Atu Cu Kumkhua A Si Lo

August 10

Tlawngkai Nihnih 

Atu Cu Kumkhua A Si Lo 

Siar:

Thuphuan 21:1-5 

Thih a um nawn lo ding; ninghan riahsiat, aihram ttahnak le natnak a um nawn lo ding. Ziangahtile thil hlun pawl cu an hlo ttheh zo,” tiah a ti.   – Thuphuan 21:4 

Kumkhat Sung Baibal:

–   Saam 79 – 80

–   Rom 11:1-18 

Ka pa in, “Ruat hnik, natnak a reh ding cu a va ttha zik ve” a ti. Ka pai’ hnen ihsin cuih ruahnak pekmi awkam cu ka tleirawllai ih ka toklek le ka lehpan tikih ka khawn-awk le pemkuainak ka ton tikah ka rak thei ttheu. Culai ahcun a tthat-hnemnak ka thei cuca lo. Natnak pakhatkhat ka tuarlai ahcun mit-thli thawn ttap mai ding ti lo cu thil dang zianghman ka ruat thei lo.

Sikhalsehla, kumtluan in ka pa ih ruahnak pekmi cun ninghan riahsiatnak taktak dinhmun a thlen caan ah ka thin in nuamter thei saal. Thinlung kekkhuainak siseh, natfahnak ton ih beidong thinharzet caan ah siseh, “Atu cu kumkhua a si hrih lo,” ti’n keimah te’n thaazang laak in ka hneem aw ttheu.           

Zumtu pawl in rin-awknak (confidence) kan neihmi cu Pathian in kan hrangah thil ttha pakhatkhat tawlrelmi a nei, ti hi a si. Harsatnak cu sersiamlai ah a rak tel lo, a thupek pahbal hnu ah ziang a cang ti caan rei lote sung hrangih raalrin peknak a si. Kan sualnak ruangih ummi harsatnak sung ihsin Pathian in in ruunsuah a tum daan thu thanzaiter ding duhnak in neihter.           

Riahsiatnak le beidongnak cu kan hrial thei lo ding (John 16:33), asinan caan rei lote sung lawng a si ti kan thei. Riahsiatnak hrekkhat cu hih leitlun ih kan nunlai ah a dam thei ding nain, Pathian in netabik caan ih van thar le lei thar a din tik ahcun a zate in a hlo ttheh ding (Thupphuan 21:1). Atu cu kumkhua a si hrih lo.  -Julie Ackerman Link 

A cat zomi hri kan peh saal ding,

Hih hmun ihsin a thok zomi a cem thlang ding;

Vancungram cu mangbangza thuthup vek a si ding,

Neta ah kan thei fiang leh ding.   – Cornelins 

Vancungram ih kan ngah dingmi cu

leitlun ih kan cemmi hnakin a tamsawn ding.

Comments

comments

Comments

%d bloggers like this: