Ananias le Sapphira Ziangruangah An Thi?

March 23
Tlawngkai Ninga

Ananias le Sapphira Ziangruangah An Thi?

Milai na bum a si lo Pathian na bum a si.
– Tirhthlah 5:4

Bible Siar Ding: Tirhthlah 5:1-16

Ananias le Sapphira teih nupa cu Pathian in kawhhran hmaisa (early church) hnenih a pekmi mangbangza thlaraulam tthangphawknak a thlen laitak ih tel ve mi an si nain an rak tthelh tariai. An ruahnak ah tthangphawknak a um nawn lo caan a thleng leh ding. Cumi vek tikcu caan hrangah an neihmi cu a zate’n pawlkom ah ap thluh siang loin anmai’ hrangah hrensiah (reserve) ah an ret.

Tuni ah minung tampi tla hi teih nupa vek an si. Mi tampi in an harsat mangbanglai caan ah Bawipa in thluasuah asile kan lo pe ding tiih thukamnak an tuahmi tla atak in tuahsuak loin an pelhsolh ttheu ih a netnak ahcun thlaraulam ih ttumsuknak an tong. “Ziangtluk a hrangah a nat khal le a thutiam cia vekih a thlunsuak ringringtu” cu mi thluasuak an si (Saam 15:4). Pathian hnenih a pekmi thukam a kilhimtu, a neihmi ziangkim Pathian ke hram ih aptu cu mi lungawi an si. Pathian in, “Ka lo hruai dingih leilungtlun ih thil ttha in ka lo khatter ding. Ka lo damter dingih ka lo cakter ding,” ti’n thu a tiamkam (Isa. 58:11). Mi rin-um pawl cu “An tar hnu khalah rah an rah; a kumkhua in an hringih an khohzet a si” (Saam 92:14).

Ziangtluk ih a maksakmi Pathian so kan neih timi lo hmuhter thei ding hi ka duhmi a si. Annanias le Apphira hi a ngaingai cun Pathian an rinhlelh. Zumnak hnget an neih lo ruangah an neihmi hrekkhat an hrangah hrensiah an retnak a si.

Kan hmuh fiang ttulmi cu kawhhran hmaisa sanlai cu Thlarau Thianghlim in a control thluh ih thuphan sim ti a um thei lo. Thuphan an sim asile an sim le vete’n an thi cih. Cule Thlarau Thianghlim huham cu atu hih caan netalam (later rain, James 5:7) khal ah acakzet dingih zokhal thuphan per duhnak thinlung an nei thei nawn lo ding. Pathian in kawhhran a thianhlimter ding. Pathian Ttongkam cu tidamnak le mangbangza tuahnak ah a lang dingih mikip in an ttih thluh ding.

Hih lei tisa daan ruahnak cun Ananias le Saphira ih an hrangah malte hrensiah an retmi hi thi fate men a bang. Asinan Pathian cu a nungmi zumnak lawngin a lung na awiter thei ding, cumi cu na sinak zate’n Amah hnenah ap awk thluh ding a si. Pathian in thil a tisual dah lo ih tithei lomi khal zianghman a nei lo a si.

Pathian huham cu a liam cia caan vek thotho in tuni khal ah amahkel a si. Zumtu in kan ttulmi cu “Bawipa in a ti” timi kawhhran hmasa ih an zum ih an nunpi vekin zum ngam ve ding hi a si.

@ Smith Wigglesworth

(Visited 32 times, 1 visits today)

Comments

comments

Comments

%d bloggers like this: