America Ram Biakinn Khar Thu

COVERFAITH4X6_full_600Rev. Hre Mang

America ramah kumtinte biak inn 3500 ihsin 4000 an khar, kawhhran a thi ti asi. Tuihlan kum 50 sungah biak inn 200,000 lenglo an khar tinak asi. Tuihlan kum 50 rei, 1959 ah kawhhran hruaitu pakhat in ziangtin American pawlin anmai umnak kawhhran an that, biak inn an khar, timi thu a rak ngan mi a taktak in a thlengmi thawn khaikhin tikah Tejado ih nganmi ca hi siar tlak zet asi. Kanmai dinhmun cio thawn khaikhin in siar duh hrangah rak siar cio uh.

=========================

Kawhhran Member pawl, Na Umnak Kawhhran Siatsuahdan (thahdan) Ci 10!

(Church Members, Here Are 10 Ways to KILL Your Church)

Ngantu: Tejado Hanchell

(Ngan vek cekci in leh si loin a simduhsan simsalmi asi)

Kum 80 lenglo asizomi kawhhranah pastor ka tuan. Himi kawhhranah, harsatnak tampi lakah kum 80 sungah senior pastor pa 4 lawng kan um hrih. USA kawhhran tampi an cem, hrekkhat simdan vek asile kumtin te biak inn (kawhhran) 3,500-4,000 an khar. Culailakah kan kawhhran cu kum 80 sung a damlai tikah kan lungawi zet. Umzia cu kan kawhhran a din thawk ihsin America ramah kawhhran 300,000 lenglo an thi, an cem, an khar zo tinak asi.

Kawhhran an cem, an khar, an tawp, an thihnak cu thu 10 in khaikhawm theih asi ding ti ka zum. Tunaite ah kawhhran member asinak kum 80 rei, upa pakhat in kawhhran makazin hlun pakhat I pek. Cumi makazin sungah cahram pakhat cu 1959 ah nganmi, “Kawhhran siatsuahdan pa 10” (10 simple ways to kill church) ti asiih ka lung ala zetih nan hnenah ngansal ka duh. 1959 ah kawhhran thawptertu cu tuisan kawhhran tampi an thawpnak thu thawn a bang aw ringring lai asi timi ka hmuhmi in ka lung a kuaiter. Kawhhran thahdan ci 10, malte danglam deuh in ngan salmi cu a hnuailam pawl an si: Na umnak kawhhran thattu na si pang maw, rak cek aw fel aw:

1.    Khawm lo

Kawhhran siatsuahdan thabik pakhat cu khawmlo asi. Mi tampi cu biak inn ah khawmnak can an neilo, puhmawh ding an nei ringring. Biak inn ah Pathian be dingin can kan pek zat lawng hi Pathian in in kilveng ve sehla kan leitlun nun cu ziang a bang pei maw? Hebru 10:25 ah biak inn ah mibur Pathian biak kawm a thupitzia kan hmu thei. Kawhhran member si cingin kan khawm lo asile kan umnak kawhhran thahtu, tawptertu, khartertu ah kan tel ve tinak asi.

2.    Khawm tikah tlai

Tuisan zumtu tampi (1959 kawhhran member pwl khal an si ding) cu ka duh/man cancanah biak inn thleng dingin ka feh ding, timi lungput an nei. Biak inn kan thlen tlai vekin hnatuannakah thlen tlai sehla mi paziat hnatuannak in in cawlter pei maw, ka thei lo. Pathian cu a cante ah hna a tuan, a cangvai ding kan duh, asinan kanmah teh a cante ah hna kan tuan in kan cangvai maw? Khawm kan tlai tikah khawm, a tikcu te ah biak inn thlen hnakin thildang thupi sawn ka nei ih Pathian in ka thlen tiang I rak hngak ko seh, kan ti thawn a bang aw asi. Khawmtlai tu pawl hi kawhhran siatsuahtu, mi tampi phurnak ti cau tu, kawhhran cangvaihnak siatsuahtu, kawhhran tampi an kharnaksan pakhat asi ve. Na tlai theu maw? Na kawhhran thattu ah tel ve hlah aw!

3.    Nikhua thatcaan lawngah khawm

Nikhua a thatcan le phurcan lawngah biak inn thleng zumtu tampi an suak vivo. An lung a awi caan lawngah biak inn an thlengih an nitin nunah buainak le phur lo nak an neih tikah an khawm aw lo. Pathian an vui, an pastor an vui, an kawhhran an vui ih an phunzai. Mi tampi cu ziangkim boruak a tha, an lung a kim ih an duhmi an ngah tikah biak inn ah an thleng ih an duhlo mi an tawn tikah, an duhmi an ngah lo, an duh lo zawng thil a um tikah Pathian an camriam (Job 2:9) ih biak inn ah hmuh ding an um nawn lo. Cuvek milai lungput thawn a thi theu mi cu an kawhhran asi.

4.    Mawhsiat, soisel, phunzai ding nei ringirng

Mi pakhat thah a tuar tikah zo in a that ti an hawl tikah a damlai ah a simse theutu a hmaisa bikah an ringhlel ih thu an sut hmaisa theu  asi. Kawhhran pakhat a tlaksiat, a thi, a tawp, an khar tikah a hmaisa bikah puhmawh dingmi cu kawhhran simse theutu pawl an si. Kawhhran siatsuahtu lakah ahmaisa bik ah puhmawh dingmi cu “Mawhsiatttu tohkham ah a totu pawl” (Sam 1:1) an si.

Mawhsiattu, phunzaitu pawlin thil pakhatkhat, mi pakhatkhat mawhsiat ding, sawisel ding an thei ringring, an hmu ringring. Asinan, anmah cu  ziangtik hmanah buainak remthatu (problem solver) an si dah lo. Kawhhran thattu an si. Na si ve pang maw?

5.    Taunvo la in hmai hruai dah lo

Kawhhran member tampi cu mikhual lungput an nei ih neitu thinlung an nei lo. Inn san cawpah na um tikah inn a siat asile nangmah in na rem a tullo, inn neitu na ko ih na remter. Na ta asilo vekin rem ding tuanvo khal na nei lo. Cuvek thotho in biak inn sungah tatu lungput nei lo, mikhual vekin a totu an tampi. Hnatuan tuantu,  liangpar suangin tuantu si ai in soiseltu si cu a awltuk. Zohman in soiseltu upatnak lungphun an phun dah lo. Thleng tul mi thleng ding kan duh asi ahcun kanmah rori in tuanvo lain kan tuan a tul.

Hruaitu hantuan cu sinak asilo; hnatuan tuansuah asi sawn. Tuanvo latu um lo, mikhual lungput nei lawnglawng umkhawmnak kawhhhran cu thih ding a hngak rero mi cawpi tar vek asi.

6.    Hruaitu ah hril, tuanvo pek si lo tikah thinheng

Kawhhran member tampi cun kawhhran sungih sinak, upatnak khi an zoh, an duh tuk. President, secretary, kawhhran upa, hmin neih an duh ih an duhmi dinhmunah hril, tuanvo pek an si lo tikah an thin a heng ih buainak an suahter. Hivek milai pawlin an langter mi cu an sungmuril ah a thup aw mi milai porh awknak asi; porh awknak cu ziang hmuahhmuah thattu asi.

7.    Meeting theh hlanlo ruahnak suah dah lo.

Kawhhran pakhat a tuletuu meeting leuhleuh pawl hi thihhnar ban in an um ti theihtheinak pakhat asi. Meeting sungah ruahnak suah duh ziar loin meeting theh hnu ah lungkim lonak langtertu, cutin khatin si ding asi, titu pawl hi kawhhran siatsuahtu an si.

8.    Alotheihlo in a tulmi lenglam ah zianghman tuah hlah.

Khawm, inn tlung, tuanvo pekmi lawng tuah, mahte thlacamnak in kawhhran hrang zianghman ruat dah lo, tuan dah lo. Riahsiatthlak zet asimi cu alotheihlo in atulmi lawng tuan theutu, taimak suah in kawhhran hrangah tuandah lo tu pawl hi kawhhran hrangah thilung takin  a tuan biktu, Pathian hmanrua pawl soiseltu, dodaltu an si ringring. An kaa in kawhhran thu cu an sim ih hnatuandan pawl awlsam zetin an rel theu nan a taktak thazang le thinlung titak zetin anmah in an tuan ngaingai dah lo.

Kawhhran a thi cuahco khal asile an zohmen, midang mawhsiat ding an nei ringring. Anmah pawl hi kawhhran thattu an si lo hmanah kawhhran thahnak ah hmanmi (hreitlung) hmanrua cu an si hrimhrim.

9.    Pahtian hnenah pek ding zat pe lo

Kawhhran rawngbawlnak hrangah sumpai a tul, a biktakin farah harsa tulsam bik nei pawl hnenah Pathian duhdawtnak langterin thiltha tuah dingin. Pathian hnenah pek ding zat pek lo tikah local kawhhran hmangin Pathian hnatuan tuan suak dingin kham, tawpter vek asi. Cui hleiah kawhhran in biak inn hrang le rawngbawlnak hrangah sumpai tampi a tul ringring asi.

Kawhhran tampi cu sumpai harsatnak ruangah an khar asi. Member pawlin Pathian hnenah pek dingzat pek lo tikah kawhhran thither rero asi.

10.Zumlotu pawl hnenah Thuthangtha sim lo

Kawhhran ih tumtah thupibik cu zumlotu pawl Zisu Khrih hnenah rak hruai asi. Kawhhran member zapi ten ZIsu ih thupek cu liangparah suangin an tuan dingmi asi. Zarhkhat sungah an nitin nunah an kiangkap minung, zumlotu pawl kha Zisu hnenah hruai ding an si.

Catbanglo in kawhhran zumtu pawl nunnak sung ihsin nunnak tinung cu midang hnenah luangsuak ding asi. Mithar, zumlotu, Zisu hnenah rak hruai an si tikah Khrih ah nunthar an nei ih cutin kawhhran cu a nung ringring asi. Cutin zumlotu Khrih ah rak hruainak in kawhhran cu leitlun biaknak vekin mibur pumkhawm awknak men in a umkhawm mi an silozia a langter asi. Cutin kawhhran sungah Thlarau THianghlim hnatuannak a thar ringring ih kawhhran cu a nungter asi. Na umnak khawhhran that hlah aw! Feh aw la Zisu Khrih hnenah zumlotu pawl rak hruai aw.

http://www.churchleaders.com/

Comments

comments

One Comment

  1. Chinland today hi kanlo ngaisang zet kanhrangah kanthu theih nak bik nansi curuang ah tuvekteih nan ti thei vivonak hrang thlazaka locamsak.

Comments

%d bloggers like this: