Asia Khawmual Tuluk Pawlih Duhdawttu Ni

Duhdawttu
Nitlak lam ih an hmanmi Duhdawttu pawlih ni lengah Asia Khawmual Tuluk ram/Tuluk miphun pawlin an neihmi Duhdawttu pawlih ni nikhat a um ve. A thuanthu cu hitin a si.

Zhinu tiih kawhmi khuavang fala/Van cung fala pakhat a um. Van cungih khuavang pawl umnak hmunih um a ning tukih minung menmen dinhmun ih um dingin leilung ah a rong ttum.

Cutiih a ttumnak ah ruahlopiin Caw khaal tlangval pa thawn an tongaw. Niulang timi tlangval note amah thawn khuktthi a simi Caw khaal pa thawn an duhaw. Cutin Niulang le Zhinu cun An nunzalam tluanah tthenaw lo dingih thukamnak tuahin innsang an din. A nuamawzetmi innsang nuam din in fate pahnih an nei tlang.

Cutiih an um thuhla pawl ni khat cu Van cung ih Khuavang bawipa in a theih. Zhinu cu a fa pasarihnak a sinan a duhdawt zetmi a si. Curuangah minung umnak leitlun ih minung thawih nun hman tlang ding a lungkimpi lo. Curuangah lo theih loin a fanu Zhinu cu a kosal.

Cutiin Zhinu cu a duhdawtmi a sungkua pawl tthen in van cung ah a kai sal. Caw khaal pate Niulang cun dung a sip duh hrimhrim lo. A duhdawtmi Zhinu ngah theisal dingin a phunphun in a zuam. Asinan minung a si vekin a pitlin thei lo. Asinan amah bawm theitu ding pakhat a hmusuak. Cumi cu zodang si loin amai’ vulhmi Caw a si.

A Caw cun amah that tahratin a sa cun Niulang phurin Van par a zuanpi thei thu a sim. Asinan a Caw thah a siang lo. Netabik ahcun siang lo cingin a caw a that taktak. Cu ngaingai in Caw cu van parah a zuang thei. Van parah zuangin a fale pahnih thawn a duhdawtmi an tong tong ringring. Hitiih an tonawk ringring thu khal Khuavang bawipa in a theih velvo. Cucun a khamdan ding tawlrel a thok sal.
Curuangah Zhinu le Neulang karlak ah tonawk theilonak vanpar tiva an tuah. Cuih tiva lan in Niulang a zuang thei lo. Curuangah khatlam ralih thiamttial tah phahin a duhdawtmi pa le a fate pawl cu mitthli thawn khuavang fala Zhinu cun a rak zoh ringring. Niulang khal a fale pahnih thawn a duhdawtmi zohin riahsia ninghangin an um ringring.

Van tthat thlak takin an pahnih tthenawknak zangfah lainattu van cung Vate tumpi pawl cun kum khat veikhat tonawk theinak lamzin an sialsak. Tiva parih lilawn si dingin an tuahaw. Kum khat sungah zan khat lawng an tongaw thei. Zan khal an tonawk thluhin Vate pawl cu an zam sal. Cuih Zhinu le Niulang tei tonawk ni cu ‘Duhdawttu pawlih Ni’ ti a si.

Tuluk nunphung Dairy sungih thuanthu pakhat a si. Van cung fala Zhinu le caw khaal tlangval Niulang timi cu ‘Altari’ le ‘Vega’ ti hmin neitu Arsi pawl an si. An fale pahnih cu β le γ Arsi pawl an si. Altari le Vega karlak ih a dangtu tiva cu rulhreng khu tluan timi an siih an pahnih tongaw dingih tuahtu Vate pawl cu Rulhreng khu tluan ih veikhat a ra lang ttheutu Cygnus tluan pawl an si.

A taktak ahcun kum khat a si lo. Luna month tiih an kawhmi thla ih ni 30 hrawng a simi thla 7 month kimnak 7 ni a si. Khatlam in sim cun 7 Luna month, 7 ni tiin lak a theih. A tam sawn ahcun Aug thla sungah a si ttheu. Neta lam cun nitlaknak lamih hmandan Febuary 14 thawn rawi in Duhdawttu pawlih ni an hmang ve. Altari le Vega timi arsi an tonawk tikcu kgal Duhdawttu pawlih ni tiin a hranten an hmang thotho.

Cuih puai cu Qixi Festival tiin an ko ih Tuluk ram le Tuluk miphun umnak ram kipah tuisun ni tiang hlunghlai zetin an hman ttheumi a si. Fala le tlangval lawng si loin, nupi, pasal, fale te hnenah laksawng phunkim peaw, sang(Hmuk) pe aw in le puai tuahnak in nuam an hman tlang caan a si.

Hih Qixi Festival cu Tuluk nunphung ih Duhdawttu Pawlih Ni a si. Tuluk ti a si ko nan Asia ram hmun tampi khuhnehtu le an theihpimi ni khal a si fawn.
Ref: wiki
Lehnak- Myanmar CNN
Lettu – Mai Daidim

Comments

comments

Comments

%d bloggers like this: