Australia Chin Kum Thar 2013; Tluangten Ṭhehsuak

This slideshow requires JavaScript.

Van Bawi Lian
Chinland Today

IMG_5842Melbourne : Australia, Melbourne khawpi ih Chin Kum Thar 3-6 Oct, 2013 ih neih mi ah khua hlan kan pupa pawl ih anrak thuamawk daan, kan Chin mi san tiluan a dotdot, Khuangcawi, Va sir ral laam, leh santhar laam aphunphun pholangnak neih a si. 

Ni thumsung hi Chin Kum Thar puai hi hman a siih, sun ah lehnak aphunphun thawn hman a si hnu ah zaan ah awn mawi, nunphung pholannak pawl tla neih a si. A ni netabik ah Pathian biak khawmnak an neiih Chin ram ih leimin ruang ih harsatuar Zalai khua bawmnak ding hrangih sumpai khawnnak khal an neiih $ 1850 lai an ngah tiin thu ka dawng.

Tlawngkai ninga zaan ah Chin Concert Live Show in tuah a siih Adelaide Music Band le Melbourne Music Band pawl in zaihla thawn mipi an awi. Hip Hop laam khal a umih mi 500 lenglo in i mi zan ah puai an zawh. ‘Hivek ih Live Concert, Chin Kum Thar ih zaan khat rori nan tuah hi a ropi a si. Mino pawl tha a thoter ih puai a ti hlunghlai’ tiin Bawite Adelaide CCA hotu pakhat  cun CT hnen ah a sim.

Zarhte zaan cu, Phun Hnam Zaan tiin tuah a siih lai nunphung, laam le awnmawi pholangnak ah mi 700 lenglo tluk  in an tel pi ti ah thu kan dawng. Australia Federal MP, Maroondah Council Mayor, le University ih professor dangdang, AMES hotu  ṭhenkhat leh Chin mi bawmtu mi dangdang pawl khal in an tel pi ve. ‘Australia ram ih miphun tete pawl ih hnam puai ah ka tel in ka feh ve ṭheunan tui zaan tluk ih ka nuam awk a um lo, hivek hnam laam hi a nuam a si, a ropi a si’ tiin Michael Sukar, Australia Federal MP cun CT palai hnenah a sim. ‘Hnam le miphun humhalh kan timi cu hivek a si, kan pupa pawl ih an rak ti dan hngilh lo ih kan ken nung hi a si, Chin Kum Thar a ropi a si’ tiin Chin mi tamsawn umnak hmun Maroondah Council Mayor Nora Lamont khal cun a sim ve. ‘ Khuangcawi, san a dotdot ih an tuah mi pawl hin mino pawl lawng silo upa pawl tiang mi a neh rori a si’ tiin Pa Thawngthuan, Brisbane , CCQ hotu cun CT a sim.

Tui ṭum ih kan Chin Kum Thar puai ihsin, kan mipi pawl ziangtluk kan lungput a ṭhangso tia a lang ih hmailam kan mino pawl hrang khalah tha a tho a si tiin Chin Kum Thar thlennak khua Melbourne Chin Community Victoria (CCV) hotu Pa Van Biak Thang Laisak cun a sim. CCV sungṭuan Pa Wesley Bawi khal cun, kan mino pawl lungrual te ih an ṭuantlangnak, kan community kan duhdawt zia pawl hi puai ihsin a lang. Hmailam khal ih cawn ding tlak event management rori a si’ tiin CT hnenah a sim.

Ni thumsung ih lehnak ah Football Volley Ball, Chinlone, Badminton, Table Tennis leh nauhak nuamawknak pawl tuah a si. A hnuailam vek in lehnak pawl cu an si.

  • Football: Brisbane vs Adelaide – Adelaide
  • Volley Ball (mipa) : Brisbane vs Adelaide – Brisbane
  • Volley Ball (nunau) : Adeladie vs Melbourne – Melbourne
  • Chinlone : Adelaide (A) vs Brisbane (A) – Brisbane (A)
  • Badminton: Joseph Mawi (Melb) vs Bawite (Bris) – Joseph Mawi (Melb)
  • Table Tennis: Van Bawi Lian (Melb) vs David Hmin Than Cuang (Melb) – David

Hi Chin Kum Thar football lehpan zuamanak hrang Samel Bawi Thang in a pa Saya Khaw Tin Dal hngilh lonak ah Bel a thawh ih Pi Hlawn Bawi in a u, Prof. Ro Za Thang hngilh lonak ah tiin Volley Ball leh zuamnak ih pakhatnak hrang Bel a thawh. An mah lawng silo in Hall sung ceimawinak hrang tiin Nu Van Lal Rem Ruat cun a pi le pu , Pu Than Duh le Pi Dar Hngel hngilhlonak hrang pangpar mawi thawn ceinak a nei.

Chin Kum Thar hi Australia thleng  Chin (Falam) mi pawlin hmun khat ih khuahlan kan pupa nuphung kilhimnak le kan hnam nun cawmnungnak dign ruahsansannak thawn 2008 ah rak neih thok a siih kum hnih veikhat an neih mi puai sunglawi zet a si. Adelaide le Brisbane ah veikhat veve a thleng zo ih tui tum hi Melbourne ih a thlen veihnihnak a si.

Adelaide ihsin mi 100 lenglo, Brisbane ihsin 20 lenglo leh Sydney, Golburn le hmun dangdang ih um Chin mi pawl in hi Chin Kum Thar an ra zawh tiin CT cun thuthang kan dawng.

(Visited 769 times, 1 visits today)

Comments

comments

Comments

%d bloggers like this: