Atak ih Cangmi Laarnak (Vision)

March 21
Tlawngkai Nithum

Atak ih Cangmi Laarnak (Vision)

“Amah rori in kan natnak cu a laak ih kan damlonak cu a phur hlo a si.”
– Matthai 8:17

Bible Siar Ding: Isaiah 53:1-12

Hminsintlak thuanthu pakhat ka lo sim ding. Nikhat cu Shanklin lamzinpi kap ah ka dingih ka kenmi inn address zoh in ka um rerolai ah mi pakhat a ra ih, “Minaa veh ding na si maw?” in ti. “Aw” ka ti. Khinah feh aw, ti’n inn pakhat i khihhmuh.

Saangka ka king. In let lo. Ka king saal, aw diimte in, “Rung lut aw!” in ti. Saangka ka ong ih ka vung lut. Tlangval pakhat in kaililawn ih kai dingin i khihhmuh.

A par ka hung thlen tikah saangka ong awmi ka hmu. Ka feh vingvo ih ihkhun parah minu pakhat a tomi ka hmu. Ka hmuh ve te’n a ttong thei lo ti ka thei, curuangah thlacam ka thok cih. A caang, thawthawt ding a hawl, in biak thei lo ti ka theithiam.

Thla ka camlai ah Bawipa ih aw ka thei – Thlarau in Isaiah 53 siar aw in ti. Bible cu ka kau ih aw ringzet in ka siar. A caang nganak ka thleng: “Sikhalsehla, kanmah ih sual ruangah hriamhma a pu, Thil ttha lo kan tuah ruangah vuaknak a tong. Hremnak a tuarmi cu kan damnak a si, vuaknak a tuarmi cu kan rundamnak a si.” Cumi ka siar ttheh ah minu cu “Ka dam zo!” ti’n a hung au.

Ziangsi na cang? in sim hnik aw ka ti. “Zarh kar hnih liam zomi ah inn thianfainak ka tuah. Thilri ka tthin rerolai ah ka thin a vung naa duak. Siibawi pawl in na dam thei lo ding in ti. Mizaan zaanttim ah khaan sungah na rung lut in ka lo hmu. I hmuh tikah ka ttong thei lo ti na theih ruangah thla na cam cih. Cun Bible kau in Isaiah 53 na siar ih a caang nganak na siar ttheh tikah ka dam vuarvi. Cumi cu laarnak (vision) vekin ka hmuhmi a si ih atu ahcun atak a rak si hi” ti’n a ti.

Curuangah Bible hi atu khal ah a nungmi le hmual a neimi Pathian Thutak a si ti ka thei fiang. Bible cu Pathian ih Ttongkam a si. Pathian hnen ihsin na comi hnakih nasa sawn zianghman a um thei lo ding. Mi in a maksakzetmi tidamnak an tthelhnak hi thil dang pakhat hnu pakhat ih an tthawn vingvo ruangah a si. Bible ah hramthuk bun aw. Pathian in A Thu siar ding le zum ding a lo duhsak. Cumi cu a famkimmi tidamnak lamzin a si. Keh le vorh ah pial ruri hlah aw (Daan 5:32). Pathian zum fek aw. Na thinlung sungih zum lonak kha Pathian in lo hlonfai sak verver a duh. A Thu na zum ding a lo duhsak. A Thu sungah nunnak Thlarau a um.

Pathian Thu zum lo hi thihnak tur (poison) vek a si.

@ Smith Wigglesworth

(Visited 27 times, 1 visits today)

Comments

comments

Comments

%d bloggers like this: