Atu Rori Ah Tuah Aw!

November 6

Zarhte Ni

Atu Rori Ah Tuah Aw!

Siar:

Hebru 3:7-15

Cuhnakin sualnak ih bummi nan si lonak dingah le mi lungruh nan si lonak dingah Ca Thianghlim in, “Tuihsun” a timi ttongfang hi kan hrangah sullam neimi a si sung ahcun, nitinte pakhat le pakhat bawm aw sawn uh.    – Hebru 3:13

Kumkhat Sung Baibal:

–   Jeremiah 37-39

–   Hebru 3

Kan dung kum reipi ah ka rualpi pakhat in thathoternak thuzirnak (motivational seminar) hmun ah i hruai ih nuam ka tizet. Sumpai thu le hlawhtlinnak thu lam ah in fehpi loin, kan sinak thei fiang aw ding le kan nun ih tumtahmi thu lam thei dingin in zirh. Kan nun ih a ttulzet dingmi nun daan ding tete in sim. Thuken pakhat ka duhzetmi cu “Atu tuah aw” ti a si. In zirhmi thu in hnattuan ritzet ih ttuan ding tampi a sawng. Hnattuan dingmi hrialnak in huham cahnak a siatsuah, hnattuan tthehnak in cawlhhah damnak a pek.

Cuvek thotho in thlaraulam khal ah Pathian Thu lung ih tuah lohli dingin Hebru 3 sungah in sim. Curuangah Thlarau Thianghlim in, “Tuihsun Pathian aw nan thei asile thinlungruh mi va si hlah uh. Sual ih bummi nan si lonak dingah le thinlungruh neitu nan si lonak dingah nitinte pakhat le pakhat bawm aw sawn uh,” a ti (Hebru 3:7-8, 13). Pathian thu lung ta hngai sehla Israel pawl ramtiam thlennak dingah ziangtluk a rei ding ti kan thei lo, asinan an lungruhnak ruangah kum 40 an rei. Pathian tiamkammi ram cu an zate in an lut ngah lo (cc. 8-11).

Pathian ih in nunter duh daan kan theih tikah ziangruangah “Siseh” kan ti lo. Tthuktthun in muangcang hlah. Atu rori ah tuah aw.    – David McCasland

Ni dangah ti’n thutthin awk a olte,

Tuah ding ttha tuah suak loin;

Daithlang ih um cun sir awknak a thlenter,

Caan tawite nun tlanzuam awknak ahhin. – Anon

Tuah dingmi cu atu rori ah tuah lohli aw!

Thaisun ahcun tuihsun cu mani sun a cang leh ding.

Comments

comments

Comments

%d bloggers like this: