Amai' Hmin Ruangah

April 27

Tlawngkai Nihnih

Amai’ Hmin Ruangah

Siar:

1 Samuel 12:19-25

Ziangahtile Pathian in, “Ka lo tlansan lo dingih ka lo hnong lo ding,” ti’n thu in kam.  -Hebru 13:5

Kumkhat Sung Baibal:

–    1 Siangpahrang 1-2

–    Luka 19:28-48

Hlanlai Israel mi pawl cu an siangpahrang hmaisabik a simi Saul siangpahrang canternak puai ah Gilgal ah an pumkhawm aw (1 San. 11:15). Bawipa cu a minung pawl in siangpahrang an dil ruangah a lung a awi lo. Himi caan ah Samuel in hiti’n tha a pek hngai: “Pathian cun a hmin saal in thu a lo kam ih ziangtik hman ah a lo taanta lo ding. Ziangahtile Amai’ minung si dingah a lo tumtah cia zo a si,” (1Samuel.12:22) a ti.

Kannih Khrih Jesuh zumtu khal Pathian ih “miphun bulce,” kan si (1Pet. 2:9). Pathian cun misual mipalh kan si in thei na’n ziangtik hman ah in hnong lo ding. A fapa Jesuh Khrih thawn pehzomnak kan neih ruangah a dikmi Pathian thawn pehzomnak kan nei thei (1 John 5:20).

Himi hi sualnak tuahpeh theinak dingah phualam in petu a si lo. Paul in, “Tuah hrimhrim lo ding. Sualnak ahcun kan thi zo ih ziangti’n so a sungah kan um thei nawn ding,” tiah a ti (Rom 6:2). Kanmai’ duhhrilnak in Pathian thawn kan hlat aw thei vekin naihzet in kan pawlkom aw thei. Asinan Pathian in a minung pawl cu ziangtik hman ah a hnong dah lo. Bawipa in, “Ka lo tlansan lo dingih ka lo hnong lo ding,” in ti (Hebru 13:5).

Thinlung hnangam le daite’n kan um thei. Ziangahtile Pathian in Amai’ hmin sunlawihtu dingih a hril mi pawl cu catbaang loin a kilhim. – David Roper

A Ttongkam cu ziangtluk rintlak so a si,

Amah cu i kiltu, i Runtu le ka Bawipa;

A tuu pakhat te hman a hloter lo ding,

Pathian thangtthat, Amah cu in kilkhawitu a si. – Anon

A thlengh aw dah lo Pathian duhdawtnak sungih bun awmi cu

zohman in an long thei dah lo ding.

(Visited 23 times, 1 visits today)

Comments

comments

Comments

%d bloggers like this: