America Ih Vaihnak

America ih Laimi le a ra thleng ding Laimi pawl hrangah siseh, hlapi ihsin a thlirtu hmuahhmuah hrangah ‘theih ding tha’ a si ka zum. America ram hi ‘Vaihnak’ ram a si ih, Independence an ngah hlan, English Colonist pawlin an uk (1607) thok ihsin leitlun ram dangdang (ahleice-in Europe) in mi thawng tampi an vai lut. France Colonist pawl cu 1604 ah Maine le Canada an thleng nan ‘Midang vai dingin an sawm lem lo a bang. English Colonist pawl cun Virginia ah Jamestown timi khua an sa ih, an zaten mi 105 an si. England ram ih mi harsa pawl hrangah loram tampi a um thu le cuih an umnak ram thar (America leilung) ah kum 3 ihsin 7 tiang hna an tuan ahcun loram acre (3) pek an tiam. Hihi mi tampi hiptu a si. Can a hung rei ih, loram an pekmi a kauhlam le an hnatuan sung kum bikhiah khal a danglam. 1619 ah Jamestown ahhin African milesa an run thleng thawk ih, a thawk ahcun sal an si lo.

1620 ah England ram ihsin Biaknak ih zalennak hawltu Protestant milesa pawl cu Massachusette ah Mayflower timi long thawn an run thleng ih, an zaten mi 102 an si. Spain pawl khal US thlanglam le a laita pawlah ram an nei. Ahleice-in Missisippi tiva kiangkap ram thatnak ah umhmun an rem. 1638 ah Delaware state ah Sweden ram colonist pawl an ra thleng. Cucu lehnu 1655 ah Dutch (tulai ih Netherland) pawlin an co. 1638 hlan deuh 1624 ahhin Dutch pawl cu Manhattan tikulh an ra thleng ih, cuih ram cu ‘Native American’ kan ti theu mi (Red Indian) pawl hnen ihsin US$ 24 man sui (gold) thawn an lei. Europe ram dangdang ihsin mi tampi an vaih ruangah kum 1643 ahcun New York khawpi (ahlan ih New Amsterdam) ah tong a phunphun (18) lai a um man. Kum 1654 ah Brazil ihsin a ra tlantu Judah refugee pawl cu New Amsterdam an ra thleng.

Civil War (1861 -65) hnulam khalah mi thawng tampi an lut vivo ih, tuni tiangah kumtin ‘Mi vai’ pawl tawn awk khawmnak hmunpi a si. Theih bet dingih pawimawh cu ‘Ram sungih citizens pawl khal’ hnatuan tha hawlin an umnak, an suahnak State sungah an um ringring lo; an thawn, state dangah an vai, hnatuan tha an dawi vivo cio a si.

USA ih Laimi pawlin cutawk khatawk state sungah hnatuan a tam, a mal ti’n kan hmuh ban tawk kan rel ve cio ding. Asinan US acozah cun ‘statistic’ a zoh ih politics le economics sirhsan in hnatuan a tam le a mal dan a tarlang ve.

(Visited 36 times, 1 visits today)

Comments

comments

Comments

%d bloggers like this: