Aung San Suu Kyi In Kan Ram Leihnuai Thilsuak Zianghman Lotertu Pawl Faksel

Aung San Suu Kyi in kan dung Tlawngkai Zarpini, 9.12.12, Magwe khawpi ih Myatalung pura kulhsung ah mipi thawn a tong. Cutawk ahcun Suu Kyi in, “Kan ramsung ih thil mankhung thilsuak, tlor thing le leitlun leisung thilsuak pawl zianghman lo ah a cangtertu pawl, a rualpi pawl, a hnaṭuan tlang pawl hi an nauhak lai ihsin thok in an nu le pa in ziangtin nun an sim a si pei tiin ka ruat rero ṭheu. Anmah pawl ruangah kan rampi farahnak a suahpi a si,” tiin a faksel.

Suu Kyi in Magwe mipi hnenah, “Kan farah kan ti tikah rampi farah a si lo. Ramsung miipi farahnak sawn a si. Kan rampi taktak cu a farah lo. Ramdang thawn tahṭhim sehla kan ram ah thil mankhung tampi a suak. Himi thu thawn pehpar in kan ram mipi tampi cun kannih thawn ziangsi a pehtlai? Acozah in a duh dandan in a tuah ruangah a si ko an ti san men. A taktak ahcun acozah khal mipi lak ihsin a rasuakmi a si.

Curuangah kan fale pawl nun kan zirh tikah, kan fale pawl hi kan rampi ah thuneitu nasatak si bang sehla ziangvek in an um dingih an nungcang ding timi ruat phah in nunzirh uhsi. Curuangah a si atufang kan ram thuneitu le uktu pawl khal hi ziangvek innsungsang ah an ṭhanglian ti ka ruat ṭheu. Nan fale pawl khal ṭhaten fingkhawi in nunzirh hram uh,” ti’n mipi hnenah zangfah dil ih thu a cah.

(Visited 70 times, 1 visits today)

Comments

comments

Comments

%d bloggers like this: