey Cozah thu puangtu cun hi Bomb kamtu cu Kurdish tapung pawl an si tengteng dingih a zumthu a sim. Turkey Cozah hin tui thla sungah Kurdish Workers Party minung 51 a kaizo ih , kum 1984 ihsin  Kurdish Worker Party pawlhin mahte rorel theinak neih tumin Turkey Cozah hi an do ih  Kurdish tapung pawlhi Iraq ram sungah um hmun khuar in an umih, Nikum kumcem zawng khalah Turkey ralkap pawlin Vanzam thawn Bomb an thlak ciamco zo asi.
 
Sri Lanka Leh LTTE
 
LTTE hotupa V Prabhakaran cu nungdam ih kaihsuak thei dingleh kaihsuak theilo ding thu an zumdan leh ngaihdan tamzet a umih,a mah thei fiangzet tu pawlcun nungdam ih kaihsuah thei an zumlo thu an sim. Sri Lanka National Intergration and Reconciliation Minister, Colonel Karunnah cun  LTTE hotu Prabhakaram cu nungdam in kaihsuah thei a zumlo thu a sim ih nungdam ih kaih ding hnakcun Cyanide hmangih a thah awk mai sawn a zumthu a sim.
 
Himi laiah India Cozah cun Sri lanka Cozah cu LTTE hotupa Prabhakaran cu nungdam ih kaisuak tengteng dingin a ngen ih an kaih ngah hnu ih a thu Sri Lanka Cozah in an relsak hnu ah India ramih kuat dingin an dil ih India Cozah hin Prabhakaran hi Thubuai ritzet awrhter ding an neiih kum 1991 ih India Prime Minister, Rajiv Gandhi that tertu a si ruangah India Cozah in a thu relsak ve a duh ruangah India ih kuat dingih a dil nak asi.
 
Himi laiah Mizan ah  Meithal kahpuak sianlo nakhmun Mullaitivu tipi kapih um Sri Lanka ralkap pawlcu LTTE pawlin kah tum in lawng 6 thawn an feh ih Sri Lanka ralkap pawlin an rak hmu ih tipi kap ihsi in tipi par ih lawngcu  Rocket Louncher leh meithal Machine Gun thawn an rakkap ciamco ih an lawng 6 kahsiat sak thluh in lawng sungih LTTE minung 25 khal an kapthat a si.
 
Sri Lanka Cozah cun an ram tlawntum tu Swedan Foreign Minister, Carl Bildt cu a visa an hnawlsak ih an ram luhter an sianglo ih France leh Britian Foreign Minister, Bernard Kouchner, leh David Miliband lawng an ramih luhter an siang. Himi ruangah Swedan Cozah cu Sri Lanka Cozah parah a thin a heng zetih Sri Lanka ramih Palai an retmi khal an kokir sal. France leh Britian ram ai awhtu pawlhin Colombo khawpi an Sri Lanka ram hotu bawi pawl an kawm dingih cumi hnuah himi do awknak ruangih  mipi harsat nak tuartu pawl ih umnak hmun pawl an zohsal ding a si, tu ah hin civil minung 55,000 lenglo cu umnak ding leh ei leh in ding ti rawl neilo in harsa zetin an um lai asi.
 
Pakistan Ralkap In Buner Ram Lakir Sal Zo
 
Taliban tapung pawlin ram kau an nawr tum vivo nak hmun Buner District ih an khawpi Dagar cu  Pakistan ralkap pawlin Raldo nak Helicopter thawn lutin an lakir sal zo. Pakistan ralkap pawlhi Taliban pawlin an rakkap ve maw ti leh minung ziangzat an thi ticu an simlo. Himi hmunhi Pakistan Khawpi Islamabad ihsin Km 100 lawngih hla si. Relzo vekin Pakistan leh Taliban pawlcun an ram sungih rualrem awknak a um thei nak dingah Malakand Division sungih Buner, Swat Valley, leh Lower Dir District, ah Muslim dan Shari Law hmang thei dingin remti tlangnak thutiam an rak tuahzo ih, Asinan Taliban pawlin an ralthuam an ret sal duh cuang silo ih cu ruangah Pakistan Cozah cun a kahsal nak asi.
 
Himi thu ah Taliban pawlcun Pakistan cu thutiam kammi pahbal saltu ah a puh ih Pakistan khalin Taliban pawlcu thutiam kam awkmi pahbal tu ah a puhve ih, an puh tawn aw rero asi. Pakistan ralkap leh Taliban pawl Lower Dir kiangih an kah awknak cu mizansun ah an bangih Taliban pawl minung 75 an thiih  Pakistan ralkap 10 an thi tiah ralkap thu puangtu Major General, Athar Abbas cun a sim.
 
Tik cu  man nei zetin hmangtum hram aw.
(Visited 43 times, 1 visits today)

Comments

comments

Comments

%d bloggers like this: