Aung San Suu Kyi In Nehru Lecture Sim

Kan ram hruaitu Aung San Suu Kyi in mani tlawngkai nithumni, 14.11.12, ah Jawaharlal Nehru Memorial Lecture simnak India khawpi Delhi ah a nei. Cumi a simmi sungah, “India ihsin hmundang hmun hlapi ih kan thlawn ni ah ka riah a se zet ko nan, cuhnakin kan ram ih a harsabik le thin a pitbik ih ruahsannak a cem caan kan tong nikhua pawlih India in dunglet in hoi sanmi hi ka riah a se deuh ngaingai,” ti’n a sim. “Cu cingin kei cun kan ram ramhnih hi rualrem zetih umtlang thei ding hi ka zumnak le ka ruahsanmi, cun ka tumtahmi khal a si. Cucu acozah veve rualremnak lawng siloin ram mipi rori tiangin a si,” ti’n a simbet.

A ngaingai ahcun India in 1988 le 1900 kiangkap ih kan ram ih thilcang pawl tlunah a ngaihsak lo. Suu Kyi kum 21 lai inn ih khum ih hren a tuar lai khalah India acozah cun kan ram acozah thawn rualremnak le pehtlaihawknak a tuah rero. Cumi pawl cu Suu Kyi in kan ram ih a harsabik ni pawl tiin a simmi cu a si. Suu Kyi cun, “Kan ramhnih ih acozah veve nan tonawk le pehtlaiawk lai-ah kan ramhnih ih mipi pawl cun pakhat le pakhat upatawknak le theihthiamawknak kan nei thei ve lo. Cumi pawl cu hmailam ah kan nei thei ding ti’n ruahsannak ka nei,” ti’n a simbet hrih.

Cun Suu Kyi cun, “Atu tikcu khalah kan ram ih democracy hrang kan ṭuannak hi kan ṭheh hrih lo. Curuangah India ram le mipi cun ahlan ihsin nan tuah thei ringring mi nan thazang pawl thawn in bawm hram uh. Kan ruahsanmi democracy hrangih kan doletnak, ral kan donak, ah nan bawmnak kan lo ngen a si,” ti’n a sim.

Comments

comments

Comments

%d bloggers like this: