America in Muslim sakhua a do lo

America in Muslim sakhua a do lo

Asia ram pawl tlawng rero laitu US President, Obama cun tihni sunah khan India ram khawpi New Delhi ihsin Indonesia ram a panih, mizan sunah Indonesia ram khawpi Jakarta ih University of Indonesia tlawngta minung 6,000 lenglo hmaiah thu a simih, Obama cun America cu Muslim sakhua biaknak leh Muslim ram dotu a silo a ti.

Obama cun tulai hrawngih Muslim sakhua biaknak hmin phaw ih songih, Muslim sakhua biaknak leh America ram karlak ih huatawk nakding thuhla tuahtu pawl ruangih, America leh Muslim sakhua biaknak karlakih hmuhthiam awklo nak um pawlcu a kaihhruai nak Cozah cun remthat tumin theihtawp a suah rero a si tiah a sim.

Obama cun America cu Muslim sakhua biaknak leh Muslim ram pawlih hrangah mi hnawksak a si dahlo dingih, Asinan Muslim sakhua biaknak phawih hmangih mi huat thu rello siatsuah tum ringringtu Al-Qaida leh a lam ttangpawlcu US cun a do vivo ding a si a ti.

President, Obama leh a nupi Michelle Obama hin mizan sunah khan Asia ram saklamih Muslim biak In tumbik Jakarta khawpi ih Isliqlal Mosque khal an palih, Indonesia ramah hin Mount Meropi tlangkang ruangah an caam ding tikcu caan an rak ruahman felzo mi khal nazi pahnih ih titawi sak an si. Obama hin Indonesia ihsin South Korea ramih G20 Summit a tel dingih, cumi hnuah Japan ram a pan leh salding.

Obama hin Indonesia ram a caam sungah Indonesia ttong a thiam laimi pawl khal a hmangih, Indonesia ram mipi in an rak lawmzet. Obama cun a nauhak laiih kum 4 a rak umzo nak Indonesia ramcu miphun tinkim um khawmnak a siih, Cozah in a hruai danah ramdang khalin zirtlak mipi rorel nak Cozah hngetkhoh a si thu a sim.

Obama hin University of Indonesia tlawngta minung 6,000 lenglo hmaiih thu a sim ankah Indonesia ttong a thiam laimi Assalamukum Salam Sejaltera a tiih, Nanzate hnenah thlamuan nak leh hmui ngilnak um vivo hramseh tinak a siih, tlawngta pawl leh mithiam upa pawlkhalin an lawmzet. Cumi hnu ah ka khua ah kara kirsal tikhal Indinesia ttongin an simih, Indonesia ttongkhal pengpang loten a ttong theilai.

Indonesia President, Susilo Bambang Yudhuyano in zanriah a rak donak khalah Semuanya enak a tiih,a thawtuk a tinak a si. Obama nu Ann Duuham hin Kenya rammi pasal ah a neiih Obama an nei. Cumi hnuah an tthenaw ih , Obama nu in Indonesia rammi pasal ah a neisal in curuangah Obama khal kum 1967 ihsin Indonesia ram Jakarta khawpi ah kumli a rak umzo. cumi hnuah a nu in Hawaii ah a kuatmi a si.

(Visited 55 times, 1 visits today)

Comments

comments

Comments

%d bloggers like this: