Ariana Grande A Concert Nak Ah Zoh Mawi

Uk Lian

May 22, 2017 ah, American santhar hlasakthiam le aw-mawi Ariana Grande (23) ih concert Manchester Arena (England) khawpi ih a tuah mi, a theh zawngah British ih thanglian, Salman Ramadan Abedi (22) in, thihcilh bomb a puah ih mino 23 lenglo an thi ih, mi 119 lenglo in hriamhma an tuar ih, mino 23 cu thi le nung karlak ah an ding.

Manchester khawpi cu riahsiatnak le mithli thawn an khat. Ariana Grande khal a concert a si vekin a thin nuam lo ih, tong ding khal a theilo. Ariana Grande cu, mino 23 lenglo thihhlohnak mawhphurtu a sivekin, mithi sungkuapawl hrangah le hriamhmatuarpawl hrangah thil pakhat ka tuah sak ding tiah khawkhannak a nei.

Mithi sungkua le riahsiat a tuartu zate hrangah bomnak concert, Ariana Grande in a tawlrel ih, mizan ah BBC in LIVE in a thlah. Himi, concert hi British Red Cross le Manchester City Council pawl in cangsuak dingin an bawm ih Manchester rori ah an tuah. Concert ih ra suaktu pawl hi, minung 50,000 lenglo an kim. Cule, ram 50 lenglo in an LIVE thlahmi an rak zoh ih, nazi 24 sungah, sumpai million $13 lenglo an la lut a si.

Riahsia sungkua bomnak hrang concert ih teltu hlasakthiam hminthangpawl cu Justin Bieber, Black Eyed Peas, Coldplay, Miley Cyrus, Marcus Mumford, Niall Horan, Little Mix, Katy Perry, Take That, Imogen Heap, Pharrell Williams, Robbie Williams, and Liam Gallagher pawl hi an si.

May 22 ih Ariana Grande ih concert zohtu mi 14,000 lenglo pawl cu ticket a manlo in an pe. Cumi siarlo an ticket cu minit 20 sung ah an khawng cem. BBC LIVE thlahmi zohtu minung million 22.6 cu minit reilote sungah an kim.

Justin Bieber in mipi pawl cu, Pathian hmin salin a hnem. “Pathian” a ti tikah ziangmi Pathian timi ciah cu theih a har zet nan, Justin hin Pathian nung a zum asi ruangah Laimi pawlih Pathian hmin a sal dingah a zum um. Himi, concert hi an thupi ah “One Love Manchester” an ti. Duhdawtnak lawngin misualpawl kan neh thei tiah zaithiam pawlin mipi pawl an hnem zok rero.

Bomnak hrang concert tuahtu Ariana Grande hi mipi pawlin an lawm hleice. A rak uar ciatu pawl tla cun, an thihcilh bet. A hmuihmel in mi a to lo nasa ih, a aw khin mipi cu a hnem thei hrimhrim a si. Mipi lungsia lo dingah a tu le tu, a aw mawi te thawn a hnem ih, mipi pawlih an hla duhmi pawl a sah sak rero. A mai concert tuahmi tiah, zovek khalin hla an sak khalle, an kiang nai te ah a rak ding ferfi! A concert ih bomb a puah ruangah danglam zetin a hmin a than phah bet a si.

Ariana Grande concert ih mino thi pawl hi, “vanmi” tiah an ko hai ih, Robbie William hrimhrim tla cun, “Angels” timi le “strong” timi zaihla thawn mipi a hnem ih a mawi in a kaih tuk hrinhran. Miley Cyrus le Ariana Grande in dim zet le ngai nuam zetin “Don’t Dream It’s Over” timi an sak. Mipi an lungawi maw an riahsia ti theih a har, asinan an kut cu an thlir fel.

Katy Perry khal a hmuihmel thlengaw thluh in, Sianglianuk Kianghrol ih nganmi vek, Pawpi huk dumdo “Roar” timi a sak ih mino pawlin an riahsiatnak an hngilh pang maw ti khawp in thawmvang an nei. Goldplay le Ariana hin hla an sak tam thleice ih, Goldplay in “Sit down” “fix you” timi to phah, thinkuai vekin a sak kha cu, a hla thu theilo pawl hrang khalah lunglennak thotho cu a si.

Riahsiat hnemnak hrangih concert tuahmi hi kannih a rak zohtu le ngaingahtupawl hin ziangvek in kan rak cohlang timi theih a cak um zet. Ariana Grande in tui tum ih concert a tuah mi hi cu, Manchester mipi hrangah thuanthu mawite a ngan sak ngah rori a si.

BBC LIVE

Hram:

ABC, BBC

Comments

comments

Comments

%d bloggers like this: