America Mivai Hrang Daanthar Tuah Miih Ka Hmuh Dan

Trump in America ih Mivai hrang daanthar a tuah mi cu Chin mi hrangah a poi deuh tiih ruattu kan tam zet ding.

A poilo cu a silo. Asinan hihi an mai ram a siih kan niih duhdan vekcun an hruai dah lo ding.

Kan Chin ram fate keuhki men hmanah hnamdang um ruri kan duh lemlo tihi hngilh lo in..

Ram picang leitlun uktu ram in kum 50 sung a ramsung ih mivai lut pawl a zoh fiang hnu ih a tuah mi a si.

Trump ih tuah mi hi keicun a awm tuk ka ti. Australia khalah hitin an hmang. Bangaw cekci cu a silo nan, a ram ih vailuttu pawl hrangah zir ding mi thupi le a ram ih thupit ter ding ih a neih mi pawl thei hmaisa ta dingin an fial.

Trump ih tuahthar mi ih a thupit ter ding mi cu a tawinak in, mivai lut pawl in bawmnak vei le khat ah anngah cih nawn lo ding, cun mirang thiam, mahte toh delh aw thei, sumlut niam pawl ih covo dipzap ding ih umtu pawl cu duhsak ansi nawn lo ding ti a si.

Zirnak le thiamsannak neitu, an rampi sumpai fimrelnak ti pitling ter theitu dingcin pawl hrang canvo a ṭha deuh ding.

Hi daan an tuah mi hi an ramsung ih mivai le senpivantlang kilkhawitu pawl ih zinzoinak an tuah cekcek hnu ih tuah mi a si.

An tumtahbik mi lakih langcu America ram mipi ih nuntukhawsaknak artlang rual ih khaisan, an mai rammiih covo le canvo pawl a ngahtu ding pawl in dikdawh ih ngah thei ding pawl a si.

Curuangah kan unau beunak hawl ih a tang hrihmi pawl hrang zuam ding mi thupi kan nei. Mirang nal zetih thiam le zirnak thupi zetih ruah ding a si. Beidongnak lamah hmang phah lo ding in thazaang lo pek ka duh zet.

Trump ih thuken cu “America ropit tersal ding” ti asi ruangah a thuken vekin a hna khal fumfe zetin a ṭuan rori.

(Visited 289 times, 36 visits today)

Comments

comments

Comments

%d bloggers like this: